លោក ប៉ុមប៉េអូ ប្រាប់ឲ្យគ្រឹះស្ថានអប់រំអាមេរិកពិនិត្យជំនួយ និងនិស្សិតមកពីចិនឲ្យបានហ្មត់ចត់

សង្គមអន្តរជាតិ

អន្តរជាតិ

លោក ប៉ុមប៉េអូ ប្រាប់ឲ្យគ្រឹះស្ថានអប់រំអាមេរិកពិនិត្យជំនួយ និងនិស្សិតមកពីចិនឲ្យបានហ្មត់ចត់

11, Dec 2020 , 8:29 am

រូបភាព

ដោយ:

រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ នៅថ្ងៃទី៩ ធ្នូ បានអំពាវនាវឲ្យសាកលវិទ្យាល័យអាមេរិកទាំងអស់ពិនិត្យឲ្យបានហ្មត់ចត់ទៅលើជំនួយដែលបានពីស្ថាប័នចិន ក៏ដូចជានិស្សិតចិនដែលមកសិក្សានៅអាមេរិក។ ប្រមុខការបរទេសរូបនេះព្រមានគ្រឹះស្ថានសិក្សាអាមេរិកថា ចិនអាចនឹងលួចគំនិតច្នៃប្រឌិតបើសិនសាកលវិទ្យាល័យអាមេរិកមិនប្រយ័ត្នប្រយែង។

ក្នុងសុន្ទរកថា នៅរដ្ឋ Georgia ដែលនឹងមានការបោះឆ្នោតព្រឹទ្ធសភានៅខែក្រោយ លោក ម៉ៃ ប៉ុមប៉េអូ រដ្ឋមន្ត្រីការបរទេសអាមេរិកព្រមានឲ្យគ្រឹះស្ថានសិក្សាអាមេរិក ប្រយ័ត្នប្រយែងក្នុងការទទួលលុយ និងនិស្សិតចិនឲ្យចូលរួមក្នុងសាលារបស់ពួកគេ។

លោក ប៉ុមប៉េអូ និយាយថា អាមេរិកគួរស្វាគមន៍និស្សិតចិនដែលមានបំណងពិតប្រាកដក្នុងការមករៀននៅអាមេរិក។ ប៉ុន្តែលោក ក៏បានលើកឡើងផងដែរនូវករណីចំនួនពីរដែលនិស្សិតចិនត្រូវបានចោទប្រកាន់ពីការលួចការសម្ងាត់ និងករណីដែលរដ្ឋាភិបាលចិនធ្វើបាបនិស្សិតខ្លួនដែលមករៀននៅក្រៅប្រទេស។

«បក្សកុម្មុយនីស្តចិន ដឹងច្បាស់ណាស់ថា ខ្លួនមិនអាចឈ្នះយើង(អាមេរិក)ក្នុងការបង្កើតថ្មី ដូច្នេះហើយទើបគេបញ្ជូននិស្សិតជាង៤សែននាក់មករៀននៅអាមេរិកជារៀងរាល់ឆ្នាំ»។ នេះជាការលើកឡើងរបស់ប្រមុខការបរទេសអាមេរិក ដោយព្រមានថា បើសិនជាសាកលវិទ្យាល័យអាមេរិកមិនខ្វល់ និងមិនស្មោះត្រង់ចំពោះអ្វីដែលកើតឡើងទេ នោះអាមេរិកនឹងត្រូវចិនបង្រៀនវិញ។ នេះបើតាមទីភ្នាក់ងារព័ត៌មាន AFP ។

ឆ្លៀតក្នុងពេលជាមួយគ្នានេះ ប្រមុខការទូតអាមេរិកបន្តអំពាវនាវជាថ្មីឲ្យគ្រឹះស្ថានសិក្សាអាមេរិកបិទវិទ្យាស្ថានខុងជឺផងដែរ។ វិទ្យាស្ថានខុងជឺមានទីតាំងនៅតាមសាកលវិទ្យាល័យអាមេរិកមួយចំនួន ដោយបង្រៀនភាសាចិន។ កន្លងទៅ វិទ្យាស្ថាននេះ ហាក់ប្រយ័ត្នប្រយែងដោយមិនដែលជជែក ឬលើកឡើងពីគោលនយោបាយរបស់រដ្ឋាភិបាលចិនឡើយ។

លោក ប៉ុមប៉េអូ សង្កត់ធ្ងន់ថា លោកចង់ឃើញថ្នាក់ដឹកនាំសាកលវិទ្យាល័យបិទវិទ្យាស្ថាននោះ ក៏ដូចជាស៊ើបអង្កេតទៅលើសកម្មភាពរបស់ក្រុមនិស្សិតចិនដែលទទួលលុយពីបក្សកុម្មុយនីស្តចិនផងដែរ។ ប្រមុខការបរទេសរូបនេះ អះអាងថា អាមេរិកមិនគួរឲ្យរបបជិះជាន់លួចរបស់ពីខ្លួនដើម្បីទៅបង្កើនអំណាចយោធា បោកបញ្ឆោតប្រជាពលរដ្ឋ ឬក៏ទិញយកស្ថាប័នអាមេរិកណាមួយដើម្បីបិទបាំងសកម្មភាពរបស់ចិនឡើយ។

បើតាមទិន្ន័យរបស់ក្រសួងអប់រំអាមេរិក សាកលវិទ្យាល័យអាមេរិកទទួលប្រាក់ប្រមាណ១,៣ពាន់លានដុល្លារពីចិនចាប់តាំងតែពីឆ្នាំ២០១៣មក។ ប៉ុន្តែលោកប៉ុមប៉េអូ និយាយថា ចំនួនប្រាក់ពិតប្រាកដអាចនិងមានច្រើនជាងនេះដោយសារគ្រឹះស្ថានខ្លះពុំបានបង្ហាញរបាយការណ៍ពិតប្រាកដ៕