សង្គមអន្តរជាតិ
អន្តរជាតិ
មហាក្សត្រម៉ារ៉ុក Mohamed VI ។ រូបភាព AFP
×![]()
ម៉ារ៉ុក និងអ៊ីស្រាអែលនៅថ្ងៃទី១០ ធ្នូ យល់ព្រមសម្រួលទំនាក់ទំនងការទូតជាមួយគ្នា ក្រោយមានការជ្រោមជ្រែងពីអាមេរិក។ ម៉ារ៉ុក ក្លាយជាប្រទេសអារ៉ាប់ទី៤ ដែលសម្រួលទំនាក់ទំនងការទូតជាមួយអ៊ីស្រាអែល បន្ទាប់ពីអេមីរ៉ាតអារ៉ាប់រួម បារ៉ែន និងស៊ូដង់។ ប៉ាឡេស្ទីន រិះគន់ម៉ារ៉ុកចំពោះការសម្រេចចិត្តបែបននេះ។ 
ទីបំផុត ម៉ារ៉ុក ក៏បានសម្រួលទំនាក់ទំនងការទូតជាមួយអ៊ីស្រាអែល ដោយមានអាមេរិកជាអ្នកជួយចូកជួយចែវ។ ប្រធានាធិបតីអាមេរិកដូណាល់ ត្រាំ និងមហាក្សត្រ Mohammed VI បានជជែកតាមទូរសព្ទពីការសម្រួលទំនាក់ទំនងនេះ។។ ជាថ្នូរនឹងការសម្រួលទំនាក់ទំនងជាមួយអ៊ីស្រាអែល អាមេរិកប្រកាសទទួលស្គាល់អធិបតេយ្យភាពរបស់ម៉ារ៉ុកក្នុងតំបន់សាហារ៉ាខាងលិច។ នេះបើយោងតាមទីភ្នាក់ងារព័ត៌មានReuters។
«មិត្តដ៏អស្ចារ្យរបស់យើង គឺអ៊ីស្រាអែល និងរាជាណាចក្រម៉ារ៉ុកយល់ព្រមក្នុងការភ្ជាប់ទំនាក់ទំនងពេញលេញជាមួយគ្នា»។ នេះជាសំណេរក្នុងបណ្តាញសង្គម Twitter របស់លោក ត្រាំ ដោយអះអាងថា នេះជាជំហានយ៉ាងសំខាន់សម្រាប់សន្តិភាពនៅតំបន់មជ្ឈិមបូព៌ា។ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ក៏បង្ហាញក្ដីរីករាយខ្លាំងដែរ និងបាននិយាយថា រឿងបែបនេះ នឹងមកដល់នៅថ្ងៃណាមួយ។
ក្នុងការសម្រួលទំនាក់ទំនងនេះ ម៉ារ៉ុកនឹងភ្ជាប់ទំនាក់ទំនងការទូតពេញលេញ និងផ្លូវការជាមួយអ៊ីស្រាអែល អនុញ្ញាតឲ្យយន្តហោះអ៊ីស្រាអែលបើកក្នុងដែនអាកាសខ្លួន និងមានការហោះហើរត្រង់រវាងប្រទេសទាំងពីរផងដែរ។ លោក Jared Kushner កូនប្រសារលោក ត្រាំ និងជាទីប្រឹក្សាជាន់ខ្ពស់សេតវិមានដែលដឹកនាំកិច្ចការនេះ លើកឡើង ម៉ារ៉ុក និងអ៊ីស្រាអែល ក៏នឹងបើកការិយាល័យទំនាក់ទំនងនៅរដ្ឋធានីរ៉ាបា និងតែលអាវីវ ដើម្បីសម្រួលទំនាក់ទំនងមានស្រាប់ មុនឈានដល់ការបើកស្ថានទូតនាពេលក្រោយ។
ចំណែករាជវាំងម៉ារ៉ុកវិញ លើកឡើងថា អាមេរិក នឹងបើកស្ថានកុងស៊ុលនៅតំបន់សាហារ៉ាខាងលិច។ តំបន់សាហារ៉ាខាងលិច ជាតំបន់វាលខ្សាច់ដែលម៉ារុក និងរណសិរ្ស Polisario ដណ្តើមកាន់កាប់។ រណសិរ្ស Palisarioដែលគាំទ្រដោយអាល់ហ្សេរី ចង់បានតំបន់នេះដើម្បីបង្កើតរដ្ឋថ្មីមួយជាយូរមកហើយ។ អាមេរិក តាំងតែពីដើមឡើយរក្សាជំហរកណ្តាល ដោយគាំទ្របទឈប់បាញ់រវាងភាគីទាំង២ និងអះអាងថាការបង្កើតរដ្ឋថ្មីពុំអាចទៅរួចឡើយ។
តាំងពីបង្ហាញផែនការសន្តិភាពតំបន់មជ្ឈិមបូព៌ាមក លោក ត្រាំ បានជំរុញឲ្យប្រទេសអារ៉ាប់សម្រួលការទូតជាមួយអ៊ីស្រាអែលមក។ ប៉ាឡេស្ទីនអះអាងថា សកម្មភាពបែបនេះ មិនខុសអ្វីពីការធ្វើឲ្យថយក្រោយនូវបុព្វហេតុក្នុងការបង្កើតរដ្ឋប៉ាឡេស្ទីននោះទេ។ អាជ្ញាធរប៉ាឡេស្ទីនថា ការសម្រួលទំនាក់ទំនងនេះ គឺទទួលស្គាល់ទឹកដីដែលអ៊ីស្រាអែលកាន់កាប់ ដែលផ្ទុយពីដំណោះស្រាយរដ្ឋ-ពីរដែលគាំទ្រដោយអង្គការសហប្រជាជាតិ។
សូមរំឭកថា អេហ្ស៊ីប ជាប្រទេសអារ៉ាប់ទីមួយបានភ្ជាប់ទំនាក់ទំនងជាមួយអ៊ីស្រាអែលក្នុងឆ្នាំ១៩៧៩ និងហ្ស៊កដានីក្នុងឆ្នាំ១៩៩៤។ នៅឆ្នាំ២០២០ អេមីរ៉ាតអារ៉ាប់រួមក៏សម្រួលទំនាក់ទំនងជាមួយរដ្ឋជ្វីហ្វនេះដែរ ហើយក្រោយមកក៏មានបារ៉ែន និងស៊ូដង់៕
Tag:
ម៉ារ៉ុក
អ៊ីស្រាអែល
អាមេរិក
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 3 ថ្ងៃ
