ប្រធានាធិបតីកូរ៉េខាងត្បូង ជំរុញឲ្យពលរដ្ឋគាំទ្រគោលដៅគ្មានកាបូនិកឆ្នាំ២០៥០

អន្តរជាតិ

ប្រធានាធិបតីកូរ៉េខាងត្បូង ជំរុញឲ្យពលរដ្ឋគាំទ្រគោលដៅគ្មានកាបូនិកឆ្នាំ២០៥០

11, Dec 2020 , 10:59 pm

រូបភាព

ប្រធានាធិបតីកូរ៉េខាងត្បូង មូន ចេអ៊ីន។ រូបភាព Xinhua

ដោយ៖កង ម៉េងហុង

នៅថ្ងៃទី ១០ ខែធ្នូ ប្រធានាធិបតីកូរ៉េខាងត្បូងលោក មូន ចេអ៊ីន បានជំរុញឲ្យពលរដ្ឋកូរ៉េខាងត្បូងធ្វើការរួមគ្នាដើម្បីឆ្ពោះទៅរកសេដ្ឋកិច្ចដែលមានផលប៉ះពាល់តិចតួចដល់បរិស្ថាន សំដៅសម្រេចឲ្យបានគោលដៅគ្មានកាបូនិកឆ្នាំ២០៥០ ។ លោក មូន ប្តេជ្ញាគាំទ្រដល់បច្ចេកវិទ្យាដែលបញ្ចេញកាបូនិកទាប។

«យើងត្រូវកាត់បន្ថយការចំណាយលើការផ្លាស់ប្តូរថាមពលតាមរយៈជំរុញភាពជឿនលឿនខាងផ្នែកបច្ចេកវិទ្យា»។ ប្រធានាធិបតីកូរ៉េខាងត្បូង មូន ចេអ៊ីន ថ្លែងបែបនេះក្នុងសុន្ទរកថាតាមទូរទស្សន៍។ លោកបានបន្តទៀតថា រដ្ឋាភិបាលនឹងផ្តល់ការគាំទ្រយ៉ាងរឹងមាំដើម្បីឲ្យបច្ចេកវិទ្យាអាចដឹកមុខពិភពលោកក្នុងការសម្រេចឲ្យបានគោលដៅ និងក្លាយជាម៉ាស៊ីនជំរុញកំណើននៅពេលអនាគត ។

លោក មូន ប្រាប់ប្រជាជនកូរ៉េខាងត្បូង ថា បើមិនចង់យឺតពេល ត្រូវចាប់ផ្ដើមពីពេលនេះ។ ជាមួយគ្នានោះ លោកក៏ប្រកាសសន្យាផ្ដល់ប្រាក់គាំទ្រចំនួន៧,១០ពាន់លានដុល្លារទៅក្នុងកម្មវិធីកិច្ចព្រមព្រៀងបៃតង មានគោលដៅបង្កើតការងារ និងពង្រឹងការងើបឡើងវិញរបស់សេដ្ឋកិច្ចដែលរងផលប៉ះពាល់ដោយសារជំងឺកូវីដ-១៩ តាមរយៈការបង្កើតតំបន់ឧស្សាហកម្មដែលបញ្ចេញកាបូនិកទាប និងនគរូបនីយកម្មព្រៃឈើផងដែរ។ នេះតាមការផ្សាយរបស់ទីភ្នាក់ងារព័ត៌មាន Yonhap ។

ក្នុងដំណើឈានទៅកាន់គោលដៅឆ្នាំ២០៥០ កូរ៉េខាងត្បូង មានផែនការផ្លាស់ប្តូរឧស្សាហកម្មដែលពឹងពាក់លើហ្វូស៊ីលឥន្ធនៈទៅជាប្រព័ន្ធផ្អែកលើថាមពលកកើតឡើងវិញ។ ប្រទេសមួយនេះ មានបំណងពន្លឿនគោលដៅដំណើការយានយន្តអគ្គិសនីចំនួន១,១៣លានគ្រឿង និង ឡានអ៊ីដ្រូសែនចំនួន២សែនគ្រឿងនៅលើដងផ្លូវនៅឆ្នាំ២០២៥។ ជាមួយគ្នា ប្រជាជន ២០ លានគ្រួសារនៅទូទាំងប្រទេស មានលទ្ធភាពប្រើប្រាស់អាគុយសាកនៅផ្ទះដែរ។

គួរបញ្ជាក់ថា ថាមពលអគ្គីសនីរបស់កូរ៉េខាងត្បូង៤០ភាគរយបានមកពីថាមពលធ្យូងថ្ម ខណៈពេលថាមពលកកើតឡើងវិញតិចជាង៦ភាគរយ។