អន្តរជាតិ
ប្រមុខ UN ប្រាប់មេដឹកនាំពិភពលោកឲ្យដាក់រដ្ឋក្នុងភាពអាសន្នផ្នែកអាកាសធាតុ អគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គូតេរ៉េស ។ រូបភាព Xinhua
×
ដោយ៖កង ម៉េងហុង
អគ្គលេខាធិការអង្គការសហប្រជាជាតិលោក អាន់តូនីញ៉ូ ហ្គូតេរ៉េស នៅថ្ងៃទី ១២ ខែធ្នូ ប្រាប់ឲ្យមេដឹកនាំពិភពលោកប្រកាសភាពអាសន្នផ្នែកអាកាសធាតុ ខណៈបញ្ហានេះកំពុងបង្កការគំរាមកាន់តែធ្ងន់។ លោក និយាយបែបនេះក្នុងកិច្ចប្រជុំកំពូលមួយប្រារព្ធខួបលើកទី ៥ នៃកិច្ចព្រមព្រៀងអាកាសធាតុទីក្រុងប៉ារីស។
មេដឹកនាំពិភពលោក បានបើកិច្ចប្រជុំកំពូលនៅថ្ងៃទី១២ ខែធ្នូ ដើម្បីរំឭកខួបទី៥ នៃការចុះហត្ថលេខាកិច្ចព្រមព្រៀងស្ដីពីបម្រែបម្រួលអាកាសធាតុឆ្នាំ២០១៥ នៅទីក្រុងប៉ារីស។ បើតាមទីភ្នាក់ងារព័ត៌មាន Reuters មេដឹកនាំពិភពលោកជាច្រើននាក់បានថ្លែងក្នុងប្រជុំតាមអនឡាញ ដែលមានគោលបំណងបង្កើនសន្ទុះការប្តេជ្ញាចិត្តសម្រាប់ប្រទេសនីមួយៗ នៅមុនកិច្ចចរចាអាកាសធាតុដ៏សំខាន់មួយដែលនឹងត្រូវធ្វើឡើងនៅទីក្រុង Glasgow នៅចុងឆ្នាំ ២០២១។
« តើមាននរណាម្នាក់នៅតែអាចបដិសេធថា យើងកំពុងប្រឈមមុខនឹងភាពអាសន្នយ៉ាងខ្លាំងបានដែរឬទេ»? ហេតុដូច្នេះហើយបានជាថ្ងៃនេះ ខ្ញុំសូមអំពាវនាវដល់មេដឹកនាំទាំងអស់នៅលើពិភពលោកប្រកាសអំពីស្ថានភាពអាសន្ននៅក្នុងប្រទេសរបស់ពួកគេរហូតដល់ភាពគ្មានកាបូនបានជោគជ័យ។ អគ្គលេខាធិការអង្គការសហប្រជាជាតិ អាន់តូនីញ៉ូ ហ្គូតេរ៉េស និយាយបែបនេះក្នុងវីដេអូថតទុក។
លោក ហ្គូតេរ៉េស លើកឡើងទៀតថា កញ្ចប់ស្តារសេដ្ឋកិច្ចដែលត្រូវបានដាក់ចេញ បន្ទាប់ពីការរីករាលដាលនៃជំងឺឆ្លង គួរតែជាឱកាសមួយដើម្បីពន្លឿនការផ្លាស់ប្តូរទៅរកកាបូនឌីអុកស៊ីតកម្រិតទាបនៅពេលអនាគត។ ប៉ុន្តែលោកកត់សម្គាល់ថា ការកំណត់បែបនេះមិនបានកើតឡើងលឿនឡើយ។
បើតាមលោក ហ្គូតេរ៉េស សមាជិកនៃក្រុមប្រទេសសេដ្ឋកិច្ចជឿនលឿនទាំង២០ (G20) បានចំណាយថវិកាចំនួន៥០ភាគរយបន្ថែមទៀតទៅក្នុងកញ្ចប់ថវិកាជំរុញសកម្មភាពសេដ្ឋកិច្ចរបស់ពួកគេលើវិស័យដែលទាក់ទងទៅនឹងការផលិត និងការប្រើប្រាស់ឥន្ធនៈហ្វូស៊ីលជាជាងការប្រើប្រាស់ថាមពលដែលមានកាបូនឌីអុកស៊ីតទាប។ លោកចាត់ទុករឿងនេះ ជាការណ៍ដែលមិនអាចទទួលយកបានទេ ព្រោះប្រាក់រាប់ពាន់លានដុល្លារដែលត្រូវការសម្រាប់ការសង្គ្រោះសេដ្ឋកិច្ខ ជាប្រាក់ដែលមនុស្សបច្ចុប្បន្នកំពុងខ្ចីពីមនុស្សជំនាន់ក្រោយ។
នៅមុនកិច្ចប្រជុំកំពូលនេះ អង់គ្លេសដែលជាសហអ្នករៀបចំ បានប្រកាសថា ខ្លួននឹងបញ្ឈប់ការគាំទ្ររបស់រដ្ឋាភិបាលចំពោះគម្រោងប្រេងឥន្ធនៈផូស៊ីលនៅបរទេស។ ចំណែកនាយករដ្ឋមន្ត្រីអង់គ្លេសលោក បូរីស ចនសុន បានប្រាប់កិច្ចប្រជុំថា ប្រទេសនានាអាចធ្វើការជាមួយគ្នា ដើម្បីកាត់បន្ថយការពឹងផ្អែកយ៉ាងខ្លាំងលើឥន្ធនៈផូស៊ីល និងផ្លាស់ប្តូរការអនុវត្តកសិកម្មជាដើម សំដៅជួយសង្ត្រោះផែនដីឡើងវិញ៕
Tag:
UN
បម្រែបម្រួលអាកាសធាតុ
© រក្សាសិទ្ធិដោយ thmeythmey.com