អាល្លឺម៉ង់ នឹងបិទប្រទេសទាំងមូលក្នុងអំឡុងពេលបុណ្យណូអែល និងឆ្លងឆ្នាំសាកល

COVID-19

អន្តរជាតិ

អាល្លឺម៉ង់ នឹងបិទប្រទេសទាំងមូលក្នុងអំឡុងពេលបុណ្យណូអែល និងឆ្លងឆ្នាំសាកល

14, Dec 2020 , 3:37 pm

រូបភាព

ដោយ: ធៀន ភារិន្ទ

អាល្លឺម៉ង់ បានសម្រេចបិទទ្វារប្រទេសទាំងមូលក្នុងរយៈពេលជាងមួយខែ ដែលនឹងគ្របដណ្ដប់ថ្ងៃបុណ្យណូអែល និងឆ្លងឆ្នាំថ្មី ដើម្បីទប់ស្កាត់ការរាតត្បាតកូវីដ-១៩ ។ ការបិទប្រទេសនេះ ធ្វើឡើងស្របពេលករណីឆ្លងប្រចាំថ្ងៃហក់ឡើងដល់ជាង ២ម៉ឺនករណី។ កម្មវិធីក្នុងបុណ្យណូអែល ក៏ត្រូវរដ្ឋាភិបាលអាល្លឺម៉ង់លុបចោលផងដែរ ដើម្បីបង្ការការជួបជុំមនុស្ស។

អាល្លឺម៉ង់ នឹងបិទប្រទេសចាប់ពីថ្ងៃទី១៦ ខែធ្នូ ដល់ថ្ងៃទី ១០ ខែមករា ឆ្នាំ២០២១ ដើម្បីគ្រប់គ្រងករណីឆ្លងនៅក្នុងប្រទេស ដែលកំពុងតែឡើងខ្ពស់។ នៅថ្ងៃទី១៣ ខែធ្នូ អាល្លឺម៉ង់បានរាយការណ៍ថា មានករណីឆ្លងប្រមាណ ២ម៉ឺនករណី និងអ្នកស្លាប់មានចំនួន ៥៩៨នាក់។ តួលេខសរុប អាល្លឺម៉ង់មានករណីឆ្លងប្រមាណ ១,៣លានករណី និងស្លាប់ជាង ២ម៉ឺននាក់។

ក្នុងវិធានការបិទប្រទេសនេះ លោកស្រី អែនជែឡា មឺហ្គែល អធិការបតីអាល្លឺម៉ង់ បានចេញបញ្ជាឲ្យបិទមុខជំនួញមិនចាំបាច់ សាលារៀន និងសេវាកម្មមួយចំនួន។ ការជួបជុំក្នុងថ្ងៃបុណ្យណូអែល ត្រូវកាត់បន្ថយពីមនុស្ស ១០នាក់ មកត្រឹម ៥នាក់ក្នុងរង្វង់ត្រឹមពីរគ្រួសារ។ ប៉ុន្តែពីថ្ងៃទី២៤ ដល់ថ្ងៃទី២៦ រដ្ឋាភិបាលបន្ធូរបន្ថយបន្តិច ដោយគ្រួសារនីមួយៗ អាចអញ្ជើញសមាជិក ៤នាក់ មកពីគ្រួសារផ្សេងទៀតបាន ដោយសារវាជាថ្ងៃបុណ្យណូអែល។ ចំណែកការលក់ស្រា ត្រូវបិទទាំងអស់នៅទីសាធារណៈ។

ក្រៅពីមុខជំនួញខាងលើ ការបាញ់កាំជ្រួញក្នុងអំឡុងពេលបុណ្យណូអែលនេះ ក៏ត្រូវលុបចោលផងដែរ។ ទន្ទឹមនេះ រដ្ឋមួយចំនួនរបស់អាល្លឺម៉ង់ បានដាក់បម្រាមគោចរនៅពេលយប់ ចំពោះរដ្ឋចំនួន ដែលមានករណីឆ្លងហក់ឡើងខ្ពស់។

ក្នុងការបិទប្រទេសនេះ លោកស្រី មឺហ្គែល បានលើកឡើងថា ជាការងារចាំបាច់របស់រដ្ឋាភិបាល ដើម្បីជួយសម្រាលបន្ទុកនៅក្នុងប្រព័ន្ធសុខាភិបាល។ ការសម្រេចបិទប្រទេសទាំងមូលនេះ ធ្វើឡើងបន្ទាប់ពីមានការយល់ព្រមរបស់មេដឹកនាំបណ្តារដ្ឋផ្សេងៗទៀតដែរ។

ដើម្បីជួយសង្គ្រោះមុខជំនួញមួយចំនួន រដ្ឋមន្ត្រីហិរញ្ញវត្ថុ លោក Olaf Scholz បានសន្យាជួយសង្គ្រោះជំនួញ ឬអាជីវកម្មទាំងឡាយណា ដែលរងផលប៉ះពាល់ដោយសារការបិទប្រទេសនេះ។ ជំនួញទាំងនោះ អាចទទួលជំនួយ ប្រមាណ ៦០ម៉ឺនដុល្លារក្នុងមួយខែ។

សូមបញ្ជាក់ថា នៅក្នុងខែវិច្ឆិកាកន្លងមក អាល្លឺម៉ង់ បានសម្រេចបិទតំបន់មួយចំនួនម្ដងហើយ។ ជំនួញ និងអាជីវកម្មមិនចាំបាច់ សាលារៀន ត្រូវបិទ។ យ៉ាងណាក៏ដោយ វិធានការនៅក្នុងខែវិច្ឆិកានេះ មិនទទួលបានជោគជ័យឡើយ ហើយករណីឆ្លងនៅតែបន្តហក់ឡើងដដែល៕