COVID-19
ជាតិ
តំណាងរាស្ត្រនិងមន្ត្រីរដ្ឋសភា ចូលធ្វើការធម្មតាវិញ ក្រោយធ្វើតេស្ត៣លើកគ្មានជំងឺកូវីដ-១៩ កិច្ចប្រជុំពេញអង្គរបស់រដ្ឋសភានាពេលកន្លងមក
× លោក ឡេង ប៉េងឡុង អគ្គលេខាធិការរដ្ឋសភា ជូនដំណឹងទៅកាន់ថ្នាក់ដឹកនាំនិងសមាជិករដ្ឋសភា និង មន្ត្រីរាជការរដ្ឋសភា ថាអាចចូលធ្វើការបានវិញជាធម្មតា ក្រោយពីពួកគាត់ បានធ្វើតេស្ត៣លើក ដោយលទ្ធផលអវិជ្ជមានពីជំងឺកូវីដ-១៩ និងបានធ្វើចត្តាឡីស័ក១៤ថ្ងៃរួចមក។ លោក ឡេង ប៉េងឡុង បញ្ជាក់ថា ពួកគាត់ទាំងអស់ នឹងមិនតម្រូវឲ្យធ្វើតេស្តរកមេរោគកូវីដ-១៩ជាលើកទី៤នោះទេ។
តាមរយៈសេចក្តីជូនដំណឹងចេញនៅថ្ងៃទី១៤ ខែធ្នូ ឆ្នាំ២០២០ អគ្គលេខាធិការរដ្ឋសភា បានស្នើឲ្យគ្រប់សមាជិករដ្ឋសភានិងមន្ត្រីរាជការរដ្ឋសភា អនុវត្តតាមការណែនាំរបស់ក្រសួងសុខាភិបាល ក្នុងការការពារជំងឺកូវីដ-១៩ ដូចជា ពាក់ម៉ាស់ជាប់ជានិច្ច លាងសម្អាតដៃ រក្សាគម្លាតសុវត្ថិភាពឲ្យបានមួយកន្លះពីគ្នា និង មិនជួបជុំគ្នាលើសពី២០នាក់ ជាដើម។
សមាជិករដ្ឋាសភា រហូតដល់សម្តេច ហេង សំរិន ប្រធានរដ្ឋសភា និង បណ្តាមន្ត្រីរាជការរដ្ឋសភាជាច្រើនរូប បាននាំគ្នាធ្វើតេស្តរកមេរោគកូវីដ-១៩ ចំនួន៣លើក និងបានធ្វើចត្តាឡីស័ក១៤ថ្ងៃ ក្រោយពួកគាត់ បានដឹងថា ជាប់ពាក់ព័ន្ធជាមួយនឹងព្រឹត្តិការណ៍សហគមន៍២៨វិច្ឆិកា។
ក្រសួងសុខាភិបាល រកឃើញមនុស្ស៤០ហើយ ដែលពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា បានឆ្លងជំងឺកូវីដ-១៩ តែបើគិតចំនួនសរុប កម្ពុជា មានអ្នកឆ្លង៣៥៩នាក់ ដោយបានជាសះស្បើយវិញ៣០៩នាក់៕
© រក្សាសិទ្ធិដោយ thmeythmey.com