COVID-19
ជាតិ
ក្រសួងមហាផ្ទៃ បើកឲ្យចេញចូលឡើងវិញហើយ
× ក្រសួងមហាផ្ទៃ អនុញ្ញាតឲ្យមានការចេញ-ចូល និងការចូលបម្រើការងារឡើងវិញ ចាប់ពីថ្ងៃទី១៥ ខែធ្នូ ឆ្នាំ២០២០ទៅ។ នេះបើតាមសេចក្តីជូនដំណឹង ដែលចុះហត្ថលេខាដោយលោក សក់ សេដ្ឋា រដ្ឋលេខាធិការក្រសួងមហាផ្ទៃ ជំនួសសម្តេច ស ខេង ជារដ្ឋមន្ត្រី។
សេចក្តីជូនដំណឹង បានឲ្យដឹងថា ការអនុញ្ញាតឲ្យមានការចេញ-ចូលនៅទីស្តីការក្រសួងមហាផ្ទៃ និងការអនុញ្ញាតឲ្យចូលបម្រើការងារឡើយវិញ គឺបន្ទាប់ពីមន្ត្រីរាជការនិងថ្នាក់ដឹកនាំនៃក្រសួងមហាផ្ទៃ ដោយរួមទាំងសម្តេច ស ខេង ផង បានធ្វើតេស្ត៣លើក ហើយលទ្ធផលបង្ហាញថា មិនមានជំងឺកកូវីដ-១៩ និងបន្ទាប់ពីពួកគាត់ បានធ្វើចត្តាឡីស័ករយៈពេល១៤ថ្ងៃរួចមក។
យ៉ាងណា លោក សក់ សេដ្ឋា ដែលចេញសេចក្តីជួនដំណឹងជំនួសសម្តេច ស ខេង បញ្ជាក់ថា លើកលែងតែបុគ្គលបន្តតាមដានត្រួតពិនិត្យសុខភាព [ដែលមិនទាន់ត្រូវបានអនុញ្ញាតឲ្យចេញ-ចូល ឬមិនទាន់អនុញ្ញាតឲ្យចូលបម្រើការងារនៅទីស្តីការក្រសួងមហាផ្ទៃ]។
ជាមួយគ្នានេះ សេចក្តីជូនដំណឹងរបស់លោក សក់ សេដ្ឋា បានណែនាំឲ្យមានការវាស់កម្តៅ ការលាងសម្អាតដៃ ការពាក់ម៉ាស់ និង ការរក្សាគម្លាតសុវត្ថិភាព ជាដើម ពេលចេញ-ចូល ក្នុងបរិវេណទីស្តីការក្រសួងមហាផ្ទៃ។
ថ្នាក់ដឹកនាំ មន្ត្រីរាជការ និង មន្ត្រីនគរបាលនៃក្រសួងមហាផ្ទៃ ត្រូវធ្វើតេស្តរកមេរោគកូវីដ-១៩ និងត្រូវធ្វើចត្តាឡីស័ក១៤ថ្ងៃ ដោយសារតែជាប់ពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា ហើយក្រោយមក សម្តេច ស ខេង ក៏សម្រេចបិទទីស្តីការក្រសួងមួយរយៈខ្លី៕
Tag:
COVID-19
ក្រសួងមហាផ្ទៃ
© រក្សាសិទ្ធិដោយ thmeythmey.com