អាជ្ញាធរថៃ ចាត់វិធានការកាត់បន្ថយផ្សែងពុលក្នុងក្រុងបាងកក ដែលត្រលប់មកជាថ្មី

សង្គមអន្តរជាតិ

អន្តរជាតិ

អាជ្ញាធរថៃ ចាត់វិធានការកាត់បន្ថយផ្សែងពុលក្នុងក្រុងបាងកក ដែលត្រលប់មកជាថ្មី

16, Dec 2020 , 8:29 pm

រូបភាព

ទិដ្ឋភាពផ្សែងហ៊ុមព័ទ្ធអាគារក្នុងទីក្រុងបាងកកនាដើមឆ្នាំ២០២០។ រូបភាព AFP

ដោយ: ធៀន ភារិន្ទ

អាជ្ញាធរក្រុងបាងកក នៅថ្ងៃទី១៥ ខែធ្នូ បានដាក់ចេញវិធានការដើម្បីកាត់បន្ថយផ្សែងពុលនៅក្នុងទីក្រុង ដែលកើតមានសារជាថ្មី។ ផ្សែង ដែលបង្កឲ្យមានផលប៉ះពាល់ដល់សុខភាពរបស់ប្រជាជននេះ បានកើតឡើងនៅតាមតំបន់មួយចំនួនក្នុងទីក្រុងបាងកក។

កម្រិតខ្យល់នៅក្នុងទីក្រុងបាងកក ដែលមានប្រជាជនរស់នៅប្រមាណ១០លាននាក់ បានរងការគំរាមកំហែងជាថ្មីក្នុងរយៈពេលថ្មីៗនេះ។ បញ្ហាផ្សែងពុលនេះ ធ្វើឲ្យប្រជាជនមួយចំនួនក្អក និងមិនអារម្មណ៍មិនល្អជាមួយប្រព័ន្ធដង្ហើម ដែលពេលខ្លះប្រជាជនខ្លួនឯងសង្ស័យថា កើតជំងឺកូវីដ-១៩ ។

«វាប៉ះពាល់ជីវិតប្រចាំថ្ងៃ នៅពេលខ្ញុំដើរទៅខាងក្រៅ ផ្សែងពុលធ្វើឲ្យខ្ញុំមានអារម្មណ៍មិនល្អ និងក្អក ដែលអ្នកខ្លះមើលមកថាខ្ញុំថា កើតកូវីដ-១៩»។ អ្នករស់នៅក្នុងទីក្រុងម្នាក់ឈ្មោះ Sarunya Poungsumdee បានបញ្ជាក់បែបនេះ។

ទាក់ទិននឹងបញ្ហានេះ លោក ប្រាយុទ្ធ ចន្ទអូចា នាយករដ្ឋមន្ត្រីថៃ បានចេញបញ្ជាឲ្យទីភ្នាក់ងារពាក់ព័ន្ធទាំងអស់ ចាត់វិធានការ ប្រឆាំងនឹងខ្យល់កខ្វក់នេះ។ ចំណែកអាជ្ញាធរក្រុងបាងកក បានដាក់ចេញចំណាត់ការមួយចំនួន ដូចជាស្នើឲ្យបិទគម្រោងសំណង់ធំៗ និងបង្កើតកន្លែងត្រួតពិនិត្យដើម្បីពិនិត្យលើការបញ្ចេញឧស្ម័នរបស់រថយន្ត។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។

បើតាមវេបសាយតាមដានកម្រិតខ្យល់លើពិភពលោក Air Quality Index កម្រិតខ្យល់ពុលនៅក្នុងទីក្រុងបាងកក បានហក់ឡើងដល់ជាកម្រិតធ្វើឲ្យប៉ះពាល់សុខភាពអ្នករស់នៅក្នុងទីក្រុង។ យ៉ាងហោចណាស់ សង្កាត់នៅក្នុងក្រុងបាងកកចំនួន ១៣ បានរងផលប៉ះពាល់ពីផ្សែងពុលនេះ។ ក្រៅពីទីក្រុងបាងកក នៅតំបន់ផ្សេងទៀតរបស់ថៃ ក៏ត្រូវបានរកឃើញថា ស្ថិតនៅក្នុងកម្រិតធ្វើឲ្យប៉ះពាល់សុខភាពផងដែរ ក្នុងនោះមានដូចជាខេត្ត Samut Sakhon ជាដើម។

ចំណែកអ្នកនាំពាក្យសាលាក្រុងបាងកកវិញ លោក Pongsakorn Kwanmuang បានបញ្ជាក់ថា រដ្ឋបាលក្រុង បានបញ្ជាឲ្យសាលារៀន ផ្អាកសកម្មភាពមួយចំនួននៅខាងក្រៅ ប្រសិនបើសាលាទាំងនោះ ខ្វះម៉ាស៊ីនបន្សុទ្ធខ្យល់។ ចំណែកក្រសួងការពារជាតិថៃវិញ កំពុងពិនិត្យលើរោងចក្រដែលបញ្ចេញផ្សែងផងដែរ។

នៅក្នុងឆ្នាំ ២០១៩ កន្លងមក ថៃ បានរងគ្រោះដោយសារតែផ្សែងពុលនេះ ស្ទើរតែមួយឆ្នាំពេញ។ ពេលនោះរដ្ឋាភិបាលថៃ បានផ្អាកសំណង់មួយចំនួន កាត់បន្ថយរថយន្តលើដងផ្លូវ និងផ្អាកដំណើរការរបស់រោងចក្រមួយចំនួនជាដើម។ ប៉ុន្តែនៅក្នុងឆ្នាំ២០២០ ដោយសារតែការរាតត្បាតរបស់កូវីដ-១៩ ផ្សែងពុលនេះ ស្ទើរតែមិនមានឡើងនៅក្នុងទីក្រុងបាងកក។

សូមបញ្ជាក់ថា នៅក្នុងផ្សែងពុលនេះ មានផ្ទុកភាគល្អិត PM2.5 ដែលជាតំណក់ទឹកតូចៗ អាចចូលសួត និងប្រព័ន្ធឈាមរបស់មនុស្ស ហើយធ្វើឲ្យប៉ះពាល់សុខភាពអ្នកស្រូបយកខ្លាំង៕