អន្តរជាតិ
NATO៖ សន្ធិសញ្ញាហាមឃាត់នុយក្លេអ៊ែរ នឹងមិនអាចលុបបំបាត់នុយក្លេអ៊ែរបានឡើយ អគ្គលេខាធិការអង្គការណាតូ លោក Jen Stoltenberg។ រូបភាព AFP
× អង្គការ NATO នៅថ្ងៃទី១៥ ធ្នូលើកឡើងថា សន្ធិសញ្ញាហាមឃាត់អាវុធនុយក្លេអ៊ែរ (TPNW) របស់អង្គការសហប្រជាជាតិ នឹងមិនផ្តល់លទ្ធផលអ្វីក្នុងការលុបបំបាត់អាវុធនុយក្លេអ៊ែរឡើយ។ សន្ធិសញ្ញានេះត្រូវបានប្រទេសចំនួន៥០ផ្តល់សច្ចាប័នក្នុងខែតុលា និងចូលជាធរមានក្នុងខែមករា ឆ្នាំ២០២១ ខាងមុខ។
ក្នុងសេចក្តីថ្លែងការណ៍នៃក្រុមប្រឹក្សាអាត្លង់ទិកខាងជើងរបស់ NATO វិធីសាស្ត្រដែលគួរឲ្យទុកចិត្តបានក្នុងការរំសាយអាវុធនុយក្លេអ៊ែរ មានតែសន្ធិសញ្ញាហាមឃាត់ការសាយភាយអាវុធនុយក្លេអ៊ែរ(NPT)ឆ្នាំ១៩៧០ តែប៉ុណ្ណោះ។ ក្រុមប្រឹក្សានេះអះអាង សន្ធិសញ្ញាហាមឃាត់អាវុធនុយក្លេអ៊ែរ(TPNW) ពុំមានយន្តការច្បាស់លាស់ក្នុងការពិនិត្យមើលការអនុវត្តកាតព្វកិច្ចឡើយ។
សន្ធិសញ្ញា TPNW ចងភ្ជាប់កាតព្វកិច្ចដល់ប្រទេសផ្តល់សច្ចាប័ន មិនឲ្យអភិវឌ្ឍ តេស្ត ផលិត កាន់កាប់ ឬស្តុកទុកអាវុធនុយក្លេអ៊ែរ ឬគ្រឿងផ្ទុះនុយក្លេអ៊ែរ ទោះជាស្ថិតក្នុងកាលៈទេសៈណាក៏ដោយ។ បន្ថែមពីនេះ សន្ធិសញ្ញានេះ ក៏ហាមការផ្ទរ ប្រើ ឬគំរាមប្រើអាវុធនុយក្លេអ៊ែរផងដែរ។
ចំពោះការរំសាយអាវុធនុយក្លេអ៊ែរនេះ កាលពីខែវិច្ឆិកាកន្លងទៅ អគ្គលេខាធិការអង្គកា រNATO លោក Jens Stoltenberg ធ្លាប់បានលើកឡើងថា ការបោះបង់ចោលការកំញើញនុយក្លេអែរ (គំរាមប្រើ) ដោយគ្មានការធានាពីភាគីប្រជែង ជាជម្រើសមួយដ៏សែនគ្រោះថ្នាក់។ បើតាមទីភ្នាក់ងារព័ត៌មាន AFP សម្ព័ន្ធ NATO សង្កត់ធ្ងន់ថា សន្ធិសញ្ញា TPNW នឹងធ្វើឲ្យប៉ះពាល់ដល់ការប្រឹងប្រែងសាកលក្នុងការរំសាយអាវុធនុយក្លេអែរ ព្រោះរដ្ឋដែលមានអាវុធនុយក្លេអ៊ែរ ពុំមែនជាហត្ថលេខីឡើយ
សូមបញ្ជាក់ថា តាំងតែពីពេលចាប់ផ្តើមព្រាងសន្ធិសញ្ញានេះមកម្ល៉េះ ប្រទេសមហាអំណាចនុយក្លេអ៊ែរទាំង៥ រួមមានអាមេរិក រុស្ស៊ី ចិន អង់គ្លេស និងបារាំង បានពហិការមិនចូលរួមចចារ។ បន្ថែមពីនេះ ប្រទេសឥណ្ឌា ប៉ាគីស្ថាន កូរ៉េខាងជើង និងអ៊ីស្រាអែល ដែលសុទ្ធតែមានអាវុធនុយក្លេអ៊ែរ ក៏មិនចូលរួមចរចាដែរ។
សន្ធិសញ្ញាTPNW នឹងចូលជាធរមាន នៅថ្ងៃទី២២ មករា ឆ្នាំ២០២១។ យុទ្ធនាការអន្តរជាតិប្រឆាំងអាវុធនុយក្លេអ៊ែរ (ICAN) ជាអ្នកផ្តួចផ្តើមគំនិតក្នុងការកៀងគរបញ្ចុះបញ្ចូលរដ្ឋជាសមាជិកអង្គការសហប្រជាជាតិឲ្យអនុម័តសេចក្តីសម្រេចស្តីពីការបង្កើតសន្ធិសញ្ញានេះ ក្នុងអង្គមហាសន្និបាតកាលពីថ្ងៃខែកក្កដា ឆ្នាំ២០១៧ ដោយមានរដ្ឋចំនួន១២២យល់ព្រម។ ក្នុងខែតុលា ប្រទេសចំនួន៥០បានផ្តល់សច្ចាប័នលើសន្ធិសញ្ញានេះផងដែរ៕
Relate: 96985
© រក្សាសិទ្ធិដោយ thmeythmey.com