អ៊ីស្រាអែលចាប់ផ្តើមយុទ្ធនាការចាក់វ៉ាក់សាំងកូវីដ-១៩ ខណៈករណីឆ្លងមានកើនឡើង

COVID-19

អន្តរជាតិ

អ៊ីស្រាអែលចាប់ផ្តើមយុទ្ធនាការចាក់វ៉ាក់សាំងកូវីដ-១៩ ខណៈករណីឆ្លងមានកើនឡើង

21, Dec 2020 , 9:43 am

រូបភាព

នាយករដ្ឋមន្រ្តីអ៊ីស្រាអែល បេនចាមីន ណេតាន់យ៉ាហ៊ូ ទទួលការចាក់វ៉ាក់សាំងកូវីដ-១៩។ រូបថត AFP

ដោយ៖កង ម៉េងហុង

នៅថ្ងៃទី២០ ខែធ្នូ អ៊ីស្រាអែលបានចាប់ផ្តើមការចាក់វ៉ាក់សាំងកូវីដ-១៩ លើប្រជាជនរបស់ខ្លួន។ ប្រទេសនេះ ប៉ងចាក់វ៉ាក់សាំងលើមនុស្សប្រហែល៦ម៉ឺននាក់ក្នុងមួយថ្ងៃដើម្បីលុបបំបាត់ករណីឆ្លងដែលកំពុងកើនឡើង។

បើតាមទីភ្នាក់ងារព័ត៌មាន AP អ៊ីស្រាអែលនឹងចាក់វ៉ាក់សាំងកូវីដ-១៩ លើបុគ្គលិកសុខាភិបាលរបស់ខ្លួនមុន បន្ទាប់មកប្រជាជនអ៊ីស្រាអែលដែលមានហានិភ័យខ្ពស់ និងអ្នកដែលមានអាយុលើស៦០ឆ្នាំ។ អ៊ីស្រាអែលអះអាងថា ខ្លួនទទួលបានវ៉ាក់សាំងគ្រប់គ្រាន់សម្រាប់ប្រជាជន៩លាននាក់។ វ៉ាក់សាំងដែលត្រូវប្រើ ទិញពីក្រុមហ៊ុនចំនួនពីរមានPfizer និង Moderna ដែលអាជ្ញាធរអាមេរិកបានអនុម័តសម្រាប់ការប្រើប្រាស់ជាបន្ទាន់រួចហើយ។

យ៉ាងណាមិញ ការស្ទង់មតិសាធារណៈបង្ហាញថា ប្រជាជនអ៊ីស្រាអែលជាច្រើន ហាក់ស្ទាក់ស្ទើរក្នុងការទទួលការចាក់វ៉ាក់សាំងភ្លាមៗ។ ជាការលើកទឹកចិត្តប្រជាជន លោកនាយករដ្ឋមន្ត្រី បេនចាមីន ណេតាន់យ៉ាហ៊ូ ក៏ចាក់វ៉ាក់សាំងដំបូងរបស់អ៊ីស្រាអែលនៅថ្ងៃទី១៩ ខែធ្នូ។ មុនទទួលការចាក់នេះ លោកបានបង្ហាញពីទំនុកចិត្តលើវ៉ាក់សាំង និងចាត់ទុកការចាក់វ៉ាក់សាំងពេលនេះជាពេលវេលាដ៏រំភើបមួយដែលនឹងធ្វើឲ្យអ៊ីស្រាអែលស្ថិតនៅលើផ្លូវវិលត្រឡប់ទៅរកសភាពធម្មតាវិញ។

គួរបញ្ជាក់ថា អ៊ីស្រាអែលមានកិច្ចព្រមព្រៀងជាមួយក្រុមហ៊ុន Pfizer ដើម្បីទទួលបានវ៉ាក់សាំងចំនួន ៨ លានដូស ដែលអាចគ្របដណ្តប់ជិតពាក់កណ្តាលនៃប្រជាជនអ៊ីស្រាអែល។ អ៊ីស្រាអែលក៏បានឈានដល់កិច្ចព្រមព្រៀងដាច់ដោយឡែកមួយផ្សេងទៀតជាមួយក្រុមហ៊ុន Moderna កាលពីដើមខែនេះ ដើម្បីទិញវ៉ាក់សាំងរបស់ពួកគេចំនួន៦លានដូស ដែលគ្រប់គ្រាន់សម្រាប់ប្រជាជនអ៊ីស្រាអែល៣លាននាក់ផ្សេងទៀត។

ខណៈករណីឆ្លងនៅមានអត្រាខ្ពស់ មេដឹកនាំអ៊ីស្រាអែល កំពុងតែជជែកគ្នាម្តងទៀតថា តើត្រូវបិទប្រទេសជាលើកទី៣ដែរឬទេ? គិតមកដល់ពេលនេះ អ៊ីស្រាអែលបានរាយការណ៍ថាមានករណីឆ្លងជិត៣៧ម៉ឺននាក់ និងមនុស្សស្លាប់ជាង៣០០០ នាក់ ចាប់តាំងពីមានជំងឺរាតត្បាតបានរាលដាល៕