អ្នកស្រី ប្រាក់ ម៉ានីឡា ត្រូវបាន«WOMEN IN GLOBAL HEALTH» ជ្រើសរើសជាស្ត្រីឆ្នើម ឆ្នាំ២០២០

ជាតិ

អ្នកស្រី ប្រាក់ ម៉ានីឡា ត្រូវបាន«WOMEN IN GLOBAL HEALTH» ជ្រើសរើសជាស្ត្រីឆ្នើម ឆ្នាំ២០២០

21, Dec 2020 , 4:32 pm

រូបភាព

រូបភាពពី សមាគមគិលានុបដ្ឋាកកម្ពុជា

ដោយ: ផាត ដាណេ

ភ្នំពេញ៖ ប្រធានសមាគមគិលានុបដ្ឋាកកម្ពុជា អ្នកស្រី ប្រាក់ ម៉ានីឡា ត្រូវបាន WOMEN IN GLOBAL HEALTH ជ្រើសរើស ជាស្ត្រីឆ្នើមក្នុងចំណោមអ្នកដឹកនាំគិលានុបដ្ឋាក និងឆ្មប ១០០នាក់ នៅលើពិភពលោកសម្រាប់ឆ្នាំ២០២០នេះ។ នេះបើតាមការផ្សាយរបស់សមាគមគិលានុបដ្ឋាកកម្ពុជា។

ក្នុងមុខតំណែងជាប្រធានសហគមគិលានុបដ្ឋាក អ្នកស្រី ប្រាក់ ម៉ានីឡា ក៏ទទួលបានអាហារូបករណ៍ពីក្រុមប្រឹក្សាគិលានុបដ្ឋាកអន្តរជាតិ ទីក្រុងហ្សឺណេវ ក្នុងប្រទេសស្វីស (International Council of Nurses)។ ក្រៅពីនេះ អ្នកស្រី ក៏បានចូលរួមក្នុងវគ្គបណ្ដុះបណ្ដាលថ្នាក់ដឹកនាំគិលានុបដ្ឋាក ដែលអ្នកចូលរួមមកពីបណ្ដាប្រទេសលើពិភពលោក នៅវិទ្យាស្ថានភាពជាអ្នកដឹកនាំគិលានុបដ្ឋាកសកល (Global Nursing Leadership)។

ក្រៅពីការងារជាប្រធានសមាគម និងបានចូលរួមការបណ្ដុះបណ្ដាលលំដាប់ថ្នាក់អន្តរជាតិ អ្នកស្រី ម៉ានីឡា ក៏ជាទីប្រឹក្សាជំនាញនៃការទទួលស្គាល់គុណភាពសេវាសុខាភិបាល នៃទីភ្នាក់ងារគម្រោងលើកកម្ពស់គុណភាពសេវាថែទាំសុខភាព (EQHA) របស់សហរដ្ឋអាមេរិក ដោយអង្គការ FHI360។

អ្នកស្រី ប្រាក់ ម៉ានីឡា ធ្លាប់បានបម្រើការងារជាក្រសួងសុខាភិបាលលើការអភិវឌ្ឍស្តង់ដារអនុវត្តសម្រាប់គិលានុបដ្ឋាក ឆ្នាំ២០១៥ ,ក្រមសីលធម៌សម្រាប់គិលានុបដ្ឋាក ឆ្នាំ២០១៣ ,គោលការណែនាំស្ដីពីរបៀបថែទាំ ឆ្នាំ២០១២ និងពិធីសារថែទាំរបស់គិលានុបដ្ឋាក និងឆ្មប ឆ្នាំ២០១២។

អ្នកស្រី ម៉ានីឡា បានបម្រើការងារនៅមន្ទីរពេទ្យកុមារអង្គរសម្រាប់គម្រោងសំខាន់ៗជាច្រើន ចាប់ពីឆ្នាំ១៩៩៩ រហូតមកដល់ពេលបច្ចុប្បន្ន។ លើសពីនេះ អ្នកស្រី ក៏ទទួលខុសត្រូវក្នុងកម្មវិធីសង្គ្រោះទារក ដែលជាគម្រោងសុខភាពសហគមន៍ នៅខេត្តព្រះវិហារ។

WOMEN IN GLOBAL HEALTH ត្រូវបានបង្កើតឡើងក្នុងឆ្នាំ ២០១៥ ដើម្បីលើកកម្ពស់សមភាពយេនឌ័រ ក្នុងភាពជាអ្នកដឹកនាំសុខភាពពិភពលោក។ សព្វថ្ងៃ WGH គឺជាចលនាសកលមួយដែលមានអ្នកគាំទ្រជាង ២៥០០០ នាក់នៅទូទាំងប្រទេសជាង ៩០ ។ លោកបណ្ឌិត Roopa Dhatt នាយកប្រតិបត្តិនិងក្រុមការងារពិភពលោក បានធ្វើការជាមួយបណ្តាញ WGH នៅគ្រប់តំបន់ ដើម្បីជួយឲ្យមានសមភាពយេនឌ័រ ក្នុងវិស័យសុខាភិបាលដោយប្រមូលផ្តុំក្រុមស្ត្រី ដែលកំពុងលេចធ្លោតាមរយៈការតស៊ូមតិ ដើម្បីសុខភាពពិភពលោកដែលមានស្រាប់។ WOMEN IN GLOBAL HEALTH មានទីស្នាក់កណ្ដាលនៅប្រទេសកូឡុំប៊ី។

បណ្ដាញ WGH នៅក្នុងតំបន់រួមមាន អូស្ត្រាលី ,កាណាដា, ឈីលី, អាហ្វ្រិកខាងកើត, ហ្វាំងឡង់, អាល្លឺម៉ង់, អៀរឡង់, ន័រវែស, ប៉ាគីស្ថាន, ព័រទុយហ្កាល់, សូម៉ាលី, ស៊ុយអែត ,សហរដ្ឋអាមេរិក, កាមេរូន ,ចិន,ឥណ្ឌា,ម៉ាលីវី, នីហ្សេរីយ៉ា, ហ្សំប៊ី, អៀរឡង់, អាហ្វ្រិកខាងត្បូងនិងចក្រភពអង់គ្លេសជាដើម៕