ជាតិ
សេដ្ឋកិច្ច
បារាំងផ្តល់ជាង៩១លានដុល្លារដល់កម្ពុជាសម្រាប់គម្រោងកសិកម្ម និងបម្រែបម្រួលអាកាសធាតុ លោក អូន ព័ន្ធមុនីរ័ត្ន លោកស្រី អេវ៉ា ង្វៀន ប៊ិញ និងលោកស្រី អូហ្វេលី បួរីស ។ រូបថត ទូតបារាំង
× ភ្នំពេញ៖ រដ្ឋាភិបាលបារាំងតាមរយៈទីភ្នាក់ងារអភិវឌ្ឍន៍បារាំង (AFD) ផ្តល់ហិរញ្ញប្បទានចំនួន៧៥លានអឺរ៉ូ (ជាង៩១លានដុល្លារ) ដល់កម្ពុជាសម្រាប់ពង្រឹង និងអភិវឌ្ឍគម្រោងចំនួន២។ នេះបើតាមស្ថានទូតបារាំងប្រចាំកម្ពុជា ដោយគម្រោងទាំង២នោះរួមមាន គម្រោងអភិវឌ្ឍវិស័យកសិកម្ម និងប្រយុទ្ធប្រឆាំងនឹងបម្រែបម្រួលអាកាសធាតុនៅកម្ពុជា។
ទំហំថវិកាសម្រាប់អភិវឌ្ឍកម្មវិធីខាងលើនេះ ត្រូវបានចុះហត្ថលេខា ដោយលោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាមួយលោកស្រី អេវ៉ា ង្វៀន ប៊ិញ ឯកអគ្គរដ្ឋទូតបារាំងប្រចាំកម្ពុជា និងលោកស្រី អូហ្វេលី បួរីស នាយិកាទីភ្នាក់ងារអភិវឌ្ឍន៍បារាំងប្រចាំកម្ពុជា កាលពីថ្ងៃទី២១ធ្នូ ឆ្នាំ២០២០។
ស្ថានទូតបារាំងប្រចាំកម្ពុជា បានបញ្ជាក់ថា គម្រោង Rural Infrastructure Development for Cambodia (RID4CAM) នឹងជួយកែលម្អសេវាមូលដ្ឋានសម្រាប់ប្រជាជននៅតាមជនបទ និងចូលរួមចំណែកតភ្ជាប់តំបន់ដាច់ស្រយាល។ ចំណែកកម្មវិធី កម្មវិធី Agriculture Value Chain Competitiveness and Safety Enhancement (ACSEP) វិញ នឹងបង្កលក្ខណៈងាយស្រួលដល់ពិពិធកម្មវិស័យកសិកម្ម តាមរយៈការគាំទ្រផ្នែកដ៏មានសក្តានុពលទាំងប្រាំរបស់កម្ពុជា ក្នុងនោះមាន គ្រាប់ស្វាយចន្ទី, ផ្លែស្វាយ, ដំឡូងជ្វា បសុបក្សី និងការដាំដំណាំ។
ស្ថានទូតបារាំងប្រចាំកម្ពុជាបានបញ្ជាក់ដូច្នេះ គម្រោងទាំងនេះ នឹងដាក់ឱ្យដំណើរការជាមួយធនាគារ KfW អាល្លឺម៉ង់ និងធនាអភិវឌ្ឍន៍អាស៊ី (ADB)។
កាលពីថ្ងៃទី២៤កក្កដា ឆ្នាំ២០២០ បារាំងបានផ្តល់ជំនួយ១.៧លានដុល្លារ ដល់កម្ពុជា ដើម្បីស្តារឡើងវិញនៅវិស័យទេសចរណ៍ក្រោយវិបត្តិកូវីដ-១៩(COVID-19)។ បារាំងបានផ្តល់ជំនួយឱ្យកម្ពុជា ចាប់តាំងពីឆ្នាំ១៩៩៣មកដល់បច្ចុប្បន្ន ដោយជំនួយភាគីច្រើន ផ្តោតទៅលើវិស័យកសិកម្មនិងកសិឧស្សាហកម្ម, ហេរដ្ឋារចនាសម្ព័ន្ធ, ការទ្រទ្រង់វិស័យផលិតកម្ម និងការបណ្តុះបណ្តាលវិជ្ជាជីវ: (ក្នុងវិស័យវាយនភណ្ឌ និងទេសចរណ៍)៕
© រក្សាសិទ្ធិដោយ thmeythmey.com