ដោយ៖ ប៉ូ សុភា
ភ្នំពេញ៖ ត្រីប្រហុកឆ្នាំនេះ មានតម្លៃខ្ពស់ជាងឆ្នាំមុន ស្របពេលពលរដ្ឋនាំគ្នាសម្រុកទិញត្រីនេះ។ ពលរដ្ឋខ្លះ ទិញត្រីប្រហុកបានតិច និងច្រើនទៅតាមលទ្ធភាពខ្លួន ខណៈត្រីឆ្នាំនេះហាក់មិនសូវសម្បូរ ដើម្បីផ្គត់ផ្គង់តម្រូវការពលរដ្ឋ។
មានមាឌតូច កម្ពស់ប្រហែល ១,៦០សម បុរសវ័យកណ្ដាលម្នាក់ បាននាំប្រពន្ធ និងកូនស្រីវ័យ១៧ឆ្នាំ មកពីខេត្តតាកែវ ដើម្បីប្រមូលទិញត្រី យកទៅធ្វើផ្អក និងប្រហុក សម្រាប់ទុក្ខបរិភោគខ្លះ និងលក់ខ្លះ។ ស្ថិតនៅសង្កាត់ច្រាំងចំរេះ ខណ្ឌឬស្សីកែវ រាជធានីភ្នំពេញ បុរសសម្បុរស្រអែមរូបនេះ បានទិញត្រីប្រហុក១តោន ច្រកការុងជាស្រេចហើយ ដើម្បីលើកដាក់ឡាន យកទៅស្រុកកំណើតវិញ។
ត្រី១តោន ក្នុងការុងនេះ លោក ម៉ៃ ពៅ ត្រូវចំណាយថវិកាអស់៤លានរៀល។ បើតាមលោក ពៅ ត្រីប្រហុកឆ្នាំនេះ មានតម្លៃខ្ពស់ជាងឆ្នាំមុនទ្វេដង។ មានស្រុកកំណើតនៅភូមិប្របសៀម ឃុំឧត្តមសូរិយា ស្រុកត្រាំកក់ ខេត្តតាកែវ បុរសវ័យ៤៤ឆ្នាំរូបនេះ បានប្រាប់សារព័ត៌មានថ្មីៗ ដូច្នេះថា៖« ត្រីធ្វើប្រហុកឆ្នាំនេះ ខ្ញុំទិញក្នុងតម្លៃ ១គីឡូ ៥,០០០រៀល ទៅ៥,៥០០រៀល។ គិតទៅត្រឹមត្រី១តោនសោះ ខ្ញុំចំណាយអស់ជាង ១ពាន់ដុល្លាទៅហើយ។ ឆ្នាំនេះមើលទៅខ្ញុំទិញបានត្រឹម៧ -៨ការុងប៉ុណ្ណឹងទេ ព្រោះអស់លុយហើយ។ ខ្ញុំទិញឆ្នាំមុន១គីឡូត្រឹមតែ ២៥០០រៀលទៅ ៣០០០រៀល តែឆ្នាំនេះឡើងពាក់កណ្ដាល »។
លោក ម៉ៃ ពៅ មកពីខេត្តតាកែវ វ័យ ៤៤ឆ្នាំ
ឈរសម្លឹងទៅការុងដាក់ត្រីប្រហុក ក្រោមកម្ដៅព្រះអាទិត្យ នាម៉ោង១២ថ្ងៃត្រង់នេះ លោក ពៅ ឆ្លៀតរៀបរាប់បែបរអ៊ូថា ឆ្នាំនេះ ត្រីប្រហុកឡើងថ្លៃ ស្របពេលជំងឺកូវីដ-១៩ កំពុងរាតត្បាតទៀត។ «ជាអ្នកស្រុកស្រែដូចខ្ញុំ បើអត់អ្វី អត់បាន តែបើអត់អង្ករ និងប្រហុក គឺអត់មិនបានទេ ព្រោះនេះជារបស់ចាំបាច់នៅក្នុងគ្រួសាររបស់ខ្ញុំ។ ទោះជាត្រី ឡើងថ្លៃក៏ត្រូវតែទិញ ព្រោះបើធ្វើមិនបានលក់ ក៏បានត្រឹមហូបសម្រាប់គ្រួសាររបស់ខ្ញុំដែរ »។ នេះជាការបញ្ជាក់របស់បុរសមកពីខេត្តតាកែវ។
ពលរដ្ឋមកកពីបណ្ដាខេត្ត មកធ្វើត្រីប្រហុកនៅក្នុងគីឡូម៉ែតលេខ៩ ខណ្ឌឬស្សីកែវបាននិយាយថា ឆ្នាំនេះត្រីធ្វើប្រហុកឡើងថ្លៃខ្លាំង អាចនឹងធ្វើឱ្យចំនួននៃការធ្វើប្រហុកមានការថយចុះ ហើយតម្លៃប្រហុកក្នុងទីផ្សារអាចមានតម្លៃថ្លៃជាងឆ្នាំមុនមួយគុណ នឹងពីរ ឬនឹងបី។ ពួកគាត់ថានេះជាឆ្នាំមួយហើយដែលត្រីធ្វើប្រហុកថ្លៃបែបនេះ។
ដៃម្ខាងរើសកម្ទេចស្មៅចេញពីត្រី ដៃម្ខាងលូកយកអំបិលលាយត្រីធ្វើប្រហុកនេះ លោកយាយ មីង នឹម វ័យ៧០ឆ្នាំ បានមកប្រមូលទិញត្រីប្រហុក នៅតំបន់ច្រាំងចំរេះបីថ្ងៃហើយ ក្រោយពីទទួលបានដំណឹងថា រដូវត្រីប្រហុក ចាប់ផ្ដើមមកដល់ពីថ្ងៃទី២០ ដល់២៦ ធ្នូនេះ។ ៣ថ្ងៃមកនេះ លោកយាយ នឹម ទើបតែទិញបានត្រីធ្វើប្រហុកបានជាង ២៥០គីឡូប៉ុណ្ណោះ ។ អ្នកស្រីទទួលស្គាល់ថា ត្រីធ្វើប្រហុកក្នុងឆ្នាំនេះ ពិតជាឡើងថ្លៃខ្ពស់ជាងឆ្នាំមុនខ្លាំងណាស់។
មានស្រុកកំណើតនៅឃុំគុស ស្រុកត្រាំកក់ ខេត្តតាកែវ ស្ត្រីចំណាស់រូបនេះ បាននិយាយថា៖« មើលទៅទិញមិនបានត្រី១តោនទេ បើត្រីគិតតែពីឡើងថ្លៃដូចជាទ្រនិចនាឡិកាយ៉ាងហ្នឹង។
មួយម៉ោងមុន ខ្ញុំទិញបានតម្លៃ៦៥០០រៀល (ស្រាប់តែខ្ញុំ)អង្គុយលាយអំបិលត្រីនៅទីនេះ មិនទាន់បានមួយម៉ោងត្រឹមត្រូវផង ត្រីឡើងថ្លៃ៧០០០ពាន់ ទៅ៧២០០រៀលហើយ» ។
អ្នកស្រី មីង នឹម មានវ័យ៧០ឆ្នាំ មកពីស្រុកត្រាំកក់ ខេត្តតាកែវ
បើតាមការសន្និដ្ឋានរបស់លោកយាយ នឹម រាល់ពេលតម្លៃត្រីប្រហុកខ្ពស់បែបនេះ វានឹងធ្វើឲ្យតម្លៃប្រហុកនៅលើទីផ្សារឡើងខ្ពស់ដូចគ្នា។« ត្រីធ្លាប់តែទិញបានក្នុងតម្លៃថោក តែឆ្នាំនេះឡើងដល់ជាងពាក់កណ្ដាលពួកខ្ញុំគ្មានលុយឯណា ត្រៀមច្រើនដើម្បីទិញទេ មានតែបានប៉ុន្មានយកប៉ុណ្ណឹង។ បើឆ្នាំមុន ខ្ញុំធ្វើបាន១០ពាង តែឆ្នាំនេះធ្វើបានត្រឹម៥ពាង។ ហើយប្រហុកក្នុងឆ្នាំមុន គេលក់បានតម្លៃ១៨០០០រៀល ឆ្នាំនេះយ៉ាងតិចក៏គេលក់ មិនក្រោមតម្លៃ៣០០០០រៀលដែរ»។ នេះជាការបញ្ជាក់របស់ អ្នកស្រី នឹម ។
មិនមែនតែប្រជាកសិករមកពីខេត្តតាកែវទេ ពលរដ្ឋនៅខេត្តកំពង់ស្ពឺ ព្រែវែង ស្វាយរៀង និងខេត្តមួយចំនួនក៏បានធ្វើដំណើរមកសង្កាត់ច្រាំងចំរេះ ខណ្ឌឬស្សីកែវ រាជធានីភ្នំពេញ ដើម្បីប្រមូលទិញត្រី យកទៅធ្វើផ្អក និងប្រហុក សម្រាប់ទុក្ខបរិភោគ និងលក់ផងដែរ។
សកម្មភាពផ្សេងៗ របស់ពលរដ្ឋមកពីបណ្ដាខេត្តនានា មករង់ចាំទិញត្រីធ្វើប្រហុក នៅគីឡូម៉ែតលេខ៩ ខណ្ឌឬស្សីកែវ ក្រុងភ្នំពេញ
អង្គុយក្នុងរោងជិតមាត់ទឹក នៅកន្លែងកាត់ត្រីប្រហុក ក្នុងខណ្ឌឬស្សកែវ លោក សុខ ចាន់ឌី និងគ្រួសារ បាននាំគ្នាមកទិញត្រី យកធ្វើប្រហុកលក់ ជារៀងរាល់ឆ្នាំ។ គ្រួសារលោក ចាន់ឌី តែងតែនាំគ្នាមកធ្វើត្រីប្រហុកនៅទីនេះ បានយ៉ាង២ទៅ៣តោនដែរក្នុងមួយឆ្នាំ។ ប៉ុន្តែឆ្នាំនេះ លោកធ្វើប្រហុកបានត្រឹម១តោនប៉ុណ្ណោះ។ « ខ្ញុំកំពុងរៀបចំលើកត្រីប្រហុកទៅផ្ទះ ឈប់ទិញហើយព្រោះបើតាមការសង្កេតមើលរបស់ខ្ញុំតម្លៃត្រីមិនចុះថ្លៃទេ មានតែឡើងបន្ត ពេលនេះពួកខ្ញុំត្រូវប្រមូលរបស់របរត្រលប់ទៅស្រុកវិញហើយ ព្រោះលុយត្រៀមទិញត្រី ២ ទៅ៣តោន ឥលូវទិញបានជាង១តោនអស់លុយហើយ»។ នេះជាសម្តីរបស់លោក សុខ ចាន់ឌី មកពីភូមិធ្លក ឃុំធ្លក ស្រុកស្វាយជ្រុម ខេត្តស្វាយរៀង។
បើតាមបុរសវ័យ៣៥ឆ្នាំ ដែលប្រកបរបរធ្វើប្រហុកលក់នេះ តម្លៃប្រហុកឆ្នាំនេះ នឹងឡើងថ្លៃ ដោយសារតែតម្លៃដើមខ្ពស់ដែរ។ លោក ចាន់ឌី បានបញ្ជាក់ថា៖ « ត្រីបើទិញបានតិចហើយថ្លៃយ៉ាងនេះ ពេលលក់ប្រហុកចេញវិញក៏ថ្លៃដែរ។ ខ្ញុំទិញត្រីស្រស់មួយគីឡូជាង៦០០០រៀលទៅហើយ បូកទាំងថ្លៃឈ្នួលទៀតមិនតិចទេ ដូច្នេះខ្ញុំគិតថា ពេលលក់ចេញក៏តម្លៃថ្លៃគួរសម្យដែរ។ ខ្ញុំមិនសូវបារម្ភទេ បើទិញត្រីមកថ្លៃ ប្រហុករបស់យើងលក់ចេញក៏បានថ្លៃដូចគ្នា»។
គំនរត្រីស្រស់ កាត់ក្បាលហើយ ត្រៀមលាយអំបិលធ្វើប្រហុក នៅគីឡូម៉ែតលេខ៩ ក្នុងខណ្ឌឬស្សីកែវ (២១.១២.២០២០)
ប្រជាពលរដ្ឋ ដែលនាំគ្នាមកប្រមូលទិញត្រីប្រហុក នៅក្នុងសង្កាត់ច្រាំងចំរះ១ ខណ្ឌឬស្សីកែវ រាជធានីភ្នំពេញ ទិញបានគ្រប់ៗគ្នា ដោយគ្រាន់តែអ្នកខ្លះទិញបានតិច និងច្រើនប៉ុណ្ណោះ ។
បើតាមមន្ត្រីជលផល ប្រចាំការនៅដាយ ៤អេ ប្រាប់សារព័ត៌មានThmeyThmey បានបញ្ជាក់ថា៖ « ពួកគាត់ជាមន្ត្រីជលផលមិនទាន់អាចបញ្ជាក់បានពីតម្លៃទីផ្សាររបស់ត្រីធ្វើប្រហុកនៅឡើយ ព្រោះឆ្នាំនេះ ពួកយើងមិនទាន់ សង្មត់ថាត្រីសម្បូរ ឬខ្សត់ជាងឆ្នាំមុន ឬយ៉ាងណាទេ។ ប៉ុន្តែបើតាមការង្កេត ត្រីប្រហុក នៅបរិមាណមធ្យមនៅឡើយ (នេះបើគិតត្រឹមព្រឹកថ្ងៃទី២១ ខែឆ្នូ ) តែនៅថ្ងៃបន្ទាប់ ត្រីអាចសម្បូរជាងនេះ ដូចនេះតម្លៃត្រី អាច(ឡើង-ចុះ)តាមនេះដែរ » ។
ពលរដ្ឋឈរចាំទិញត្រីប្រហុកពីឈ្មួញ នៅក្នុងខណ្ឌឬស្សីកែវ
រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១៧ ខែធ្នូ ឆ្នាំ២០២០ បានចេញសេចក្តីជូនដំណឹងស្តីពី ការធ្វើប្រហុក ផ្អក ត្រីឆ្អើរ ចាប់ពីថ្ងៃទី ២០ ខែធ្នូ រហូតដល់ ថ្ងៃទី២៦ ខែធ្នូ ឆ្នាំ២០២០ខាងមុខនេះ។ក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ប្រសិនបើផ្ទៃមេឃស្រឡះល្អ និងគ្មានភ្លៀងកក់ខែទេនោះ ប្រជានេសាទ នឹងអាចនេសាទត្រី ក្នុងភូមិសាស្ត្ររាជធានីភ្នំពេញ និងខេត្តកណ្ដាល ដើម្បីធ្វើប្រហុក ផ្អក ត្រីឆ្អើរ នៅអំឡុង៦ថ្ងៃនេះ៕
ការុង ច្រកត្រីប្រហុករបស់ពលរដ្ឋមកពីខេត្តតាកែវ រងចាំឡានឈ្នួលមកដឹក នៅក្នុងខណ្ឌឬស្សីកែវ (២១.១២.២០២០)