(ភ្នំពេញ) ថ្ងៃទី២៣ ខែធ្នូ ឆ្នាំ២០២០ ៖ វគ្គបណ្តុះបណ្តាល Samsung Tech Institute ជំនាន់ទី2 ដែលបង្កើតឡើងដោយក្រុមហ៊ុន សាមសុង និងវិទ្យាស្ថានជាតិបណ្តុះបណ្តាលបច្ចេកទេស (NTTI) បានចប់សព្វគ្រប់ដោយជោគជ័យជាស្ថាពរហើយ។ វគ្គបណ្តុះបណ្តាលនេះ បានចាប់ផ្តើមកាលពីថ្ងៃទី ៥ ខែកញ្ញា ឆ្នាំ២០២០ និងមានរយៈពេល៩ សប្តាហ៍ លើមុខជំនាញ៖ ជួសជុលបរិក្ខារអេឡិចត្រូនិច (CE) និងស្មាតហ្វូន (IM) ។
សូមបញ្ជាក់ថា កម្មវិធីបណ្តុះបណ្តាល Samsung Tech Institute ដែលបានបង្កើតឡើងមកនេះ គឺមានសិក្ខាកាមចូលរួមចំនួន ៥០រូប ហើយវគ្គបណ្តុះបណ្តាលនេះ គឺពិតជាមានសារៈសំខាន់ខ្លាំងណាស់ក្នុងការអភិវឌ្ឍន៍ សមត្ថភាព ចំណេះ ជំនាញ និងទេព្យកោសល្យ ដល់សិក្ខាកាមជំនាន់ក្រោយជាពិសេសផ្តល់ឱកាសការងារឱ្យមានភាពកាន់តែទូលំទូលាយដល់សិស្សនិស្សិតកម្ពុជាទាំងមូលផងដែរ។
លោក សឹងហូរ ឆយ (Mr. Seungho Choi) អគ្គនាយកសាខា ក្រុមហ៊ុនថៃ សាមសុង អេឡិចត្រូនិក ប្រចាំប្រទេសកម្ពុជា បានមានប្រសាសន៍ថា៖«វគ្គបណ្តុះបណ្តាល Samsung Tech Institute គឺពិតជាដើរតួយ៉ាងសំខាន់បំផុតក្នុងការបង្កើតធនធានមនុស្សផ្នែកអេឡិចត្រូនិកនៅក្នុង ប្រទេសកម្ពុជា ដោយផ្តល់នូវចំណេះដឹងច្បាស់លាស់ អមជាមួយទ្រឹស្តី និងការអនុវត្តផ្ទាល់ ជាមួយនឹងផលិតផលអេឡិចត្រូនិកទំនើបៗថ្មីៗ របស់ក្រុមហ៊ុន សាមសុង ដែលកំពុងត្រូវបានប្រើប្រាស់ និងគាំទ្រជុំវិញពិភពលោក»។
លោកបានបន្ថែមទៀតថា ៖«សាមសុង តែងតែផ្តល់តម្លៃខ្ពស់បំផុត ក្នុងការចូលរួមចំណែកអភិវឌ្ឍសង្គម សហគមន៍ និងពិភពលោកទាំងមូល ឱ្យមានភាពកាន់តែងាយស្រួល និងប្រសើរឡើង។ អ្វីដែលយើងចង់បានបំផុតនោះ គឺសូមឱ្យសិក្ខាកាម ដែលបានបញ្ចប់ការសិក្សាពីវគ្គបណ្តុះបណ្តាលនេះទាំងអស់ អាចប្រើប្រាស់ជំនាញ ចំណេះដឹងរបស់ខ្លួនដើម្បីស្វែងរកការងារល្អ ជាមួយប្រាក់ខែខ្ពស់ ដើម្បីផ្គត់ផ្គង់ក្រុមគ្រួសារ និងចូលរួមក្នុងការអភិវឌ្ឍន៍សង្គមជាតិទាំងមូលផងដែរ»។
ឆ្លៀតក្នុងឱកាសបិទវគ្គបណ្តុះបណ្តាលនោះ លោក យ៉ោក សុទ្ធី នាយកវិទ្យាស្ថានជាតិបណ្តុះបណ្តាលបច្ចេកទេស ក៏បានកោតសរសើរ និងរីករាយក្រៃលែង ចំពោះការយកចិត្តទុកដាក់ និងការលះបង់ដែលមានតម្លៃមិនអាចកាត់ថ្លៃបាន របស់ក្រុមហ៊ុន សាមសុង ក្នុងការចូលរួមលើកកម្ពស់វិស័យបច្ចេកវិទ្យា ក៏ដូចជាវិស័យធនធានមនុស្សនៅក្នុងប្រទេសកម្ពុជា។
យុវជន ដួង ពៅរ៉ាដា ជាសិស្សម្នាក់ក្នុងចំណោមសិស្សទាំងអស់ដែលបានបញ្ចប់វគ្គបណ្តុះបណ្តាល Samsung Tech Institute នេះបានឱ្យដឹងថា៖«វគ្គសិក្សាផ្នែកបច្ចេកវិទ្យា និងអេឡិចត្រូនិកជាមួយនឹងបរិក្ខារទំនើបៗផ្ទាល់ ដែលក្រុមហ៊ុន សាមសុង ផ្តល់ជូនបែបនេះគឺពិតជាមានតម្លៃណាស់។ ដូច្នេះខ្ញុំត្រូវតែចាប់យកឱកាសនេះឱ្យជាប់ ដើម្បីឈោងចាប់យកការងារដែលពាក់ព័ន្ធទៅនឹងផ្នែកបច្ចេកវិទ្យា និងគ្រឿងបរិក្ខារអេឡិចត្រូនិកសម្រាប់ថ្ងៃអនាគតឱ្យបាន»។
សូមបញ្ជាក់ថា ក្រុមហ៊ុន សាមសុង ក៏បានផ្តល់ឱកាសការងារដល់សិក្ខាកាមឆ្នើម និងមានពិន្ទុខ្ពស់ជាងគេ ចំនួន ៤រូប ផងដែរ ដើម្បីចុះហាត់ការដោយផ្ទាល់ នៅក្រុមហ៊ុន សាមសុង ដោយទទួលបានអត្ថប្រយោជន៍ និងប្រាក់បៀរវត្សបន្ថែមផងដែរ។
លោក តេង សុភាព ដែលជាសាស្ត្រាចារ្យម្នាក់ ក្នុងចំណោមសាស្ត្រាចារ្យនៃវគ្គបណ្តុះបណ្តាល Samsung Tech Institute បានសម្តែងអារម្មណ៍ផ្ទាល់ខ្លួនថា៖«ខ្ញុំសូមអរគុណ និងសរសើរដល់ការជួយឧបត្ថម្ភ និងការលះបង់ដោយឥតនឿយហត់ របស់ក្រុមហ៊ុន សាមសុង។ ខ្លួនខ្ញុំផ្ទាល់ ក៏ខិតខំប្រឹងប្រែងបង្ហាត់បង្ហាញបង្រៀន និងណែនាំឱ្យអស់ពីសមត្ថភាពផងដែរ ដើម្បីធ្វើឱ្យសិក្ខាកាមទាំងអស់ទទួលបានចំណេះ ជំនាញ និងបទពិសោធន៍ច្បាស់លាស់ពោរពេញដោយទំនុកចិត្ត និងមានការងារធ្វើជាមួយនឹងប្រាក់ខែខ្ពស់»។
ក្រុមហ៊ុន សាមសុង កម្ពុជា ក៏បានថ្លែងអំណរគុណផងដែរដល់ លោកគ្រូ អ្នកគ្រូ សាស្ត្រាចារ្យ និងគណៈគ្រប់គ្រងទាំងអស់ នៃវិទ្យាស្ថានជាតិបណ្តុះបណ្តាលបច្ចេកទេស (NTTI) ដែលបានធ្វើឱ្យវគ្គសិក្សានេះ ចេញជាផ្លែផ្កា និងបញ្ចប់ដោយជោគជ័យ។ ជាចុងក្រោយ សាមសុង កម្ពុជា សូមឱ្យសិក្ខាកាមទាំងអស់ យកចិត្តទុកដាក់ថែរក្សាសុខភាពឱ្យបានល្អ ដោយលាងដៃញឹកញាប់ ពាក់ម៉ាស់ឱ្យបានត្រឹមត្រូវ និងអនុវត្តតាមគោលការណ៍សុវត្ថិភាព របស់ក្រសួងសុខាភិបាល ដើម្បីទប់ស្កាត់ប្រឆាំងនឹងការរីករាលដាលជំងឺ Covid-19 ទាំងអស់គ្នាផងដែរ៕
(អត្ថបទពាណិជ្ជកម្ម)