កម្មវិធីលើកកម្ពស់អនាម័យជនបទក្នុងប្រទេសកម្ពុជា បានអនុវត្តនៅក្នុងខេត្តចំនួន៦ ក្នុងដំណាក់កាលទី១ កាលពីឆ្នាំ២០១១ រហូតដល់ឆ្នាំ២០១៤ កម្មវិធីនេះបានពង្រីកដល់ខេត្តចំនួន៥ ផ្សេងទៀត។ បច្ចុប្បន្នមនុស្សជាង ១,៥ លាននាក់ រួមទាំងស្រ្តី កុមារី និងជនពិការបានទទួលអត្ថប្រយោជន៍ពីកម្មវិធីនេះ តាមរយៈការទទួលបានគ្រឿងបរិក្ខារ និងសេវាកម្មអនាម័យប្រសើរឡើង។
 

តាមរយៈរបាយការណ៍ដែលបង្ហាញកាលពីថ្ងៃទី២៥ ខែធ្នូ អង្គការភ្លេនអន្តរជាតិកម្ពុជា (Plan International Cambodia) បានបង្ហាញពីមោទកភាពដែលបានឃើញ ១,៦៤០ភូមិ ៨៨ឃុំ និង៦ស្រុក  ដែលបានចូលរួមចំណែកប្រមាណ៦០ភារយ នៃភូមិដែលបានប្រកាសបញ្ឈប់ការបន្ទោរបង់ពាសវាលពាសកាលទាំងស្រុងរហូតមកដល់ពេលនេះ។

 

កម្មវិធីលើកកម្ពស់អនាម័យជនបទនៅកម្ពុជា បង្កើតឡើងក្នុងគោលបំណង លើកកម្ពស់ការអនុវត្តប្រកបដោយនិរន្តភាពនៃការប្រើប្រាស់បង្គន់អនាម័យ ការលាងដៃជាមួយសាប៊ូ និងផឹកទឹកដែលមានសុវត្ថិភាពនៅក្នុងសហគមន៍ជនបទ និងអភិវឌ្ឈ រួមទាំងពង្រីកសមត្ថភាព អាជ្ញាធរមូលដ្ឋាន និងអង្គការរដ្ឋាភិបាលក្នុងស្រុកក្នុងការលើកកម្ពស់អនាម័យឲ្យល្អ។

លើសពីនេះ ខណៈពេលកម្ពុជាមានជំងឺកូវីដ១៩ កម្មវិធីនេះបានចូលរួមយ៉ាងជិតស្និតជាមួយក្រសួងអភិវឌ្ឈន៍ជនបទ មន្ទីរអភិវឌ្ឈន៍ជនបទខេត្ត ដៃគូអនុវត្ត និងអាជ្ញាធរមូលដ្ឋានក្នុងការផ្គត់ផ្គង់សំភារៈចាំបាច់ដូចជា សាប៊ូ អាល់កុល ទឹកលាងដៃសម្លាប់មេរោគ សំឡីអនាម័យ និងដំឡើងស្ថានីយលាងដៃតាមសាធារណៈ៕