ទៅលេងស្រុកកណ្តៀង កុំភ្លេចភ្លក់រសជាតិនំបញ្ចុកផាកឡូវរបស់អ្នកស្រី ទូច ជៀវលីង!

ជាតិ

ទៅលេងស្រុកកណ្តៀង កុំភ្លេចភ្លក់រសជាតិនំបញ្ចុកផាកឡូវរបស់អ្នកស្រី ទូច ជៀវលីង!

02, Jan 2021 , 7:29 pm

រូបភាព

ដោយ: ផាត ដាណេ

ពោធិ៍សាត់៖ នំបញ្ចុកផាកឡូវ ជាគំនិតអាជីវកម្មរបស់អ្នកស្រី ទូច ជៀវលីង តាំងពីប្រមាណ៣០ឆ្នាំមុនម្ល៉េះ ហើយសព្វថ្ងៃអ្នកស្រីនៅតែបន្តរបរមួយមុខនេះ មិនផ្លាស់ប្តូរឡើយ។ មានទីតាំងស្ថិតក្នុងភូមិក្បាលហុង ឃុំវាល ស្រុកកណ្ដៀង ខេត្តពោធិ៍សាត់ ទីតាំងលក់នំបញ្ចុកផាកឡូវរបស់អ្នកស្រី ជៀវលីង ទទួលបានការនិយមខ្លាំងពីពលរដ្ឋ និងអ្នកទេសចរ។ រសជាតិថ្មី ប្លែក នៃនំបញ្ចុកផាកឡូវរបស់អ្នកភូមិក្បាលហុងរូបនេះ បានទាក់ចិត្តភ្ញៀវជាច្រើន ហើយថ្ងៃខ្លះ អ្នកស្រី ទូច ជៀវលីង អាចលក់អស់នំបញ្ចុកដល់ទៅ៥០គីឡូក្រាមផងក៏មាន។

ដើម្បីជ្រាបច្បាស់ សូមអញ្ជើញលោកអ្នកនាង ទស្សនាកិច្ចសម្ភាសរវាង កញ្ញា ផាត ដាណេ នៃសារព័ត៌មាន Thmeythmey25 និងអ្នកស្រី ទូច ជៀវលីង ដូចតទៅ៖

អ្នកស្រី ទូច ជៀវលីង ជាលក់នំបញ្ចុកផាកឡូវ ជាង៣០ឆ្នាំហើយ នៅភូមិក្បាលហុង ឃុំវាល ស្រុកកណ្ដៀង ខេត្តពោធិ៍សាត់។ នំបញ្ចុកផាកឡូវ ដែលអ្នកស្រី ជៀវលីង បានច្នៃប្រឌិតដោយខ្លួនឯងនេះមិនស្រូបទឹកសម្លរប្រហើរ ឬសម្លរការី ដែលអ្នកធ្លាប់ទទួលទានជាទូទៅនោះទេ ពោលគឺគ្រឿងផ្សំចម្បងគឺនំបញ្ចុក,សាច់ផាកឡូវ,ជ្រក់ល្ហុង, ទឹកផាកឡូវ និងល្បោយនំបញ្ចុកផ្សេងទៀតដូចជាសណ្ដែកបណ្ដុះ,តាសក់ និងជីគ្រប់មុខ។

រសជាតិឆ្ងាញ់ ប្លែក របស់នំបញ្ចុកផាកឡូវរបស់ ស្ត្រីរូបនេះ បានធ្វើឲ្យអតិថិជននៅតំបន់នោះ និងអ្នកដំណើរឆ្លងកាត់ចូលភ្លក់មិនសូវដាច់នោះឡើយ។ បើតាមអ្នកស្រី ទូច ជៀវលីង ជាទូទៅអ្នកស្រី យកនំបញ្ចុក៥០គីឡូក្រាមមកលក់ ជាមួយនឹងសាច់យកធ្វើផាកឡូវ៣០គីឡូក្រាម។ អ្នកស្រី អះអាងទៀតថា ថ្ងៃដែលលក់ដាច់ខ្លាំង អាចលក់អស់លើសនំបញ្ចុក៥០គីឡូក្រាមដែលទទួលយកមកលក់ជាប្រចាំថ្ងៃនេះទៀត ប៉ុន្តែក៏មានថ្ងៃខ្លះ លក់មិនអស់ដែរ។ អ្នកស្រី ចាប់ផ្តើមលក់នំបញ្ចុកផាកឡូវ ចាប់ពីម៉ោង២ថ្ងៃ ដល់ម៉ោង៧យប់ ហើយក្នុងមួយចានតម្លៃពី៥ពាន់រៀល ទៅ៨ពាន់រៀល។

ទោះជារបរនេះបានផ្តល់ប្រាក់ចំណូលសមរម្យ ហើយក៏មានអតិថិជនគាំទ្រច្រើនយ៉ាងណាក្តី ក៏អ្នកស្រី ជៀវលីង គ្មានបំណងពង្រីករបរនេះបន្ថែមទៀតដែរ ព្រោះតែង្នកស្រីមានវ័យកាន់តែច្រើនទៅហើយ និងម្យ៉ាងទៀតអ្នកស្រីសង្កត់ធ្ងន់ថា របរនេះហត់នឿយ រវល់ពីព្រលឹមទល់ព្រលប់មិនមានពេលសម្រាកនោះទេ៕