អន្តរជាតិ
អ្នកស្លាប់ក្នុងគ្រោះថ្នាក់ធ្លាក់យន្តហោះកើនឡើងនៅឆ្នាំ២០២០ ទោះចំនួនឧប្បត្តិហេតុធ្លាក់ចុះ
បំណែកយន្តហោះអ៊ុយក្រែនដែលត្រូវយោធាអ៊ីរ៉ង់បាញ់ទម្លាក់ក្នុងខែមករា ឆ្នាំ២០២០ ។ រូបថត Xinhua
×![]()
ដោយ: តន ចាន់រិទ្ធារ៉ា
ចំនួនអ្នកស្លាប់ក្នុងគ្រោះថ្នាក់ធ្លាក់យន្តហោះនៅឆ្នាំ២០២០ បានកើនឡើង ទោះជាចំនួនយន្តហោះធ្លាក់បានថយចុះជាងពាក់កណ្ដាលធៀបនឹងឆ្នាំ២០១៩ ក្ដី។ នេះបើតាមរបាយការណ៍របស់ក្រុមហ៊ុនហូឡង់ដែលបូកសរុបទិន្នន័យគ្រោះថ្នាក់ផ្លូវអាកាសប្រចាំឆ្នាំ២០២០ ។ 
ក្នុងរបាយការណ៍របស់ក្រុមហ៊ុនប្រឹក្សាយោបល់របស់ហូឡង់ To70 ឆ្នាំ២០២០ មានគ្រោះថ្នាក់ធ្លាក់យន្តហោះពាណិជ្ជកម្មធុនធំចំនួន៤០ករណី ដែលក្នុងនោះមាន៥ករណីបង្កគ្រោះថ្នាក់ដល់អាយុជីវិត។ មនុស្ស២៩៩នាក់ បានស្លាប់ ខណៈនៅឆ្នាំ២០១៩ មានគ្រោះថ្នាក់ធ្លាក់យន្តហោះ៨៦លើក សម្លាប់មនុស្ស២៥៧នាក់។
បើតាមទីភ្នាក់ងារព័ត៌មាន Reuters យន្តហោះដឹកអ្នកដំណើរខ្នាតធំ មានអត្រាគ្រោះថ្នាក់មួយលើករៀងរាល់៣.៧លានជើងហោះហើរក្នុងឆ្នាំ២០២០ ហើយមានអត្រាគ្រោះថ្នាក់ដល់ជីវិត០.២៧ ដែលកើនឡើងបន្តិចធៀបនឹងឆ្នាំ២០១៩ ដែលមានអត្រាគ្រោះថ្នាក់ដល់ជីវិត០.១៨ ក្នុងចំណោមជើងហោះហើរពេញមួយឆ្នាំ។
ការថយចុះគ្រោះថ្នាក់ធ្លាក់យន្តហោះ ទំនងជាបណ្ដាលពីការថយចុះចំនួនជើងហោះហើរផងដែរ ដោយសារក្នុងឆ្នាំ២០២០ សកម្មភាពហោះហើរ បានថយចុះយ៉ាងខ្លាំងដោយសារការផ្ទុះឡើងជំងឺកូវីដ-១៩។ វេបសាយ Flightradar24 ដែលតាមដានការហោះហើរជុំវិញពិភពលោក រាយការណ៍ថា ចំនួនជើងហោះហើរដែលខ្លួនតាមដានក្នុងឆ្នាំ២០២០ បានថយចុះដល់ទៅ៤២ភាគរយ ដោយមានត្រឹមតែជាង២៤លានជើងហោះហើរប៉ុណ្ណោះ។
របាយការណ៍របស់ To70 បង្ហាញថា ច្រើនជាងពាក់កណ្ដាលនៃអ្នកស្លាប់ក្នុងឆ្នាំ២០២០ ជាជនរងគ្រោះក្នុងហេតុការណ៍ធ្លាក់យន្តហោះក្នុងខែមករា ដែលយន្តហោះអ៊ុយក្រែនត្រូវបានបាញ់ទម្លាក់ដោយអ៊ីរ៉ង់ និងសម្លាប់មនុស្ស១៧៦នាក់។ ករណីស្លាប់លំដាប់ទីពីរ គឺការធ្លាក់យន្តហោះនៅប៉ាគីស្ថានក្នុងខែឧសភា ដែលមានអ្នកស្លាប់៩៨នាក់៕
Tag:
យន្តហោះ
© រក្សាសិទ្ធិដោយ thmeythmey.com
