ឥណ្ឌាហាមនាំចេញវ៉ាក់សាំងកូវីដ-១៩ ដែលផលិតក្នុងស្រុកទៅលក់នៅបរទេស

COVID-19

អន្តរជាតិ

ឥណ្ឌាហាមនាំចេញវ៉ាក់សាំងកូវីដ-១៩ ដែលផលិតក្នុងស្រុកទៅលក់នៅបរទេស

04, Jan 2021 , 3:52 pm

រូបភាព

វ៉ាក់សាំងបង្ការជំងីកូវីដ-១៩ អភិវឌ្ឍដោយសាកលវិទ្យាល័យOxford និងក្រុមហ៊ុនAstraZeneca។ រូបភាព៖AFP

ដោយ:

នៅថ្ងៃទី៣ មករា វិទ្យាស្ថាន Serum ដែលទទួលបន្ទុកផលិតវ៉ាក់សាំងរបស់ក្រុមហ៊ុន AstraZenenca អះអាងថា រដ្ឋាភិបាលឥណ្ឌាហាមមិនឲ្យនាំចេញវ៉ាក់សាំងបង្ការជំងឺកូវីដ-១៩ ឡើយដើម្បីបំពេញតម្រូវការក្នុងស្រុករបស់ឥណ្ឌាជាមុនសិន។ វិទ្យាស្ថាន Serum ចុះកិច្ចព្រមព្រៀងជាមួយរដ្ឋាភិបាលឥណ្ឌាក្នុងការផលិតវ៉ាក់សាំង AstraZenenca មួយពាន់លានដូស។

រដ្ឋាភិបាលឥណ្ឌា កាលពីចុងសប្ដាហ៍មុន បានអនុញ្ញាតឲ្យប្រើប្រាស់ជាបន្ទាន់វ៉ាក់សាំងពីរមុខរបស់ក្រុមហ៊ុនអង់គ្លេស AstraZenenca និងក្រុមហ៊ុនBharat Biotech។ វិទ្យាស្ថាន Serum ដែលជាក្រុមហ៊ុនផលិតឱសថធំជាងគេលើលោក ទទួលបានការអនុញ្ញាតឲ្យផលិតវ៉ាក់សាំង AstraZenenca ។ ទោះជាយ៉ាងណា មន្ត្រីក្រុមហ៊ុននេះ អះអាងថា ខ្លួនមិនអាចនាំចេញវ៉ាក់សាំងនេះទៅលក់នៅក្រៅប្រទេសឡើយ ដោយរដ្ឋាភិបាលឥណ្ឌាចង់ចាក់ឲ្យប្រជាជនឥណ្ឌាដែលងាយរងគ្រោះជាមុនសិន។

ឥណ្ឌាជាប្រទេសទីពីរ បន្ទាប់ពីអាមេរិកដែលមានករណីឆ្លងកូវីដ-១៩ច្រើនបំផុត។ គិតត្រឹមថ្ងៃទី៣មករា ឥណ្ឌាមានករណីឆ្លងចំនួន១០,៣លានករណី ជាសះស្បើយចំនួន៩,៩៣លានករណី និងស្លាប់ចំនួនជាង១៤ម៉ឺននាក់។

លោក Adar Poonawalla នាយកប្រតិបត្តិវិទ្យាស្ថាន Serum អះអាងថា គ្រឹះស្ថានរបស់លោក ត្រូវរដ្ឋាភិបាលឥណ្ឌាហាមមិនឲ្យលក់វ៉ាក់សាំងទៅកាន់ទីផ្សារឯកជនផងដែរ ហើយពេលនេះ អាចត្រឹមតែលក់ទៅកាន់រដ្ឋាភិបាលឥណ្ឌាតែប៉ុណ្ណោះ។ វិទ្យាស្ថាននេះ អះអាងថា នឹងដឹកជញ្ជូនវ៉ាក់សាំងទៅកាន់រដ្ឋនីមួយៗ ក្នុងរយៈពេលប្រាំពីរ ទៅ១០ថ្ងៃបន្ទាប់ពីបញ្ចប់កិច្ចព្រមព្រៀងជាមួយរដ្ឋាភិបាលរដ្ឋនីមួយៗ។ នេះបើយោងតាមទីភ្នាក់ងារព័ត៌មាន AP ។

ក្នុងដំណាក់កាលដំបូង វិទ្យាស្ថាន Serum នឹងផលិតវ៉ាក់សាំងរបស់ AstraZeneca ចំនួន១០០លានដូស សម្រាប់ផ្គត់ផ្គង់ឲ្យរដ្ឋាភិបាលឥណ្ឌា និងលក់ក្នុងតម្លៃ២,៧៤ដុល្លារក្នុងមួយដូស ហើយបង្កើនតម្លៃបន្តិចម្តងៗ។ ចំពោះតម្លៃលក់ក្នុងទីផ្សារវិញ វ៉ាក់សាំងនេះមានតម្លៃ១៣,៦៨ដុល្លារក្នុងមួយដូស។

ការហាមរបស់ឥណ្ឌាមិនឲ្យនាំចេញវ៉ាក់សាំងនេះ នឹងប៉ះពាល់ដល់យន្តការពហុភាគី COVAX ដែលបង្កើតឡើងដោយអង្គការសុខភាពពិភពលោក (WHO) សម្ព័ន្ធវ៉ាក់សាំងGAVI និងសម្ព័ន្ធប្រយុទ្ធប្រឆាំងនឹងជំងឺឆ្លង CEPI ដើម្បីចែកចាយវ៉ាក់សាំងដោយសមភាពទៅឲ្យប្រទេសក្រីក្រ។ បើតាម លោក Poonawalla បម្រាមរបស់ឥណ្ឌានឹងពន្យារពេលការនាំចេញវ៉ាក់សាំងសម្រាប់យន្តការ COVAX រហូតដល់ខែមីនា ឬមេសា ឆ្នាំ២០២១។

នាយកប្រតិបត្តិរូបនេះ និយាយថាវិទ្យាស្ថានរបស់លោក មានគម្រោងផ្គត់ផ្គង់វ៉ាក់សាំងពី២០០ ទៅ៣០០លានដូសដល់ COVAX នៅត្រឹមចុងឆ្នាំ២០២១។ ជាមួយការទទួលស្គាល់ពីបញ្ហាប្រឈមក្នុងការចែកចាយវ៉ាក់សាំងរវាងឥណ្ឌា និងយន្តការ COVAX លោក Poonawalla និយាយថា ពេលនេះវ៉ាក់សាំងមិនអាចផ្តល់ឲ្យមនុស្សគ្រប់គ្នាបានឡើយ។

ក្រៅពីរោងចក្រក្នុងស្រុក វិទ្យាស្ថាន Serum ក៏កំពុងចរចាជាមួយបង់ក្លាដែស អារ៉ាប៊ីសាអូឌីត និងម៉ារ៉ុកដើម្បីផលិតវ៉ាក់សាំងបន្ថែមសម្រាប់ផ្គត់ផ្គង់បន្ថែមមកឥណ្ឌា និងសម្រាប់ប្រើប្រាស់ក្នុងប្រទេសដទៃទៀត។ លោក Poonawalla លើកឡើងថា បើទោះបីជាក្រុមហ៊ុនផលិតវ៉ាក់សាំងសម្រេចបានដូចផែនការដែលបានគ្រោងទុកក្តី កង្វះខាតវ៉ាក់សាំង អាចកើតមាននាប៉ុន្មានឆ្នាំខាងមុខផងដែរ៕