លោក លី ជាមេដឹកនាំអាស៊ានដំបូងដែលចាក់វ៉ាក់សាំងកូវីដ-១៩របស់ Pfizer/BioNTech

COVID-19

អន្តរជាតិ

លោក លី ជាមេដឹកនាំអាស៊ានដំបូងដែលចាក់វ៉ាក់សាំងកូវីដ-១៩របស់ Pfizer/BioNTech

08, Jan 2021 , 2:04 pm

រូបភាព

លោកលី សៀនឡុង នាយករដ្ឋមន្ត្រីសិង្ហបុរីទទួលវ៉ាក់សាំង។ រូបភាព៖ ក្រសូងទូរគមនាគមន៍ និងព័ត៌មានសិង្ហបុរី

ដោយ:

លោក លី សៀនឡុង នាយករដ្ឋមន្ត្រីសិង្ហបុរី បានទទួលវ៉ាក់សាំងកូវីដ-១៩ ដែលផលិតដោយក្រុមហ៊ុនPfizer/BioNTechថ្ងៃទី៨ ខែមករានេះ។ ការទទួលវ៉ាក់សាំងនេះ ធ្វើឲ្យលោកលី ក្លាយជាថ្នាក់ដឹកនាំប្រទេសអាស៊ានដំបូងបង្អស់ដែលបង្ហាញពីការទទួលវ៉ាក់សាំងជាសាធារណៈ។

បុរីរដ្ឋសិង្ហបុរីចាប់ផ្តើមផ្តល់វ៉ាក់សាំងដល់គ្រឹះស្ថានសុខាភិបាល មន្ទីរពេទ្យ និងមន្ទីពហុព្យាបាលឯកជននៅថ្ងៃទី៨ មករា។ អ្វីដែលគួរឲ្យកត់សម្គាល់ លោក លី សៀនឡុង ដែលជាប្រមុខរដ្ឋាភិបាលសិង្ហបុរី ក៏បានទទួល វ៉ាក់សាំងកូវីដ-១៩ នេះដែរនៅមន្ទីរពេទ្យ Singapore General Hospital(SGH)។

«ខ្ញុំឆ្លៀតឱកាសមកទទួលវ៉ាក់សាំងនៅព្រឹកនេះ ក្រោយរង់ចាំអស់រយៈពេល៣០នាទី»។ នេះជាការលើកឡើងរបស់លោកលី ហើយលោកបន្តអះអាងថា វាពុំមានឥទ្ធិពលអ្វីកើតឡើងក្រោយការចាក់វ៉ាក់សាំងនេះឡើយ។ មេដឹកនាំរូបនេះបន្តថា លោកទទួលបានបណ្ណវ៉ាក់សាំង និងត្រឡប់មកទទួលវ៉ាក់សាំងដូសទី២ នៅ៣សប្តាហ៍បន្ទាប់ទៀត។

«គណៈរដ្ឋមន្ត្រីរបស់ខ្ញុំ និងរូបខ្ញុំ រួមទាំងអ្នកមានវ័យចំណាស់ជាងគេ នឹងទទួលវ៉ាក់សាំងដំបូងគេបំផុត។ នេះដើម្បីបង្ហាញអ្នក ជាពិសេសមនុស្សចាស់ ថាពួកយើងជឿជាក់ថាវ៉ាក់សាំងមានសុវត្ថិភាព»។នាយករដ្ឋមន្ត្រីសិង្ហបុរីរូប បន្ថែមថា ការចាក់វ៉ាក់សាំងមិនឈឺឡើយ ហើយវាក៏មានប្រសិទ្ធភាព និងមានសារៈសំខាន់។ នេះយោងតាមទូរទស្សន៍សិង្ហបុរី CNA។

Was at Singapore General Hospital this morning to take a look at the start of COVID-19 vaccinations for healthcare...
Posted by Lee Hsien Loong on Thursday, 7 January 2021

ចំពោះការចាក់វ៉ាក់សាំងនេះដែរ លោក Gan Kim Yong រដ្ឋមន្ត្រីក្រសួងសុខាភិបាលសិង្ហបុរី ក៏បានដែរអះអាងថាលោកកំពុងរៀបចំផែនការក្នុងការផ្តល់វ៉ាក់សាំងដល់សមាជិកគណៈរដ្ឋមន្ត្រី។ ក្រៅពីនាយករដ្ឋមន្ត្រី លោកKenneth Mak នាយកសេវាសុខាភិបាល ដែលទទួលបន្ទុកការងារប្រយុទ្ធនឹងជំងឺកូវីដ-១៩ ក៏ទទួលបានវ៉ាក់សាំងនាថ្ងៃទី៨ មករានេះដែរ។

តាមពិតទៅ សិង្ហបុរី ទទួលបានវ៉ាក់សាំង ជំងឺកូវីដ-១៩ ជើងដំបូងរបស់ក្រុមហ៊ុន Pfizer/BioNTech នៅថ្ងៃទី២១ ខែធ្ន ឆ្នាំ២០២០។ កាលពីថ្ងៃទី៣០ ធ្នូ ឆ្នាំ២០២០ រដ្ឋអាស៊ានមួយចាប់ផ្តើមចាក់វ៉ាក់សាំងកូវីដ-១៩ ដោយផ្តល់អាទិភាពទៅបុគ្គលិកសុខាភិបាលជួរមុខ ដោយផ្តល់វ៉ាក់សាំងទៅបុគ្គលិកចំនួន៤០នាក់ នៅមជ្ឈមណ្ឌលជាតិនៃជំងឺឆ្លង។

ដោយឡែក ក្រសួងសុខាភិបាលសិង្ហបុរីអះអាងដែរថា មនុស្សវ័យចំណាស់ចាប់ពី៧០ឆ្នាំឡើងទៅ នឹងទទួលបានវ៉ាក់សាំងនៅខែកុម្ភៈខាងមុខ។ សិង្ហបុរី នឹងផ្តល់វ៉ាក់សាំងដល់ពលរដ្ឋ និងអ្នកស្នាក់នៅសិង្ហបុរីរយៈពេលយូរដោយមិនគិតថ្លៃ។ នាយករដ្ឋមន្ត្រីសិង្ហបុរី ក៏អំពាវនាវផងដែរឲ្យពលរដ្ឋទៅទទួលវ៉ាក់សាំងនៅពេលមកដល់។

អាជ្ញាធរវិទ្យាសាស្ត្រសុខាភិបាលសិង្ហបុរី និងអ្នកជំនាញ បានអនុញ្ញាតឲ្យប្រើវ៉ាក់សាំងនេះសម្រាប់មនុស្សអាយុចាប់ពី១៦ឆ្នាំឡើងទៅ។ ការផ្តល់វ៉ាក់សាំងនៅសិង្ហបុរីអាចនឹងបញ្ចប់នៅត្រឹមចុងឆ្នាំ២០២១ បើសិនជាគ្មានការរំខានណាមួយ។ទោះជាយ៉ាងណា ក្រសួងសុខាភិបាលសិង្ហបុរី សង្កត់ធ្ងន់ថា វ៉ាក់សាំងនឹងមិនបញ្ចប់ជំងឺកូវីដ-១៩ភ្លាមៗឡើយ តែវ៉ាក់សាំងនឹងអនុញ្ញាត ឲ្យសិង្ហបុរីត្រឡប់មកស្ថានការណ៍ដើមវិញប៉ុណ្ណោះ៕

អត្ថបទទាក់ទង

សឹង្ហបុរី ជាប្រទេសទីមួយនៅអាស៊ានចាប់ផ្ដើមវ៉ាក់សាំងកូវីដ-១៩