COVID-19
អន្តរជាតិ
គិលានុបដ្ឋាកយិកា Sarah Lim ទទួលការចាក់វ៉ាក់សាំងកូវីដ-១៩។ រូបថតកាត់ចេញពីវីដេអូបង្ហោះលើវេបសាយ CNA
×![]()
នៅថ្ងៃទី៣០ ធ្នូ សិង្ហបុរីចាប់ផ្តើមចាក់វ៉ាក់សាំងបង្ការជំងឺកូវីដ-១៩ ដោយផ្តល់អាទិភាពទៅបុគ្គលិកសុខាភិបាលជួរមុខ។ សិង្ហបុរី អះអាងថា ខ្លួនជាប្រទេសដំបូងនៅអាស៊ី ដែលប្រើប្រាស់វ៉ាក់សាំងPfizer បន្ទាប់ពីអង់គ្លេស កាណាដា អាមេរិក និងសហភាពអឺរ៉ុប និងជាប្រទេសទីមួយនៅតំបន់អាស៊ានដែលចាប់ផ្ដើមចាក់វ៉ាក់សាំង។ 
លោកស្រី Sarah Lim ដែលជាគិលានុបដ្ឋាយិកា និងបុគ្គលិកសុខាភិបាលជាង៣០រូបផ្សេងទៀតនៅមជ្ឈមណ្ឌលជាតិជំងឺឆ្លងសិង្ហបុរី ទទួលបានវ៉ាក់សាំងកូវីដ-១៩ ដំបូងគេនៅសិង្ហបុរី។ នេះបើយោងតាមសារព័ត៌មានសិង្ហបុរី The Straits Times ។
សិង្ហបុរី ទទួលបានវ៉ាក់សាំងបង្ការជំងឺកូវីដ-១៩ ជើងដំបូងរបស់ក្រុមហ៊ុន Pfizer/BioNTech នៅថ្ងៃទី២១ ខែធ្នូ ។ វ៉ាក់សាំងបន្ថែមទៀត នឹងត្រូវបញ្ជូនមកសិង្ហបុរីនៅប៉ុន្មានខែបន្ទាប់។ អាជ្ញាធរវិទ្យាសាស្ត្រសុខាភិបាលសិង្ហបុរី និងអ្នកជំនាញ បានអនុញ្ញាតឲ្យប្រើវ៉ាក់សាំងនេះសម្រាប់មនុស្សអាយុចាប់ពី១៦ឆ្នាំឡើងទៅ។
ក្នុងការចាក់វ៉ាក់សាំងបង្ការជំងឺកូវីដ-១៩នេះ បុគ្គលិកសុខាភិបាលមានគ្រូពេទ្យ គិលានុបដ្ឋាយិកាដែលទទួលបន្ទុកព្យាបាលអ្នកជំងឺកូវីដ-១៩ ទទួលបានវ៉ាក់សាំងនេះដំបូងគេ។ គ្រឹះស្ថានសុខាភិបាលរដ្ឋ និងឯកជន ចាក់វ៉ាក់សាំងនេះដល់បុគ្គលិករបស់ខ្លួនតាមលំដាប់លំដោយ និងនៅកន្លែងរៀងៗខ្លួន។
សម្រាប់អ្នកដែលស្ថិតក្នុងអាទិភាពទី២ គឺក្រុមមនុស្សចាស់ចាប់ពីអាយុ៧០ឆ្នាំឡើងទៅ ដោយចាប់ផ្តើមចាក់ក្នុងខែកុម្ភៈ ឆ្នាំ២០២១។
ទោះជាយ៉ាងណា ក្រសួងសុខាភិបាលសិង្ហបុរី សង្កត់ធ្ងន់ថា វ៉ាក់សាំងនឹងមិនបញ្ចប់ជំងឺកូវីដ-១៩ភ្លាមៗឡើយ តែវ៉ាក់សាំងនឹងអនុញ្ញាត ឲ្យសិង្ហបុរីត្រឡប់មកស្ថានការណ៍ដើមវិញប៉ុណ្ណោះ។ បន្ថែមពីនេះ ក្រសួងសុខាភិបាលអះអាងថា ការធ្វើតេស្ត ការតាមដានអ្នកឆ្លង នឹងត្រូវបន្តអនុវត្តដើម្បីកាត់បន្ថយការឆ្លងក្នុងសហគម និងរក្សាកម្រិតឆ្លងក្នុងអាត្រាទាប។ ក្នុងរយៈពេលវែង ការផ្តល់វ៉ាក់សាំងទ្រង់ទ្រាយធំ នឹងអនុញ្ញាតឲ្យសិង្ហបុរីបើកចំហសេដ្ឋកិច្ច និងសង្គម ដើម្បីពន្លឿនការស្តារប្រទេសឡើងវិញ។
ក្នុងសេចក្តីថ្លែងការណ៍នៅថ្ងៃទី២៧ ធ្នូ ក្រសួងសុខាភិបាលកត់សម្គាល់ថា នៅពេលដែលការផ្តល់វ៉ាក់សាំងក្តោបដណ្តប់បានដល់ប្រជាជនគ្រប់ជ្រុងជ្រោយ អ្នកដែលមិនអាចទទួលវ៉ាក់សាំង នឹងមានការពារដោយប្រយោល។ អ្នកមានបញ្ហាសុខភាពដូចជាប្រតិកម្មនឹងវ៉ាក់សាំង ឬមិនអាចបង្កើតភាពស៊ាំបាន នឹងមិនអាចទទួលវ៉ាក់សាំងឡើយ។
ការផ្តល់វ៉ាក់សាំងសម្រាប់ពលរដ្ឋ និងអ្នករស់នៅសិង្ហបុរី នឹងត្រូវធ្វើឡើងដោយឥតគិតថ្លៃ ដោយអាចនឹងបញ្ចប់នៅត្រឹមចុងឆ្នាំ២០២១ បើសិនជាគ្មានការរំខានណាមួយ។ ស្របពេលជាមួយគ្នានេះដែរ អ្នកជំនាញសុខាភិបាលនឹងផ្ដល់ណែនាំជាបន្តបន្ទាប់នៅពេលមានវ៉ាក់សាំងបន្ថែម សម្រាប់ការចាក់លើក្រុមមនុស្សផ្សេងទៀតដូចជាអ្នករស់នៅ ឬធ្វើការនៅកន្លែងដែលប្រឈមទៅនឹងការឆ្លងរហ័ស និងការផ្ទុះជំងឺឆ្លង៕
Tag:
សិង្ហបុរី
កូវីដ-១៩
© រក្សាសិទ្ធិដោយ thmeythmey.com
