មន្ត្រីសុខាភិបាល៣៥រូបឡើងមុខតំណែងក្នុងនោះប្រធានមន្ទីរ២១រូបក្លាយជាទីប្រឹក្សាក្រសួង

ជាតិ

មន្ត្រីសុខាភិបាល៣៥រូបឡើងមុខតំណែងក្នុងនោះប្រធានមន្ទីរ២១រូបក្លាយជាទីប្រឹក្សាក្រសួង

12, Jan 2021 , 7:59 am

រូបភាព

លោក ម៉ម ប៊ុនហេង រដ្ឋមន្ត្រីក្រសួងសុខាភិបាល នាពេលចូលក្រាបថ្វាយបង្គំគាល់ព្រះមហាក្សត្រ និងសម្តេចព្រះវររាជមាតា កន្លងមក

ដោយ: សារព័ត៌មានថ្មីៗ

ព្រះករុណា ព្រះមហាក្សត្រ សម្តេចព្រះបរមនាថ នរោត្តម សីហមុនី តាមរយៈព្រះរាជក្រឹត្យចុះកាលពីថ្ងៃទី៧ ខែមករា បានត្រាស់បង្គាប់តែងតាំងមុខតំណែងជារដ្ឋលេខាធិការ អនុរដ្ឋលេខាធិការ និងផ្តល់ឋានៈជាទីប្រឹក្សាក្រសួង ដល់មន្ត្រីសុខាភិបាលចំនួន៣៥រូប។

លោក កើត មៀច, លោក ម៉ី សំបូរ, លោក ឡូ វាសនាគីរី និងលោក ង៉ូវ កាង ត្រូវបានតែងតាំងមុខតំណែងជារដ្ឋលេខាធិការ រីឯលោក បាន បុត្តា និងលោក ហេង វុទ្ធី ក្លាយជាអនុរដ្ឋលេខាធិការ។

ក្នុងចំណោមមន្ត្រី២៩នាក់ ដែលត្រូវបានតែងតាំង និងផ្តល់ឋានៈជាទីប្រឹក្សាក្រសួងសុខាភិបាល ៧នាក់មានឋានៈស្មើរដ្ឋលេខាធិការបន្ថែមលើការងារបច្ចុប្បន្ន រួមមាន លោក សាផុន វឌ្ឍនៈ, លោក សុខ សំអាង, លោក ហុក គឹមចេង, លោក ងី ម៉េង, លោក លូ លីយាង, លោក ឈា ឆវណ្ណ និងលោក លី សូវ៉ាន់ រីឯលោក ស៊ុង វិនតៈ មានឋានៈស្មើអនុរដ្ឋលេខាធិការ។

ទីប្រឹក្សា២១នាក់ផ្សេងទៀត មានឋានៈស្មើអគ្គនាយក ដែលសុទ្ធតែជាប្រធានមន្ទីរសុខាភិបាលខេត្ត។ ប៉ុន្តែក្នុងព្រះរាជក្រឹត្យ មិនមានឈ្មោះប្រធានមន្ទីរសុខាភិបាលរាជធានីភ្នំពេញ បាត់ដំបង ព្រៃវែង និងត្បូងឃ្មុំនោះឡើយ។

តាមពិតទៅប្រធានមន្ទីរសុខាភិបាលទាំង៤រូបនោះ ក៏មានឋានៈផ្សេងទៀតរួចទៅហើយផងដែរ ដែលក្នុងនោះ លោក ងី មានហេង (ភ្នំពេញ) ជាទីប្រឹក្សាក្រសួង លោក វឿង ប៊ុនរ៉េត (បាត់ដំបង) ជាទីប្រឹក្សាសម្តេច ស ខេង រីឯលោក សេង បញ្ញាឬទ្ធិ (ព្រៃវែង) និងលោក កែវ វណ្ណៈ (ត្បូងឃ្មុំ) ជាទីប្រឹក្សាសម្តេច ហេង សំរិន៕