ជាតិ
ក្រសួងការបរទេសថ្កោលទោសខ្មែរម្នាក់នៅអូស្ត្រាលី ដែលបង្ខូចឈ្មោះអង្ករកម្ពុជា រូបពីសហព័ន្ធស្រូវអង្ករកម្ពុជា
× ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិ បានថ្កោលទោសលើពលរដ្ឋខ្មែរនៅអូស្ត្រាលី ម្នាក់ឈ្មោះ ឯក សុវត្ថី ដែលប៉ុនប៉ងបំផ្លិចផ្លាញប្រយោជន៍កសិករខ្មែរ។ ការចេញសេចក្ដីប្រកាសថ្កោលទោសលើបុរសម្នាក់នេះ ធ្វើឡើងក្រោយពីរូបគេបានផ្ញើលិខិតទៅរដ្ឋមន្រី្តពាណិជ្ជកម្មអូស្ត្រាលី ដោយចោទថា ការនាំអង្ករកម្ពុជាទៅអូស្ត្រាលីជាប់ពាក់ព័ន្ធនឹងការរំលោភសិទ្ធិមនុស្ស។
សេចក្ដីថ្លែងការណ៍របស់អ្នកនាំពាក្យក្រសួងការបរទេសចុះថ្ងៃទី២៣មករា បានបញ្ជាក់ថា ការចោទប្រកាន់របស់បុគ្គល ឯក សុវត្ថី គ្មានមូលដ្ឋានឡើយ ដោយមានគោលបំណងទុច្ចរិត ដើម្បីរារាំងការនាំអង្ករកម្ពុជាចូលទីផ្សារអូស្ត្រាលី។
អ្នកនាំពាក្យក្រសួងការបរទេសកម្ពុជា បានអះអាងថា ភាគីអូស្ត្រាលីបានស្រាវជ្រាវលើករណីនេះហើយ។ បើតាមក្រសួងការបរទេស ភាគីអូស្ត្រាលីបានចាត់ទុកការលើកឡើងរបស់បុគ្គល ឯក សុវត្ថី ខាងលើ គឺគ្មានភស្តុតាង និងមិនអាចយកជាការបាន។ អ្នកនាំពាក្យរូបនេះបានឡើងថា៖ «សូមធ្វើការថ្កោលទោសជនអគតិទាំងឡាយដែលប៉ុនប៉ងបំផ្លិចបំផ្លាញផលប្រយោជន៍ប្រជាកសិករខ្មែរតាមរយៈទង្វើទុច្ចរិត និងមូលបង្កាច់បំភ្លៃការពិត ដូចករណីបានលើកឡើងខាងដើម...»។
រយៈពេលពេញមួយឆ្នាំនៃឆ្នាំ២០២០ កម្ពុជានាំចេញអង្ករទៅក្រៅប្រទេសជាង៦៩ម៉ឺនតោន ស្មើនឹងជិត៥០០លានដុល្លារ។ ក្នុងនោះកម្ពុជានាំចេញទៅអូស្ត្រាលី គឺជិត៣ម៉ឺនតោន។ ប្រទេសអូស្ត្រាលី ជាទីផ្សារអង្ករ ដែលស្ថិតនៅលេខរៀងទី៥របស់កម្ពុជា ក្នុងការនាំចេញ បន្ទាប់ពីចិន បារាំង ម៉ាឡេស៊ី និងហ្គាបុង៕
© រក្សាសិទ្ធិដោយ thmeythmey.com