លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា(CMAC) បានប្រកាសលើទំព័រហ្វេសប៊ុកខ្លួន នៅថ្ងៃទី២ សីហាថា សុនខទាំង៣ក្បាលនៃក្រុមទីមួយ អាចមានលទ្ធភាពហិតរកឃើញអ្នកមានផ្ទុកកូវីដ-១៩ រយៈពេលតែ១០ ទៅ១៥វិនាទីប៉ុណ្ណោះ។ 

 

«សូមអបអរសាទរចំពោះសុនខក្រុមទី១ចំនួន៣ក្បាល ដែលបានហិតរកឃើញក្លិនសំណាកនៃអ្នកជំងឺកូវីដ-១៩ ប្រកបដោយជោគជ័យក្នុងដំណាក់កាលហ្វឹកហ្វឺនស្រាវជ្រាវបឋមនេះ។ រីឯ សុនខក្រុមទី២ចំនួន៧ក្បាលទៀត កំពុងមានវឌ្ឍនភាពគួរឱ្យកត់សំគាល់»។ នេះបើតាមលោក ហេង រតនា ដែលបន្ថែមថា សុនខហិតអ្នកផ្ទុកវីរុសកូវីដ-១៩នេះ នឹងយកទៅប្រើប្រាស់នៅកន្លែងមានហ្វូងមនុស្សប្រមូលផ្តុំច្រើន ដូចជានៅ អាកាសយានដ្ឋាន ច្រកទ្វារអន្តរជាតិ និងពហុកីឡាដ្ឋានជាដើម។ 

សុនខដែលហ្វឹកហ្វឺននេះ គឺកើតនៅកម្ពុជាតែម្ដង ដោយមិនទិញពីប្រទេសណាឡើយ។ បើតាមអគ្គនាយកCMACរូបនេះ ការបង្វឹកសុនខទាំងនេះ គឺដោយគ្រូជំនាញសុនខនៅកម្ពុជា ក្រោមកិច្ចសហការជាមួយសាកលវិទ្យាល័យវិទ្យាសាស្ត្រសុខាភិបាល។ 
 

សូមជម្រាបថា សុនខទាំងនេះ ត្រូវបានក្រុមជំនាញរបស់អង្គភាពCMAC ចាប់ផ្ដើមហ្វឹកហ្វឺនកាលពីអំឡុងខែមីនា ឆ្នាំ២០២១៕