អន្តរជាតិ
នយោបាយជាតិ
សម្ដេចប៉ាប Francis ថា នឹងយាងទៅកូរ៉េខាងជើង បើមានការអញ្ជើញ
× ទូរទស្សន៍ KBS របស់កូរ៉េខាងត្បូង នៅថ្ងៃទី២៦ ខែសីហា បានរាយការណ៍ថា សម្តេចសង្ឃកាតូលិក Francis ស្នើឱ្យកូរ៉េខាងជើងអញ្ជើញទ្រង់ទៅបំពេញទស្សនកិច្ច ដើម្បីមានឱកាសពិភាក្សាអំពីបញ្ហាសន្តិភាពនៅឧបទ្វីបកូរ៉េ។
មានបន្ទូលក្នុងបទសម្ភាសជាមួយទូរទស្សន៍កូរ៉េខាងត្បូង KBS នៅថ្ងៃទី២៦ ខែសីហា សម្ដេចប៉ាប Francis នៃបុរីរដ្ឋវ៉ាទីកង់ បញ្ជាក់ថា ទ្រង់ចង់ឱ្យកូរ៉េខាងជើងអញ្ជើញធ្វើទស្សនកិច្ចជាផ្លូវការ ហើយទ្រង់នឹងមិនបដិសេធឱកាសដែលអាចធ្វើកិច្ចការដើម្បីសន្តិភាពនៅឧបទ្វីបកូរ៉េ។
«នៅពេលពួកគេអញ្ជើញខ្ញុំ ខ្ញុំនឹងមិនបដិសេធឡើយ»។ សម្ដេចសង្ឃកាតូលិកបញ្ជាក់បែបនេះក្នុងការសម្ភាសមុនបង្ហាញពីគោលបំណងនៃដំណើរទស្សនកិច្ចនោះ គឺគ្រាន់តែចង់រឹតបន្តឹងចំណងមិត្តភាពរវាងកូរ៉េទាំងពីរ។ លើសពីនេះ សម្ដេចសង្ឃ Francis ក៏បានជំរុញឱ្យឧបទ្វីបកូរ៉េធ្វើការដើម្បីសន្តិភាព ព្រោះប្រជាជនកូរ៉េទាំងអស់បានរងគ្រោះដោយសារសង្គ្រាមជាយូរមកហើយ។
កន្លងមក អតីតប្រធានាធិបតីកូរ៉េខាងត្បូង លោក មូន ចេអ៊ីន ដែលជាអ្នកកាន់សាសនាកាតូលិកដែរ បានជំរុញសម្ដេចសង្ឃ Francis ឱ្យទៅបំពេញទស្សនកិច្ចនៅកូរ៉េខាងជើង ដោយជឿថា ទស្សនកិច្ចរបស់លោកនៅទីក្រុងព្យុងយ៉ាង នឹងអាចជួយកសាងសន្តិភាពនៅលើឧបទ្វីបកូរ៉េ។
យ៉ាងណាមិញ បំណងទស្សនកិច្ចរបស់សម្ដេចប៉ាបនៅកូរ៉េខាងជើងទំនងជាត្រូវពាក់ព័ន្ធនឹងរឿងសាសនាក្នុងប្រទេសនោះដែរ។ លោក គីម អ៊ីលស៊ុង ដែលជាអតីតមេដឹកនាំកូរ៉េខាងជើង ចាត់ទុកសាសនាគ្រិស្តបង្កការគំរាមកំហែង ហើយបានលុបបំបាត់តាមរយៈការប្រហារជីវិតអ្នកកាន់សាសនានេះ។
តាមពិត សេរីភាពខាងសាសនា ក៏មានចែងនៅក្នុងរដ្ឋធម្មនុញ្ញកូរ៉េខាងជើងដែរ តែបច្ចុប្បន្ន កូរ៉េខាងជើងផ្ដល់ព័ត៌មានតិចតួចណាស់អំពីជំនឿ និងសាសនារបស់ប្រជាជន ហើយប្រទេសនេះមិនមានបង្ហាញចំនួនសាសនិកកាតូលិកច្បាស់លាស់ទេ៕
© រក្សាសិទ្ធិដោយ thmeythmey.com