ជាតិ
អាម៉េរិក ផ្ដល់ជំនួយអគារនិងម៉ាស៊ីនផលិតអុកស៊ីសែន ដល់មន្ទីរពេទ្យបង្អែកខេត្តព្រះវិហារ ![រូបពីស្ថានទូតអាម៉េរិក](https://image.thmeythmey.com/pictures/2022/09/15/15920221804c.jpg)
រូបពីស្ថានទូតអាម៉េរិក
×![]()
ដោយ៖ ជិន សុវណ្ណដាវីត
ភ្នំពេញ៖ សហរដ្ឋអាម៉េរិក ផ្ដល់ជំនួយអគារ និងម៉ាស៊ីនផលិតអុកស៊ីសែនថ្មីមួយ ដល់មន្ទីរពេទ្យបង្អែក ១៦មករា ក្នុងខេត្តព្រះវិហារ ដើម្បីកាត់បន្ថយការទិញអុកស៊ីសែនពីឯកជន និងបញ្ហាប្រឈមនៃការខ្វះអុកស៊ីសែន។
ម៉ាស៊ីនផលិតអុកស៊ីសែនដែលអាម៉េរិកផ្ដល់ឲ្យនេះ មានសមត្ថភាពអាចផលិតអុកស៊ីសែន៣០០លីត្រក្នុងមួយនាទី (LPM) ជាមួយនឹងស្ថានីយ៍ផ្ទុក ដែលមានបំពង់ស៊ីឡាំង និងតភ្ជាប់ទៅបំពង់អុកស៊ីសែនរបស់មន្ទីរពេទ្យ។ នេះបើតាមសេចក្ដីប្រកាសព័ត៌មានរបស់ស្ថានទូតអាម៉េរិក ដែលចេញកាលពីថ្ងៃទី១៤កញ្ញា។
សេចក្តីប្រកាសដដែល បានបញ្ជាក់ថា គម្រោងជំនួយខាងលើនេះ នឹងផ្ដល់អត្ថប្រយោជន៍ដល់ស្រុកចំនួន៧ ក្នុងខេត្តព្រះវិហារ ដែលពលរដ្ឋប្រមាណ២៨ម៉ឺននាក់។
ពាក់ព័ន្ធនឹងគម្រោងនេះ លោក W. Patrick Murphy ឯកអគ្គរដ្ឋទូតសហរដ្ឋអាម៉េរិកប្រចាំនៅកម្ពុជា បានលើកឡើងថា ការផ្ដល់ម៉ាស៊ីនផលិតអុកស៊ីសែននេះ ជាផ្នែកមួយក្នុងកញ្ចប់ទឹកប្រាក់ជាង១៦លានដុល្លាររបស់អាម៉េរិក ត្រៀមសម្រាប់ជួយកម្ពុជា ឆ្លើយតបជំងឺរាតត្បាតកូវីដ-១៩។ ការជួយគាំទ្រទាំងនេះ បង្ហាញពីចំណងទាក់ទងដ៏រឹងមាំនៃប្រទេសទាំងពីរ។
ឯកអគ្គរដ្ឋទូតសហរដ្ឋអាម៉េរិកប្រចាំនៅកម្ពុជា បានបញ្ជាក់ថា៖ «ម៉ាស៊ីនផលិតអុកស៊ីសែន នឹងបំពេញតម្រូវការផលិតអុកស៊ីសែនសម្រាប់សេវាសំខាន់ៗ ដូចជា ការព្យាបាលអ្នកជំងឺកូវីដ-១៩ ការតាមដាន និងការព្យាបាលជំងឺសង្គ្រោះបន្ទាន់»។
លោកបន្ថែមថា ការផ្គត់ផ្គង់អុកស៊ីសែន នឹងផ្តល់អត្ថប្រយោជន៍យ៉ាងច្រើន ដល់សហគមន៍ ដែលពឹងផ្អែកលើសេវាព្យាបាលរបស់មន្ទីរពេទ្យ។
គម្រោងនេះ ជាមូលនិធិរបស់ទីភ្នាក់ងារសហរដ្ឋអាម៉េរិកដើម្បីការអភិវឌ្ឍន៍អន្តរជាតិ (USAID) និងភាពជាដៃគូជាមួយអង្គការយូនីសេហ្វ និងក្រសួងសុខាភិបាលកម្ពុជា ។ ទាក់ទិនគម្រោងនេះដែរ លោកស្រី Foroogh Foyouzat តំណាងអង្គការយូនីសេហ្វប្រចាំកម្ពុជាមើលឃើញថា ៖«អុកស៊ីសែន អាចធ្វើឱ្យមានភាពខុសគ្នារវាងជីវិត និងសេចក្តីស្លាប់។ នេះជាមូលហេតុ ដែលអង្គការ យូនីសេហ្វ កំពុងធ្វើការជាមួយរាជរដ្ឋាភិបាលកម្ពុជា ដើម្បីកែលម្អការផ្គត់ផ្គង់អុកស៊ីសែន និងហេដ្ឋា រចនាសម្ព័ន្ធ ទន្ទឹមនឹងការកសាងសមត្ថភាពបុគ្គលិកសុខាភិបាលក្នុងការប្រើប្រាស់»។
បើតាមស្ថានទូតអាម៉េរិក លទ្ធផលគម្រោងនេះ នឹងជួយដល់មន្ទីរពេទ្យឈប់ទិញបំពង់អុកស៊ីសែនពីអ្នកផ្គត់ផ្គង់ឯកជន ដែលតែងតែបញ្ជូនបំពង់អុកស៊ីសែនទីតាំងឆ្ងាយៗ សម្រាប់បំពេញឡើងវិញនៅតាមមន្ទីរពេទ្យ។ ដូច្នេះ គម្រោងនេះ នឹងជួយសន្សំសំចៃពេលវេលា ថវិកា និងកាត់បន្ថយការខ្វះខាតអុកស៊ីសែន៕
Tag:
ម៉ាស៊ីនផលិតអុកស៊ីសែន
© រក្សាសិទ្ធិដោយ thmeythmey.com