ស្របពេលបក្សឆ្ពោះទៅមុខទំនងមិនអាចដឹកនាំរដ្ឋាភិបាល លទ្ធភាពមានកាន់តែខ្ពស់ដែលបក្សភឿថៃបង្កើតសម្ព័ន្ធមួយឡើងជំនួស ដោយមិនមានបក្សឆ្ពោះទៅមុខចូលរួមដើម្បីឈានទៅដឹកនាំ និងបង្កើតរដ្ឋាភិបាលថ្មី ។ ​

 

ជុំវិញរឿងនេះ លោក Chaitawat Tulaton អគ្គលេខាធិការបក្សឆ្ពោះទៅមុខបានបដិសេធ។ លោក​​បញ្ជាក់​ថា បក្ស​ចម្រុះទាំងប្រាំបីនឹង​ត្រូវ​ពិភាក្សា​ជា​មុន​សិន បើ​ទោះ​បី​ជា​លោក Pita ត្រូវ​បាន​បដិសេធ​ដោយ​សមាជិកសភាក្លាយជានាយរដ្ឋមន្រ្តីក្តី។ 

 

កន្លងមក លោកស្រី Paetongtarn Shinawatra ដែលជាកូនអតីតនាយករដ្ឋមន្ត្រីថៃ ថាក់ស៊ីន ស៊ីណាវ៉ាត់ ធ្លាប់បាននិយាយថា បក្សភឿថៃនឹងស្នើលោក Srettha Thavisin ជាបេក្ខភាពនាយករដ្ឋមន្ត្រី ប្រសិនបើសម័យប្រជុំពេញអង្គបោះឆ្នោតជ្រើសនាយករដ្ឋមន្ត្រី បន្តបដិសេធមេដឹកនាំបក្សឆ្ពោះទៅមុខ Pita Limjaroenrat នៅជុំទីពីរ។

 

នៅថ្ងៃទី១៩ ខែកក្កដា សភាថៃ បានបោះឆ្នោតបដិសេធការស្នើបេក្ខភាពលោក Pita Limjaroenrat ជានាយករដ្ឋមន្រ្តីជាលើកទី២។ មូលហេតុដែលធ្វើឱ្យលោក Pita មិនទទួលបានគាំទ្រពីសមាជិកព្រឹទ្ធសភា និងសមាជិករដ្ឋសភាខ្លះ ដោយសារលោកមានបំណងកែប្រែច្បាប់ស្តីពីការប្រមាថព្រះមហាក្សត្ ព្រមទាំងបញ្ហាដែលលោកជាប់ពាក់ព័ន្ធនិងភាគហ៊ុនទូរទស្សន៍ ។ 

 

ជុំវិញការជំទាស់លោក Pita ឈរជាបេក្ខភាពនាយរដ្ឋមន្ត្រី មានការតវ៉ាពីម្ចាស់ឆ្នោប្រមាណជា២០០ ទៅ ៣០០នាក់ នៅទីលានប្រជាធិបតេយ្យដើម្បីប្រឆាំងនឹងការសម្រេចចិត្តរបស់តុលាការធម្មនុញ្ញក្នុងការព្យួរ លោក Pita និងការសម្រេចចិត្តរបស់សភាដែលរារាំងការតែងតាំង។

 

ក្រុមអ្នកតវ៉ាបានអះអាងថា ការតវ៉ាបន្ទាប់ទំនងជាកើតឡើងនៅចុងសប្តាហ៍នេះ ខណៈពេលដែលសភានឹងបើកការប្រជុំដើម្បីបោះឆ្នោតជ្រើសរើសនាយករដ្ឋមន្ត្រីនៅថ្ងៃទី ២៧ ខែកក្កដា។ នេះបើតាមសារព័ត៌មានថៃ ThaiEnquirer៕