ភ្នំពេញ៖ ដោយសារតែជាប់រវល់ការងារ និងការរកស៊ីនោះ ម្ដាយឪពុក និងអាណាព្យាបាល បានបណ្ដោយឱ្យកូន ដែលមានវ័យក្រោម៥ឆ្នាំ មើលទូរសព្ទ ដើម្បីបញ្ចៀសការរំខានដល់កិច្ចការងារពួកគេ។ មធ្យោបាយឱ្យក្មេងមើលទូរសព្ទ ដើម្បីបន្លប់អារម្មណ៍នេះ វាជម្រើសមួយដ៏ល្អ។ ប៉ុន្តែមធ្យោបាយបែបនេះ វាកំពុងបង្កផលប៉ះពាល់ទៅដល់ការអភិវឌ្ឍខួរក្បាល និងភ្នែករបស់កុមារ។
អ្នកស្រី ពេជ្រ ចាន់លីដា តែងតែឱ្យកូនមើលទូរសព្ទកម្សាន្តលេង ដើម្បីកុំឱ្យពួកគេរពឹស ឬរំខានការងាររបស់អ្នកស្រី។ អ្នកស្រី លីដា បានកត់សម្គាល់ថា នៅពេលកូនអ្នកស្រី មើលទូរសព្ទនោះ ពួកគេតែងតែអង្គុយនៅស្ងៀម ដែលផ្ដល់ភាពងាយស្រួលដល់អ្នកស្រី បំពេញការងារ។ ដ្បិតវាជាមធ្យោបាយមួយដ៏ល្អក្តី ប៉ុន្តែអ្នករស់នៅភ្នំពេញរូបនេះ ក៏បារម្ភពីបញ្ហាសុខភាពភ្នែក និងខួរក្បាលកូនដែរ។
«នៅពេលកូនរបស់ខ្ញុំមើលទូរសព្ទ គាត់មិនសូវចាប់អារម្មណ៍ខ្ញុំហៅគាត់នោះទេ។ ខ្ញុំបារម្ភពីទំនាក់ទំនងជុំវិញខ្លួនរបស់គាត់ និងធ្វើឱ្យស្រវាំងភ្នែក រោយភ្នែក ម្ញូប ឈឺក្បាលរបស់គាត់»។ នេះជាការបន្ថែមរបស់ អ្នកស្រី ពេជ្រ ចាន់លីដា។
ជាធម្មតា ស្រី្តវ័យ៣៨ឆ្នាំរូបនេះ ផ្ដល់ពេលវេលាឱ្យកូនស្រីតូច២នាក់របស់ខ្លួន មើលឧបករណ៍អេឡិចត្រូនិកនេះ ចន្លោះពី៣០នាទី ទៅ១ម៉ោង ក្នុងមួយថ្ងៃ។ អ្នកស្រី ពេជ្រ ចាន់លីដា បានអះអាងថា ការបែងចែក និងកំណត់ពេលវេលាបែបនេះ ដោយសារខ្លួនបារម្ភខ្លាចកូនប្រើប្រាស់ទូរសព្ទខុសទិសដៅ និងមានហានិភ័យផ្សេងៗ ពីការប្រើប្រាស់ប្រព័ន្ធអ៊ីនធឺណិត។
មិនខុសពីអ្នកស្រី ពេជ្រ ចាន់លីដា ប៉ុន្មាននោះទេ អ្នកស្រី គុយ វាន្នី ក៏និយមឱ្យកូនមើលទូរសព្ទផងដែរ។ អ្នកស្រី គុយ វាន្នី ឱ្យកូនប្រើប្រាស់ទូរសព្ទសម្រាប់កម្សាន្ត តែនៅពេលល្ងាចប៉ុណ្ណោះ។ អ្នកស្រី វាន្នី ឱ្យកូនមើលទូរសព្ទ ២០នាទីក្នុងមួយថ្ងៃ។ អ្នកស្រី គុយ វាន្នី បានលើកឡើងថា បើមិនបានកំណត់ពេលវេលាត្រឹមត្រូវ អប់រំ និងពន្យល់ ពីផលអាក្រក់នៃការប្រើប្រាស់ទូរសព្ទ និងប្រព័ន្ធអ៊ីនធឺណិតដល់កូនទេ វានឹងនាំឱ្យកូនមានបញ្ហាប្រឈមនាអនាគត។
ស្រ្តីវ័យ៣៤ឆ្នាំរូបនេះ បន្តថា៖ «ខ្ញុំបារម្ភខ្លាំង ពីផលប៉ះពាល់ដល់ការអភិវឌ្ឍខួរក្បាល ភ្នែកខ្សោយ ឆាប់ខឹងមួរម៉ៅ និងឈឺក្បាល ដោយសារកូនមើលទូរស័ព្ទ ទៅជាលែងខ្វល់ជាមួយមនុស្សជុំវិញខ្លួន ជំនួសមកវិញនូវភាពឯកោ»។
![](https://image.thmeythmey.com/pictures/2024/06/03/3620241756a.jpg)
ទូរសព្ទឆ្លាតវៃ ឬហៅថា Smart Phone គឺជាឧបករណ៍បច្ចេកវិទ្យាដ៏ទំនើប និងពេញនិយមសម្រាប់បំពេញតម្រូវការរបស់មនុស្ស នាពេលបច្ចុប្បន្ន។ ដោយសារតែលក្ខណៈពិសេស និងផ្តល់ភាពងាយស្រួលដល់អ្នកប្រើប្រាស់ ជាពិសេសយុវជនបានចំណាយពេលប្រើប្រាស់ទូរស័ព្ទឆា្លតវៃជាច្រើនម៉ោង ក្នុងមួយថ្ងៃៗ។ ជាមួយគ្នានេះ កុមារមួយចំនួនធំ ក៏ត្រូវបានឪពុកម្ដាយ បណ្ដោយឱ្យប្រើប្រាស់ទូរសព្ទឆា្លតវៃនេះ ដើម្បីទស្សនាវីដេអូកុមារ បន្លប់អារម្មណ៍ និងការរំខានដល់ការងារពួកគេ។
កុមារមើលទូស័រព្ទច្រើនម៉ោងក្នុងមួយថ្ងៃ ប្រាកដជាធ្វើឱ្យប៉ះពាល់ដល់សុខភាពរាងកាយ ជាពិសេសគឺភ្នែក។ ចំពោះកុមារ ការប្រើឧបករណ៍អេឡិកត្រូនិកនេះ ពុំបានត្រឹមត្រូវ នឹងបង្កទៅជាម្ញូបភ្នែក ជាពិសេសធ្វើឱ្យភ្នែកស្ងួត, ក្តៅក្រហាយភ្នែក, ហៀរទឹកភ្នែក និងឆាប់រោយភ្នែកជាដើម។ នេះបើតាម លោកបណ្ឌិត អ៊ី លីម៉ា នាយកមជ្ឈមណ្ឌលបណ្តុះបណ្តាលវិជ្ជាជីវៈអស៊ីអស៊ី។
លោកវេជ្ជបណ្ឌិត បានប្រាប់សារព័ត៌មានថ្មីៗថា៖ «កុមារមើលទូរស័ព្ទកាន់តែច្រើន ផលប៉ះពាល់កាន់តែច្រើន តាមរយៈពន្លឺសិប្បនិម្មិត ប្រសិនបើប្រើវាពុំបានត្រឹមត្រូវ។ នៅពេលកុមារប្រឹងសម្លឹងមើលទូរស័ព្ទដោយនៅជិត និងប្រើរយៈពេលច្រើនម៉ោងជាប់គ្នា នោះនឹងធ្វើឱ្យភ្នែកហត់នឿយ ព្រមទាំងប្រឈមនឹងបញ្ហាជាច្រើនទៀត»។
បើតាមលោកបណ្ឌិត អ៊ី លីម៉ា នៅពេលកុមារមើលទូរសព្ទច្រើនពេក ក៏បណ្តាលឱ្យកុមារពិបាកនិយាយស្ដីជាមួយមនុស្សជុំវិញខ្លួន ជាពិសេសមិនមានទំនាក់ទំនងជាមួយអ្នកដទៃ និងអាចកើតជំងឺបាក់ទឹកចិត្តទៀតផង។ លោកបណ្ឌិត អ៊ី លីម៉ា បន្តថា៖«អាណាព្យាបាលមិនគួរឱ្យកូនមើលទូរសព្ទ ដើម្បីខ្លួនអាចធ្វើការងារបានស្រួលនោះទេ។ អាណាព្យាបាល គួរតែឱ្យកូនៗលេងកម្សាន្តផ្សេង ជៀសវៀងមើលទូរសព្ទ»។
ដើម្បីកាត់បន្ថយផលប៉ះពាល់ដល់ភ្នែក តាមរយៈការមើលទូរស័ព្ទឆ្លាតវៃ លោក បណ្ឌិត អ៊ី លីម៉ា បានផ្តល់យោបល់ថា ត្រូវកាត់បន្ថយការប្រើប្រាស់នូវអ្វីដែលមិនចាំបាច់ និងជៀសវាងការមើលជិតពេក ជាពិសេសត្រូវសម្រាកភ្នែកឱ្យបាន១០ ទៅ១៥នាទីម្តង ដោយសម្លឹងមើលទៅឆ្ងាយ។
ដ្បិតការប្រើប្រាស់ប្រព័ន្ធទូរសព្ទ ឬអ៊ីធឺណិតច្រើន មានផលប៉ះពាល់ដល់កុមារក្តី។ ប៉ុន្តែវាក៏មានចំណុចវិជ្ជមាន ក្នុងការប្រើប្រាស់ត្រឹមត្រូវ។ ជាការប្រើប្រាស់ឱ្យបានត្រឹមត្រូវនោះ អ្នកស្រី ពេជ្រ ចាន់លីដា បានឱ្យកូនស្រីតូច២នាក់របស់ខ្លួន មើលមេរៀន និងភាសាខ្មែរតាមទូរសព្ទ។ បើតាមអ្នកស្រី លីដា ទូរសព្ទក៏មានគុណសម្បត្តិ ជួយកូនៗរបស់អ្នកស្រី ឱ្យចេះភាសាបរទេស តាមរយៈស្ដាប់សំឡេងដែរ បើទោះវាអាចបង្កបញ្ហាប្រឈមក្តី។
យ៉ាងណាមិញ អ្នកស្រី គុយ វាន្នី ក៏យល់ថា ការលេងទូស័ព្ទមិនមែនសុទ្ធតែអាក្រក់ទាំងអស់នោះទេ បើសិនជាឱ្យកូនប្រើប្រាស់ត្រឹមត្រូវ, កំណត់ពេលច្បាស់លាស់ និងចាំជួយពន្យល់ប្រាប់កូនៗ គឺអាចជួយឱ្យពួកគេឆ្លាតវៃទៀតផង។ ក្រៅពីនេះ ក្នុងនាមជាអាណាព្យាបាល គួរតែកាត់បន្ថយរយៈពេលកូនលេងទូរស័ព្ទម្ដងបន្ដិចៗ ហើយត្រូវកំណត់កាលវិភាគឱ្យពួកគេប្រើប្រាស់ឱ្យបានត្រឹមត្រូវ៕