លោក ទីវ តារារិទ្ធិ នឹងមានបេសកកម្មផ្សេងព្រេងថ្មី ទៅកាន់ទ្វីបអឺរ៉ុប បន្ទាប់ពីជោគជ័យម្ដងរួចហើយ កាលពីពាក់កណ្ដាលឆ្នាំ២០២៣ ដោយបានជិះកង់ជុំវិញតំបន់អាស៊ាន។ អ្នកជិះកង់រៃអង្គាសសប្បុរសធម៌រូបនេះ បានជិះឆ្លងកាត់ វៀតណាម, ឡាវ, ថៃ, មីយ៉ាន់ម៉ា, ម៉ាឡេស៊ី និងសិង្ហបុរី ដោយប្រើរយៈពេលជាង ៣ខែ លើចម្ងាយផ្លូវ ៩ ៧៥០គីឡូម៉ែត្រ។ ឆ្លងកាត់៦ប្រទេសនេះ លោក តារារិទ្ធិ រៃអង្គាសបានប្រាក់ ៥៦ ២៥៧ដុល្លារ ជួយដល់មន្ទីរពេទ្យកុមារអង្គរ។ 
 

អ្នកជិះកង់វ័យ ៣៥ឆ្នាំរូបនេះ បញ្ជាក់ប្រាប់សារព័ត៌មានថ្មីៗថា ការជិះកង់ និងការផ្សងព្រេង គឺចំណង់ចំណូលចិត្តខ្លួន។ ដូច្នេះហើយ ការធ្វើដំណើរផ្លូវឆ្ងាយ មិនបានធ្វើឲ្យរូបលោក មានចិត្តចង់បោះបង់ឡើយ។ ម្យ៉ាងវិញទៀត លោក តារារិទ្ធិ បន្ថែមថា ការផ្សងព្រេង ដើម្បីកុមារកម្ពុជា តែងដក់ជាប់ក្នុងចិត្ត និងជាកម្លាំងចិត្តដល់រូបលោកឲ្យបន្ដបេសកកម្មនេះ។
 

«ខ្ញុំ បានរកឃើញអ្វីដែលខ្ញុំស្រឡាញ់ គឺការធ្វើដំណើរ។ ខ្ញុំតែងតែមានបំណងប្រាថ្នា និងក្ដីស្រម៉ៃចង់ធ្វើដំណើរទៅឆ្ងាយ។ ខ្ញុំ តែងតែស្រម៉ៃថា ធ្វើរឿងទាំងអស់នេះហើយ ចូលរួមចំណែកទៅជួយសង្គមជាតិយើងតាមរយៈការរៃអង្គាសប្រាក់ឧបត្ថម្ភកុមារកម្ពុជា។ ខ្ញុំ ធ្លាប់គិតចង់បោះបង់ ប៉ុន្ដែមិនមែនបោះបង់គោលដៅទេ គឺគ្រាន់តែសម្រាក ហើយថ្ងៃស្អែកឡើង ខ្ញុំបន្ដបេសកកម្មនេះ ដដែល ព្រោះខ្ញុំតែទន្ទេញថា ការងារនេះ ដើម្បីកុមារកម្ពុជា។ ពាក្យថា«ដើម្បីកុមារកម្ពុជា» គឺធំណាស់សម្រាប់ខ្ញុំ។ ខ្ញុំ មិនអាចសុំចុះចាញ់បានទេ។ ខ្ញុំអាចចាញ់បានថ្ងៃនេះ ប៉ុន្ដែថ្ងៃស្អែកខ្ញុំត្រូវបន្តការងារនេះទៀត។»។ លោក ទីវ តារារិទ្ធិ បាននិយាយដូច្នេះ។
 

ដំណើរផ្សងព្រេងផ្លូវឆ្ងាយ លែងជាការព្រួយបារម្ភទៀតហើយ ព្រោះលោក តារារិទ្ធិ មានបទពិសោធន៍ធ្វើដំណើរ ឆ្លងកាត់ឧបសគ្គជាច្រើន អស់រយៈពេល ៦-៧ឆ្នាំ។ ក្នុងបទពិសោធន៍ផ្សងព្រេងនោះ បុរសវ័យ ៣៥ឆ្នាំរូបនេះ ធ្លាប់វង្វេងក្នុងព្រៃជ្រៅអស់រយៈពេល ៤-៥ថ្ងៃ ផងដែរ។