ជាតិ
លោក ហ៊ុន ម៉ានី៖ការវិភាគមុខងារ នឹងជួយសន្សំថវិកាជាតិ លោក ហ៊ុន ម៉ានី ឧបនាយករដ្ឋមន្រ្តី និងជារដ្ឋមន្រ្តីក្រសួងមុខងារសាធារណៈ។ រូបភាពពីក្រសួងមុខងារសាធារណៈ
× ភ្នំពេញ៖ ការវិភាគមុខងារ មានសារៈសំខាន់នៅក្នុងការកំណែទម្រង់មុខងារសាធារណៈ។ សម្រាប់លោក ហ៊ុន ម៉ានីការវិភាគមុខងារ នឹងចូលរួមជួយសន្សំសំចៃថវិកាជាតិតាមរយៈកាត់បន្ថយតួនាទីត្រួតគ្នា។
ការដឹកនាំរបស់រាជរដ្ឋាភិបាលនីតិកាលទី៧បានកំណត់ស្នូលនៃយុទ្ធសាស្ត្របញ្ចកោណ គឺ ការធ្វើទំនើបកម្មស្ថាប័នរដ្ឋ ឱ្យក្លាយជារដ្ឋបាលសាធារណៈទំនើបប្រកបដោយសមត្ថភាព ខ្ពស់ ខ្លាំង វៃឆ្លាត និងទំនើបកម្មស្ថាប័នរដ្ឋឱ្យក្លាយជារដ្ឋបាលសាធារណៈស្អាតស្អំ ដើម្បី បម្រើផលប្រយោជន៍ជូនប្រជាជនឱ្យកាន់តែប្រសើរ។
សូមអញ្ជើញទស្សនាវីដេអូខាងក្រោមដូចតទៅ៖
ដើម្បីឱ្យគោលដៅនេះទទួលបាននូវភាពជោគជ័យ រាជរដ្ឋាភិបាលបានដាក់ចេញនូវវិធាន ការគន្លឹះក្នុងការកែទម្រង់រដ្ឋបាលសាធារណៈ ដែលក្នុងនោះរួមមានការពង្រឹងសមត្ថភាព និងសមិទ្ធកម្មស្ថាប័ន។ ជាមួយគ្នានេះគណៈកម្មាធិការជាតិជំរុញការអនុវត្តវិធានការគន្លឹះ ក្នុងការកែទម្រង់រដ្ឋបាលសាធារណៈបានណែនាំដល់ក្រសួង ស្ថាប័នឱ្យពិនិត្យឡើងវិញ និងការវិភាគមុខងារនិងរចនាសម្ព័ន្ធរបស់ខ្លួនដើម្បីធានាការរៀបចំនិងការប្រព្រឹត្តទៅរបស់ ក្រសួង ស្ថាប័ន មានប្រសិទ្ធភាពខ្ពស់។
រូបភាពពីក្រសួងមុខងារសាធារណៈ
ទាក់ទងនឹងចំណុចនេះ លោក ហ៊ុន ម៉ានីរដ្ឋមន្រ្តីក្រសួងមុខងារសាធារណៈ ក៏បានលើកឡើង ពីសារៈសំខាន់នៃការវិភាគមុខងារផងដែរ។
នៅក្នុងវគ្គបណ្ដុះបណ្ដាល ស្តីពីការ ពិនិត្យឡើងវិញ ការវិភាគមុខងារ និងរចនាសម្ព័ន្ធក្រសួង-ស្ថាប័ន និងការធ្វើបច្ចុប្បន្នភាព រចនាសម្ព័ន្ធទិន្នន័យមន្រ្តីរាជការស៊ីវិលក្រសួង-ស្ថាប័ន នៅថ្ងៃទី៤ មិថុនា លោក ហ៊ុន ម៉ានីមានប្រសាសន៍ថា ការវិភាគមុខងារ នឹងចូលរួមជួយសន្សំសំចៃថវិកាជាតិតាមរយៈការកាត់បន្ថយតួនាទីត្រួតគ្នា។
រូបភាពពីក្រសួងមុខងារសាធារណៈ
«សូមឱ្យគិតគូរទៅលើលក្ខណៈ ធានានិរន្តរភាពនៃរដ្ឋរបស់យើង ក្នុងរដ្ឋបាលសាធារណៈយូរអង្វែរ។ អ្វីដែលយើងធ្វើនៅក្នុងថ្ងៃនេះ ប្រាកដណាស់ស្របទៅតាមចក្ខុវិស័យរបស់ សម្តេចធិបតី។ តែការរៀបចំផ្ទះយើងស្អាត រឹងមាំ មានភាពធន់នេះ យើងធ្វើទុកឱ្យក្មេងៗ ជំនាន់ក្រោយ»។ នេះជាការបញ្ជាក់បន្ថែមរបស់លោករដ្ឋមន្រ្តីក្រសួងមុខងារសាធារណៈ។
សូមបញ្ជាក់ថា ការពិនិត្យឡើងវិញ និងការវិភាគមុខងារ និងរចនាសម្ព័ន្ធក្រសួង ស្ថាប័ន មានគោលបំណងលើកកម្ពស់ដំណើរការនៃក្រសួងស្ថាប័នឱ្យកាន់តែមានប្រសិទ្ធភាព និង ស័ក្តិសិទ្ធិភាព ក្នុងក្របខណ្ឌនៃការបំពេញមុខងារ និងបេសកកម្មរបស់ខ្លួន ឆ្លើយតបទៅ នឹងយុទ្ធសាស្ត្របញ្ចកោណ ដំណាក់កាលទី១របស់ រាជរដ្ឋាភិបាលក្នុងនីតិកាលទី៧៕
Tag:
ហ៊ុន ម៉ានី
មុខងារ
ថវិកាជាតិ
© រក្សាសិទ្ធិដោយ thmeythmey.com