ធឿន ធារ៉ា កីឡាករប្រដាល់គុនខ្មែរ នឹងត្រូវឡើងសង្វៀន MMA ក្នុងព្រឹត្តិការណ៍ប្រកួតយុទ្ធគុនចម្រុះជើងឯកអាស៊ីលើកទី២ (2nd Asian AMMA Championship) ដែលកម្ពុជាធ្វើជាម្ចាស់ផ្ទះ ចាប់ពីថ្ងៃទី១១-១៣ ខែកក្កដា នៅពហុកីឡដ្ឋានជាតិអូឡាំពិក។ នេះ ជាលើកដំបូងសម្រាប់ កីឡាករប្រដាល់គុនខ្មែររហស្សនាម អ្នកលេងពូថៅពិឃាត ក្នុងសង្វៀនយុទ្ធគុនចម្រុះ។
ក្នុងការធ្វើជាម្ចាស់ផ្ទះរៀបចំព្រឹត្តិការណ៍យុទ្ធគុនចម្រុះជើងឯកអាស៊ី លើកទី២ កម្ពុជា បានត្រៀមអត្ដពលិក ១៦នាក់ ក្នុងនោះកីឡាការិនី ៥នាក់។ ក្នុងចំណោមកីឡាករ ១១នាក់ កីឡាករ ធឿន ធារ៉ា ត្រូវសហព័ន្ធកីឡាយុទ្ធគុនចម្រុះ ជ្រើសរើសឲ្យចូលរួមក្នុងព្រឹត្តិការណ៍នេះ។
លោក ជឹម ធារ៉ា អគ្គលេខាធិការសហព័ន្ធកីឡាយុទ្ធគុនចម្រុះកម្ពុជា បញ្ជាក់ថា ថ្នាក់ដឹកនាំ បានចម្រាញ់យកអត្ដពលិកលំដាប់ប្រទេស ដើម្បីឲ្យចូលរួមក្នុងព្រឹត្តិការណ៍នេះ ព្រោះពេលទទួលបានជ័យលាភី នឹងបង្ហាញពីសក្ដានុពល នៃក្បាច់គុនក្នុងប្រទេសកម្ពុជា។
«ថ្នាក់ដឹកនាំ ចង់ឲ្យតំណាងគុនខ្មែរប្រកួត ព្រោះកម្មវិធីនេះ ជាការប្រកួតពហុវិញ្ញាសា។ ប្រទេសក្នុងតំបន់អាស៊ី ត្រូវជួបជុំគ្នា ប្រកួតលើកីឡាយុទ្ធគុនចម្រុះ។ ដូច្នេះ យើងចង់បង្ហាញពីសក្ដានុពលរបស់ក្បាច់គុនរបស់យើងដែរ។»។ លោក ជឹម ធារ៉ា បាននិយាយដូច្នេះ។
យោងទៅលើការផ្សាយរបស់គណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បញ្ជាក់ថា វត្តមានរបស់ ធឿន ធារ៉ា ក៏បានទទួលគាំទ្រ និងអនុញ្ញាតយល់ព្រមពីលោក អេ ភូថង ដែលជាគ្រូបង្វឹកដែរ។
ដោយឡែក ឈឿង ល្វៃ និង សំ សុវណ្ណកេសា នឹងត្រូវអវត្តមានចំពោះព្រឹត្តិការណ៍នេះ ដោយហេតុផលផ្ទាល់ខ្លួន។ ចំពោះហេតុផលនោះ សាមីខ្លួន សុំមិនបញ្ចេញទេ។
សមាសភាពកីឡាករ-កីឡាការិនី ១៦រូប ដែលត្រូវបានជ្រើសរើសចូលប្រកួតព្រឹត្តិការណ៍ជើងឯកអាស៊ី លើកទី២ មានដូចជា៖ ផេង សុបញ្ញា, ឡុង ឡា, រិន សារដ្ឋ, ហ៊ុន គឹមហ៊ាង, មាស ម៉ើ, Thiago Teixeira , ហ៊ុន ច័ន្ទរាជ្យ, ធាន អាត, ចាន់ រតនា, ធឿន ធារ៉ា, ហាត ភី, ខៀវ ចិន្ដារ័ត្ន, មឿយ ស៊ឹង, គន្ធ វណ្ណនីតា, អ៊ុំ ថារ័ត្ន និង ទួន ស្រីភិន។ ព្រឹត្តិការណ៍នេះ នឹងត្រូវចាប់ផ្ដើមពីថ្ងៃទី១១-១៣ ខែកក្កដា ឆ្នាំ២០២៤ នៅពហុកីឡដ្ឋានជាតិអូឡាំពិក៕