ជាតិ
×![]()
ដោយ: សែម ប្រាក់ដាវ
ភ្នំពេញ៖ ពិព័រណ៍សៀវភៅលើ កប៉ាល់ នៅកំពង់ផែស្វយ័តភ្នំពេញ និស្សិតសុទ្ធតែឱ្យតម្លៃចំពោះសៀវភៅ ដែលធ្វើឱ្យពួកគេយល់ដឹងកាន់តែច្រើនពីវិទ្យាសាស្រ្ត វប្បធម៌ និងចំណេះដឹងថ្មីៗ ជាពិសេសបំផុសគំនិតល្អ។ និស្សិតជាច្រើនបានសម្រុកទៅស្វែងរកសៀវភៅដែលខ្លួនពេញចិត្ត ដោយពួកគេយល់ថា ការអានសៀវភៅធ្វើឱ្យខ្លួនកើនបញ្ញា ដូចជាការឱ្យចំណីខួរក្បាល ។ និស្សិតទាំងនោះ ក៏បានលើកទឹកចិត្តដល់យុវជនឱ្យស្រឡាញ់ និងចូលចិត្តអានសៀវភៅផងដែរ។
លោក សុខ សុវណ្ណ ជានិស្សិតច្បាប់ បានលើកឡើងថា ទម្លាប់អានសៀវភៅច្រើនរាល់ថ្ងៃនឹងជួយបង្កើនចំណេះដឹងនៅជុំវិញខ្លួន ជាពិសេសក៏ជាមធ្យោបាយដើម្បីកាត់បន្ថយការតានតឹងអារម្មណ៍។ សុខ សុវណ្ណ ពិតជាសប្បាយចិត្តដែលមានការតាំងពិព័រណ៍សៀវភៅលើកប៉ាល់ MV Doulos Hope ដែលជាបណ្ណាគារបណ្តែតទឹកធំជាងគេ នៅកំពង់ផែស្វយ័តភ្នំពេញ។ ជាមួយគ្នានេះ សៀវភៅ ធ្វើឱ្យយើងទទួលបានចំណេះដឹងច្រើន ជួយលើកស្ទួយប្រាជ្ញាស្មារតី គិតបានស៊ីជម្រៅ និងបង្កើនចំណេះដឹង ជាពិសេសធ្វើឱ្យពង្រឹងការសរសេរអក្សរមិនខុសដូចមុនបានថែមទៀត។
«ការអានសៀវភៅ គឺធ្វើឱ្យយើងបង្កើនថាមពលខួរក្បាល។ វានឹងជួយថែរក្សាការចងចាំកាន់តែល្អ និងការអានសៀវភៅតែងតែជាឱកាសក្នុងការទទួលបានចំណេះដឹងថ្មីៗជានិច្ច»។ នេះជាការអះអាងបន្ថែមរបស់លោក សុខ សុវណ្ណ។
បន្ថែមពីនេះ បុរសវ័យ២៣ឆ្នាំដែលចូលចិត្តអានសៀវភៅតាំងពីតូចរូបនេះ យល់ច្បាស់ថាការយកប្រាក់ទៅទិញសៀវភៅ មានប្រយោជន៍ជាងយកទៅទិញរបស់មិនចាំបាច់មួយចំនួន។ និស្សិតច្បាប់រូបនេះ ថាការអានសៀវភៅគឺជាផ្នែកមួយចូលរួមបង្កើតធនធានមនុស្ស ដើម្បីអភិវឌ្ឍន៍ប្រទេស។ សុវណ្ណ ក៏លើកទឹកចិត្តយុវជនឱ្យសួរខ្លួនឯង ថាចូលចិត្តអានសៀវភៅប្រភេទណា មុននឹងទិញសៀវភៅមកអាន ដើម្បីបញ្ជៀសការទុកសៀវភៅចោល។
មិនខុសគ្នាពីលោក សុខ សុវណ្ណ ប៉ុន្មាននោះទេ កញ្ញា ពៅ សុខា ក៏យល់ថា សៀវភៅ មានសារៈសំខាន់ដែលធ្វើឱ្យកញ្ញា មានគំនិតថ្មី។ ដោយឡែក កញ្ញា សុខា ចូលចិត្តអានសៀវភៅប្រលោមលោក ដែលពីបង្ហាញពីគោលដៅជីវិត ជួយដល់ស្មាតី ពីភាពជោគជ័យ។
យ៉ាងណាមិញ កញ្ញា សុខា ចង់ឱ្យមានការតាំងពិព័រណ៍សៀវភៅច្រើន ដើម្បីបណ្ដុះគំនិតឱ្យនិស្សិត ឬក្មេងៗ ស្រឡាញ់ និងចូលចិត្តអានសៀវភៅ ជាជាងចំណាយពេលអត់ប្រយោជន៍។ កំពុងទិញសៀវភៅ និស្សិតវ័យ២៤ឆ្នាំរូបនេះ បានបញ្ជាក់ថា ដើម្បីជាជំនួយដល់ការជ្រើសរើសសៀវភៅយកមកអាន ឱ្យទទួលបានប្រយោជន៍ អ្នកអានត្រូវមើលខ្លឹមសារគឺអត្ថន័យ និងអត្ថរូបគឺឃ្លាឃ្លោងសរសេរខុសឬក៏ត្រូវ។
ក្រៅពីនេះ កញ្ញា សុខា ណែនាំដល់យុវវ័យដែលស្ថិតក្នុងដំណាក់កាលអានសៀវភៅដំបូង គួរណាស់តែជ្រើសរើសសៀវភៅណាដែលស្ដើងត្រូវនឹងចំណង់ចំណូលចិត្ត ឬត្រូវនិងជំនាញសិក្សារបស់ខ្លួន។ តាមរយៈការតាំងពិព័រណ៍សៀវភៅលើកប៉ាល់នេះ កញ្ញា សុខា ទទួលបានអារម្មណ៍ប្លែកពីការតាំងពិព័រណ៍នានាដែលកញ្ញាធ្លាប់ទៅទស្សនា។ លើសពីនេះ កញ្ញា សុខា ពិតជាសប្បាយចិត្តដែលកប៉ាល់ MV Doulos Hope ជាបណ្ណាគារបណ្តែតទឹកធំជាងគេ មកតាំងពិព័រណ៍នៅរាជធានីភ្នំពេញ។
សូមជម្រាបថា ពិព័រណ៍សៀវភៅលើកប៉ាល់នេះ ត្រូវបានធ្វើឡើងពីថ្ងៃទី៥ ខែមិថុនា ដល់ថ្ងៃទី៤ ខែកក្កដា ឆ្នាំ២០២៤ មានសៀវភៅរាប់ពាន់ក្បាល ចម្រុះភាសាទទួលមានការចាប់អារម្មណ៍ពីសាធារណជន ជាពិសេសយុវជន។ ការតាំងពិព័រណ៍នេះ ជួយផ្សព្វផ្សាយពីកម្មវិធីអប់រំ វប្បធម៌ និងពិព័រណ៍សៀវភៅសម្រាប់សាលារៀន សហគមន៍ និងសាធារណជន ជាង១៥០ប្រទេស នៅទូទាំងពិភពលោក៕
Tag:
ពិព័រណ៍សៀវភៅលើកប៉ាល់
© រក្សាសិទ្ធិដោយ thmeythmey.com
