អន្តរជាតិ
នយោបាយអន្តរជាតិ
លោក Pita មានទំនុកចិត្តឈ្នះក្ដីក្ដាំរំលាយបក្ស ![](https://image.thmeythmey.com/pictures/2024/06/09/9620241548a.jpg)
×![]()
លោក Pita Limjaroenrat មេដឹកនាំបក្សអនាគតឆ្ពោះទៅមុខដែលឈ្នះការបោះឆ្នោតឆ្នាំមុន បង្ហាញទំនុកចិត្តឈ្នះលើសំណុំរឿងនៅតុលាការដែលអាចឈានដល់ការរំលាយបក្សជុំវិញគោលនយោបាយកែទម្រង់ច្បាប់ដាក់ទោសអ្នកប្រមាថព្រះមហាក្សត្រដ៏តឹងរ៉ឹង
តុលាការធម្មនុញ្ញថៃ កំពុងពិចារណាលើញត្តិរបស់គណៈកម្មការរៀបចំការបោះឆ្នោតដែលស្នើឱ្យបក្សមានសំឡេងច្រើនជាងគេក្នុងសភា។ នៅថ្ងៃទី៩ ខែមិថុនា លោក Pita បានបង្ហាញជំហរការពារប្រាំបួនចំណុចរបស់គណបក្ស ជាមួយក្ដីរំពឹងទទួលជោគជ័យ។
«ខ្ញុំមានទំនុកចិត្តយ៉ាងខ្លាំងជាមួយនឹងការការពារប្រាំបួនចំណុចរបស់ខ្ញុំ។ វាផ្តោតលើយុត្តាធិការ និងនីតិវិធី។» លោក Pita ប្រាប់អ្នកព័ត៌មានបែបនេះ។
លោក Pita ក៏ព្រមានថា ការរំលាយបក្សរបស់លោកដែលជាគណបក្សធំជាងគេនៅសភា អាចនឹងមានផលប៉ះពាល់យ៉ាងធ្ងន់ធ្ងរ។ លោកចាត់ទុកលទ្ធភាពណាមួយឈានដល់ការរំលាយបក្ស ជាការវាយប្រហារលើលទ្ធិប្រជាធិបតេយ្យ។
«វាមិនមែនត្រឹមតែខ្ញុំផ្ទាល់ទេ។ វាមិនមែនគ្រាន់តែជាគណបក្សនោះទេ ប៉ុន្តែជាការនិយាយអំពីការពិភាក្សាលើលំហប្រជាធិបតេយ្យនៅថៃ។» លោក Pita បន្តបែបនេះ។
សូមបញ្ជាក់ថា គណៈកម្មការរៀបចំការបោះឆ្នោតថៃបានស្នើឱ្យតុលាការធម្មនុញ្ញរំលាយបក្សអនាគតឆ្ពោះទៅមុខកាលពីខែខែមីនា ដោយយោងតាមសេចក្តីសម្រេចតុលាការធម្មនុញ្ញដែលថា ការសន្យារបស់គណបក្សក្នុងការធ្វើកំណែទម្រង់ច្បាប់ស្ដីពីការប្រមាថព្រះមហាក្សត្រ ស្មើនឹងការប៉ុនប៉ងផ្តួលរំលំរបបរាជានិយមអាស្រ័យរដ្ឋធម្មនុញ្ញ។
តុលាការនឹងបើកសវនាការលើសំណុំរឿងនេះនៅថ្ងៃទី១២ ប៉ុន្តែទំនងមិនផ្តល់សេចក្តីសម្រេចភ្លាមនោះទេ។ បើតាមលោក Pita មេធាវីរបស់គណបក្សនឹងប្រកែកថា តុលាការមិនមានយុត្តាធិការក្នុងការគ្រប់គ្រងសំណុំរឿងនេះ ហើយថា គណៈកម្មការរៀបចំការបោះឆ្នោតក៏មិនបានដាក់ញត្តិដោយស្របច្បាប់នោះដែរ។
ច្បាប់បរិហារកេរ្តិ៍ព្រះមហាក្សត្រថៃ ស្ថិតក្នុងចំណោមច្បាប់តឹងរ៉ឹងបំផុតក្នុងពិភពលោក ដោយបទចោទនីមួយៗអាចជាប់ពន្ធនាគាររយៈពេល១៥ឆ្នាំ។ ប៉ុន្តែអ្នករិះគន់និយាយថា ច្បាប់នេះត្រូវបានគេប្រើខុសដើម្បីរារាំងការជជែកដេញដោលផ្នែកនយោបាយស្របច្បាប់៕
© រក្សាសិទ្ធិដោយ thmeythmey.com