អន្តរជាតិ
កំណើនជនបរទេសកើតនៅអាមេរិកបំបែកកំណត់ត្រា ទោះជាកំណើនពលរដ្ឋថយចុះក៏ដោយ
×![]()
ដោយ: VOA
ជនបរទេសគឺមនុស្សមិនមែនជាពលរដ្ឋអាមេរិកាំងកើតនៅអាមេរិកកើនឡើងច្រើនជាងពេលមុនៗ ទោះជាកំណើនប្រជាជនយឺតក៏ដោយ។
លោក William Frey ជាអ្នកប្រជាសាស្ត្រនិងជាអ្នកស្រាវជ្រាវជាន់ខ្ពស់នៅស្ថាប័ន Brookings។ លោកនិយាយថា«កំណើនចំនួនប្រជារាស្ត្រជាក់ស្តែងអាចមានច្រើនជាងតួលេខ កាលពីទសវត្សរ៍មុន។ កំណើននេះមិនច្រើនដូចកាលពីទសវត្សរ៍មុនៗទេ ជាពិសេសក្នុងទសវត្សរ៍ឆ្នាំ១៩៩០និងទសវត្សរ៍២០០០»។
ជនបរទេសកើតនៅអាមេរិកបានកើនពី១៩លាននាក់ទៅ៣១លាននាក់ គឺកើនឡើង១២លាននាក់ពីឆ្នាំ១៩៩០ដល់ឆ្នាំ២០០០។ ចំនួនជនទាំងនេះបានកើនតែ៦លាន២សែននាក់គឺពី៤០លាននាក់ទៅ៤៦លាន២សែននាក់ពីឆ្នាំ២០១០ដល់ឆ្នាំ២០២២។
លោក Frey ថ្លែងថា ការយឺតយ៉ាវនេះអាចបណ្តាលមកពីកត្តាធំៗមួយចំនួន។លោកថា«រដ្ឋបាលលោក Trump បានកាត់បន្ថយកំណើនជនអន្តោប្រវេសន៍ខ្លះតាមរយៈទិដ្ឋភាពនានានៃគោលនយោបាយរបស់ពួកគេ ហើយបន្ទាប់មកក៏មានការរាតត្បាតជំងឺកូវីដ១៩។ តែ នៅដំណាច់រយៈពេលនោះ ចំនួននេះក៏កើនឡើងទៀត តែយើងមិនឃើញកំណើនពិតប្រាកដទេរហូតដល់ឆ្នាំបន្ទាប់ឬមួយឆ្នាំក្រោយមកទៀត នៅពេលចំនួននៃកំណើនជនបរទេសចេញផ្សាយនៅក្នុងសេចក្តីរាយការណ៍មួយចំនួន នាពេលបន្ទាប់មក»។
ទោះជាមានការបញ្ជាក់ពីពេលមុនថា ចំនួនជនអន្តោប្រវេសន៍បានកើនលឿនជាងមុនក្នុងឆ្នាំ២០២៣ក៏ដោយ ក៏លោក Frey រំពឹងថា កំណើនប្រជាជនទូទៅនឹងយឺតជាងមុន នៅពេលអនាគត។
លោកពោលថា«ជាពិសេសក្នុងចំណោមប្រជារាស្ត្រវ័យក្មេង។ ដើម្បីកែលម្អកម្លាំងពលកម្ម ដើម្បីឱ្យមានមនុស្សច្រើនជាងមុនចូលក្នុងកម្លាំងពលកម្ម យើងត្រូវតែបង្កើនអន្តោប្រវេសន៍របស់យើង។ ការណ៍នេះមានលក្ខណៈនយោបាយខ្លាំងណាស់ តែខ្ញុំយល់ថា វាជាវិធីសេដ្ឋកិច្ចរសើបមួយគឺធ្វើឱ្យប្រាកដថា យើងនៅតែមានកម្រិតអន្តោប្រវេសន៍សមរម្យតទៅទៀត»។
តួលេខនៃជំរឿនប្រជារាស្ត្របង្ហាញថា កម្រិតសិក្សាអប់រំនៃមនុស្សកើតនៅប្រទេសក្រៅមករស់នៅក្នុងសហរដ្ឋអាមេរិក កំពុងកើនឡើង។ ក្នុងឆ្នាំ២០១០ ចំនួន៦៨%នៃមនុស្សក្នុងក្រុមនេះបានរៀនចប់វិទ្យាល័យឬខ្ពស់ជាងនេះ ចំណែកក្នុងឆ្នាំ២០២២ ចំនួននេះបានកើនឡើងដល់៧៥%។
នៅក្នុង រដ្ឋដែលមានជនអន្តោប្រវេសន៍ច្រើនបំផុត ដូចជារដ្ឋ California មាន២៦,៥% រដ្ឋ New Jersey មាន២៣,២% រដ្ឋ New York មាន២២,៦% និងរដ្ឋ Florida មាន២១,១%--មនុស្សកើតនៅប្រទេសក្រៅមានជាងមួយភាគប្រាំនៃប្រជាពលរដ្ឋសរុប៕
ប្រែសម្រួលដោយលោក ឈឹម សុមេធ
© រក្សាសិទ្ធិដោយ thmeythmey.com
