ទំហំកម្ចីដែលកម្ពុជាកិច្ចព្រមព្រៀងលើនេះ មានសមមូលនឹង១០៥,២៥លានអេសដេអ៊ែរ ដែលស្មើនឹងប្រមាណ៦ភាគរយនៃពិតានដែលច្បាប់អនុញ្ញាត (១ ៧០០ លានអេសដេអ៊ែ)ក្នុងឆ្នាំ២០២៤។ បើតាមស្ថិតិពីក្រសួងសេដ្ឋកិច្ច ទំហំកម្ចីទាំង១៤០,១៤លានដុល្លារនេះ គឺជាកម្ចីក្នុងក្របខ័ណ្ឌទ្វេភាគី។ 

 

« ឥណទានទាំងនេះ សុទ្ធសឹងជាឥណទានមានកម្រិតសម្បទានខ្ពស់ ដោយមានធាតុអំណោយជាមធ្យមប្រមាណ៤០ភាគរយ។ គោលដៅនៃការចុះកិច្ចព្រមព្រៀងឥណទានថ្មីទាំងនេះ គឺសម្រាប់បំពេញតម្រូវការហិរញ្ញប្បទានក្នុងវិស័យអាទិភាពរបស់រាជរដ្ឋាភិបាល សំដៅរួមចំណែកទ្រទ្រង់ចីរភាពនៃកំណើន រយៈពេលវែង និងបង្កើនផលិតភាពសេដ្ឋកិច្ច ឬផលិតភាព ផលិតកម្ម»។ ក្រសួងសេដ្ឋកិច្ចបានអះអាងបែបនេះនៅក្នុងព្រឹត្តិបត្រសិ្ថតិបំណុលសាធារណៈកម្ពុជា ដែលកម្ចីទាំងនោះនឹងយកអភិវឌ្ឍនវិស័យសំខាន់នានា។ ក្នុងនោះ ទំហំកម្ចីប្រមាណ៥២ភាគរយ រដ្ឋាភិបាលនឹងយកអភិវឌ្ឍវិស័យវិស័យដឹកជញ្ជូន។ 

 

ជាមួយនឹងទំហំកម្ចីថ្មីនេះ​ រដ្ឋាភិបាលក៏បានទូទាត់សងបំណុលក្នុងនិងក្រៅប្រទេស បានចំនួន១៨១,៥៥លានដុល្លារ ផងដែរ។  ក្នុងនោះ រដ្ឋសងបំណុលក្រៅប្រទេសអស់១៨១លានដុល្លារ ខណៈការសងបំណុលក្នុងស្រុកអស់៥៥ម៉ឺនដុល្លារ។ ទំហំទឹកប្រាក់ដែលរដ្ឋាភិបាលទូទាត់សង នៅក្នុងត្រីមាសទី១នេះ មានកំណើន០,៥ភាគរយ បើធៀបនឹងគ្រាដូចគ្នាកាលឆ្នាំ២០២៣។ 

 

ត្រឹមដំណាច់ត្រីមាសទី១​ ឆ្នាំ២០២៤ កម្ពុជាមានសន្និធិបំណុលសាធារណៈសរុប១១,០៩ប៊ីលានដុល្លារ ក្នុងនោះ បំណុលក្រៅប្រទេសមានដល់១១ប៊ីលានដុល្លារ ស្មើនឹង៩៩,១២ភាគរយនៃបំណុលសរុប។​ បើតាមក្រសួងសេដ្ឋកិច្ច ក្នុងចំណោមបំណុលក្រៅប្រទេស​នេះ គឺមានប្រមាណ៦៤ភាគរយ ជាកម្ចីក្នុងក្របខ័ណ្ឌទ្វេភាគី ហើយ​ប្រទេសដែលកម្ពុជាជំពាក់ច្រើនជាងគេនោះ គឺប្រទេសចិន។ បន្ទាប់មក គឺជប៉ុន កូរ៉េខាងត្បូង និងប្រទេសបារាំង៕