រាជរដ្ឋាភិបាល បានកំណត់យកថ្ងៃទី១៥ ខែមិថុនា ជារៀងរាល់ឆ្នាំ ដើម្បីលើកកម្ពស់គុណភាព គុណតម្លៃ ការបណ្ដុះបណ្ដាលជំនាញវិជ្ជាជីវៈ។ រាជរដ្ឋាភិបាលកម្ពុជា បានចាត់ទុកការបណ្ដុះបណ្ដាលជំនាញបច្ចេកទេស ជាមុមសំខាន់មួយ នៃយុទ្ធសាស្រ្តបញ្ចកោណទី១ «ការអភិវឌ្ឍមូលធនមនុស្ស» ដែលជារបៀបវារៈក្នុងការកសាង និងអភិវឌ្ឍមូលធនមនុស្សប្រកបដោយគុណភាព សមត្ថភាព ជំនាញវិជ្ជាជីវៈច្បាស់លាស់ គំនិតច្នៃប្រឌិត និងភាពប្រកួតប្រជែងខ្ពស់។

 

«ពលរដ្ឋម្នាក់ មានជំនាញមួយយ៉ាងតិចប្រចាំជីវិត ជាពិសេសសម្រាប់យុវជន ដែលជាកម្លាំងពលកម្មជំនាញដ៏មានសក្ដានុពល»។ សម្ដេច ហ៊ុន ម៉ាណែត ថ្លែងដូច្នេះ។ 

 

យុវជនមកពីគ្រួសារក្រីក្រនិងងាយរងហានិភ័យទូទាំងប្រទេសប្រមាណ ១,៥ លាននាក់ នឹងមានជំនាញវិជ្ជាជីវៈសញ្ញាបត្រកម្រិត១ ដោយមិនបង់ថ្លៃ និងទទួលបានប្រាក់ឧបត្ថម្ភចំនួន ២៨ម៉ឺនរៀលក្នុងមួយខែ។ កម្មវិធីនេះ ត្រូវបានរដ្ឋាភិបាលអនុវត្តជាផ្លូវការកាលពីថ្ងៃទី១៤ ខែវិច្ឆិកា ឆ្នាំ២០២៣។ 

 

រាជរដ្ឋាភិបាលកម្ពុជា លើកទឹកចិត្តឱ្យអាណាព្យាបាល អនុញ្ញាតឱ្យកូនចៅរបស់ខ្លួនមកចុះឈ្មោះ និងទទួលការបណ្ដុះបណ្ដាលជំនាញបច្ចេកទេស និងវិជ្ជាជីវៈ ឱ្យកាន់តែច្រើន។ ការរៀនជំនាញវិជ្ជាជីវៈ ជាការវិនិយោគរយៈពេលខ្លី ឆាប់ចប់ ឆាប់ទទួលបានផល និងមានជំនាញមួយច្បាស់លាស់សម្រាប់អនាគត៕