ជាតិ
លោក ហ៊ុន សែន នឹងធ្វើអធិបតីភាពក្នុងពិធីរម្លឹកខួបកំណើតបក្សដែលមានអាយុបងលោក១ឆ្នាំ រូបថតពីហ្វេសប៊ុកគណបក្សប្រជាជនកម្ពុជា
× លោក ហ៊ុន សែន នឹងធ្វើជាអធិបតីភាពក្នុងនាមជាប្រធានគណបក្សប្រជាជនកម្ពុជា ជាលើកដំបូងនៅក្នុងពិធីរម្លឹកខួបឆ្នាំទី៦៤ នៃការបង្កើតគណបក្សប្រជាជនកម្ពុជា ដែលមានអាយុលើសលោកមួយឆ្នាំ។ ពិធីនឹងត្រូវរៀបចំធ្វើដូចរាល់ឆ្នាំនៅទីស្នាក់ការកណ្តាល គ.៨៥ ក្នុងរាជធានីភ្នំពេញនៅថ្ងៃទី២៨មិថុនានេះ។
ក្រុមការងាររៀបចំពិធីបានកំពុងបង្ហើយការងារត្រៀមរៀបចំនៅថ្ងៃសៅរ៍នេះទៀត។ អ្នកនាំពាក្យគណបក្សកាន់អំណាចមួយនេះ លោក សុខ ឥសាន បានប្រាប់សារព័ត៌មានថ្មីៗនៅព្រឹកនេះថា សមាជិកជាង១ម៉ឺននាក់នឹងចូលរួមក្នុងពិធីរម្លឹកខួបនៃការបង្កើតគណបក្សលើកទី៦៤នេះ។
អ្នកនាំពាក្យរូបនេះមិនទាន់ហ៊ានបញ្ជាក់ច្បាស់អំពីសារនយោបាយអ្វីខ្លះដែលនឹងអាចប្រកាសនៅក្នុងពិធីនៅថ្ងៃអាទិត្យនេះ ដោយប្រធានថ្មីរបស់គណបក្ស នោះទេ។ ប៉ុន្តែលោកបានបង្ហើបយ៉ាងដូច្នេះថា៖«សម្តេចប្រធានគណបក្សអាចនឹងរម្លឹកអំពីប្រវត្តិនៃកំណើតគណបក្ស ទី២អាចបង្ហាញលទ្ធផលនៃការអនុវត្តការងារក្រោយមហាសន្និបាតវិសាមញ្ញកាលពីចុងខែមករាកន្លងទៅ និងលទ្ធផលនៃការសម្រេចនៃសន្និបាតគណៈកម្មាធិការកណ្តាលលើកទី៣៨កាលពីពេលថ្មីៗនេះ»។
លោក សុខ ឥសាន បានបញ្ជាក់ផងដែរថា ឯកអគ្គរាជទូត ឯកអគ្គរដ្ឋទូត ប្រចាំកម្ពុជា និងគណបក្សសម្ព័ន្ធភាពរបស់គណបក្សប្រជាជនកម្ពុជា ក៏ត្រូវបានអញ្ជើញឲ្យចូលរួមក្នុងពិធីនៅថ្ងៃអាទិត្យនេះដែរ៕
© រក្សាសិទ្ធិដោយ thmeythmey.com