ជាតិ
សេដ្ឋកិច្ច
×![]()
សៀមរាប៖ ការដើរកម្សាន្តរបស់ប្រជាពលរដ្ឋខ្មែរក្នុងពិធីបុណ្យភ្ជុំបិណ្ឌរយៈពេល៣ នៅលើទឹកដីអង្គរ គឺមានការកើនឡើង បើប្រៀបធៀបទៅនឹងឆ្នាំទៅ។ នេះបើតាមការអះអាងពីអ្នកបម្រើសេវាកម្មផ្នែកទេសចរណ៍។
ក្នុងថ្ងៃបុណ្យភ្ជុំបិណ្ឌកន្លងមកនេះ គេសង្កេតឃើញមានប្រជាពលរដ្ឋខ្មែរមួយចំនួន បានធ្វើដំណើរមកកម្សាន្តរមណីយដ្ឋានអង្គរវត្ត ជាលក្ខណៈដៃគូ និងខ្លះជាលក្ខណៈក្រុមគ្រួសារ។ ភ្ញៀវទេសចរទាំងនោះ មានអ្នកខេត្តសៀមរាប និងមួយចំនួនធំមកពីតាមបណ្តាខេត្តនានា។
សម្រាប់អ្នកបម្រើសេវាកម្មផ្នែកទេសចរណ៍មើលឃើញថា ការដើរកម្សាន្តរបស់ភ្ញៀវទេសចរនៅក្នុងពិធីបុណ្យភ្ជុំបិណ្ឌនៅឆ្នាំនេះ មានការកើនឡើងខ្លះ ជារួមចំនួននេះគឺកើនឡើងតែបន្តិចបន្តួចតែប៉ុណ្ណោះ។ យ៉ាងណា បើតាមការបញ្ជាក់របស់មគ្គុទេសក៍ទេសចរណ៍ ការធ្លាក់ចុះនេះគឺបណ្តាលមកពីពលរដ្ឋខ្មែរភាគច្រើន ចង់ជួបជុំ និងប្រើពេលច្រើនជាមួយក្រុមគ្រួសារ ជាជាងដើរកម្សាន្តនៅទីឆ្ងាយៗ ។
ជាងថតរូបនៅអង្គរវត្ត លោក ដេវីត មើលឃើញការកើនឡើងចំនួនភ្ញៀវទេសចរតាមរយៈការថតរូបសន្លឹករបស់លោក។ ក្នុងថ្ងៃបុណ្យភ្ជុំបិណ្ឌ លោក ដេវីត អាចរកចំណូលពីការថតរូបបានប្រមាណ ១៥ម៉ឺនក្នុងមួយថ្ងៃៗ ។ ការណ៍នេះធ្វើឲ្យលោក ដេវីត មមាញឹកខ្លាំង ហើយថែមទាំងគ្មានពេលនាំក្រុមគ្រួសារដើរកម្សាន្តទៅទីណានោះទេ។ លោក ដេវីត បន្ថែម៖« យើងរកបានតែពេលបុណ្យទានហ្នឹងហើយ...ទេសចរជាតិច្រើនជាងបរទេស ហើយពួកគាត់ចូលចិត្តថតរូបជាក្រុមគ្រួសារទុកជាភស្តុតាង ថាបានមកលេងអង្គរ សៀមរាប...»។
អ្នកឆែកសំបុត្រចូលទស្សនានៅមុខប្រាសាទអង្គរវត្ត ដែលសុំមិនបញ្ចេញអត្តសញ្ញាណ អះអាងថា អំឡុងពេលថ្ងៃឈប់សម្រាកប៉ុន្មានថ្ងៃនេះ ភ្ញៀវទេសចរជាតិមានចំនួនប្រហាក់ប្រហែលដូចឆ្នាំទៅ។ យ៉ាងណា ភ្ញៀវទេសចរអន្តរជាតិដែលមកកម្សាន្តអំឡុងពេលនេះ គឺទេសចរថៃ និងចិន។
ដោយឡែក លោក ជា ប៊ុនណាត មគ្គុទ្ទេសក៍ទេសចរណ៍ភាសាអង់គ្លេសមើលឃើញថា ចំនួនភ្ញៀវទេសចរទាំងជាតិ និងអន្តរជាតិ មានការធ្លាក់ចុះ។ លោក ប៊ុនណាត ដែលកំពុងជូនភ្ញៀវដើរកម្សាន្តនៅអង្គរវត្តនោះពន្យល់ថា៖« ពិធីបុណ្យភ្ជុំបិណ្ឌគឺជាពិធីប្រពៃណីជាតិ ហើយប្រជាជនភាគច្រើនបានធ្វើដំណើរពីទីជិតទីឆ្ងាយ ទៅជួបជុំក្រុមគ្រួសារ។ ពួកគេ បានបង្កើតកម្មវិធីជួបជុំគ្រួសារ ជំនួសការដើរកម្សាន្តនានា ដែលប្រើពេលច្រើន»។
យោងតាមរបាយការណ៍របស់មន្ទីរទេសចរណ៍ខេត្តសៀមរាប បានបង្ហាញថាចំនួនទេសចរជាតិមានការកើងឡើងដែរតែកើនបន្តិតតែប៉ុណ្ណោះ បើធៀបនឹងឆ្នាំទៅ។ យោងតាមរបាយការណ៍ដដែលបានបង្ហាញថា ចាប់ពីថ្ងៃទី១០ ដល់ថ្ងៃទី១២ ខែតុលា មានភ្ញៀវទេសចរចំនួន ១២៣,០០៦នាក់ គឺភ្ញៀវជាតិមានចំនួន ១០៨,៥០០នាក់ កើនឡើង ៦,៥៨% និងទេសចរអន្តរជាតិមានចំនួន ១៤,៥០៦នាក់ ថយចុះ ១០,៨៥%៕
© រក្សាសិទ្ធិដោយ thmeythmey.com
