អន្តរជាតិ
នយោបាយអន្តរជាតិ
ក្រិកត្រៀមបោះឆ្នោតទទួលស្គាល់រដ្ឋប៉ាឡេស្ទីនជាផ្លូវការ
×
សភាក្រិក នឹងបោះឆ្នោតសម្រេចទទួលស្គាល់រដ្ឋប៉ាឡេស្ទីនជាផ្លូវការ នៅថ្ងៃអង្គារនេះ ស្របពេលដែលប្រធានាធិបតីប៉ាឡេស្ទីន លោក ម៉ាមូត អាបាស (Mahmoud Abbas) ទៅទស្សនកិច្ចផ្លូវការនៅប្រទេសក្រិកនេះ។ ការត្រៀមប្រកាសទទួលស្គាល់រដ្ឋប៉ាឡេស្ទីន កើតឡើងក្រោយនាយករដ្ឋមន្ត្រីក្រិក ធ្វើដំណើរទស្សនកិច្ចទៅកាន់អ៊ីស្រាអែល។
សូមស្តាប់ព័ត៌មានដូចតទៅ៖
ថ្ងៃអង្គារទី ២២ ខែធ្នូនេះ សភាក្រិកនឹងបោះឆ្នោតត្រួសត្រាយផ្លូវ ដល់រដ្ឋាភិបាលក្រុងអាថែន ដើម្បីទទួលស្គាល់រដ្ឋប៉ាឡេស្ទីនជាផ្លូវការ។ ការបោះឆ្នោត និងការជជែកដេញដោលគ្នាពាក់ព័ន្ធការទទួលស្គាល់ប៉ាឡេស្ទីន ក្នុងចំណោមសមាជិកសភាក្រិកនេះ កើតមានឡើងស្របពេលប្រធានាធិបតីប៉ាឡេស្ទីន លោក ម៉ាមូត អាបាស មកទស្សនកិច្ចនៅក្រិកចំនួន២ថ្ងៃ។ លោកក៏នឹងឡើងថ្លែងសុន្ទរកថានៅក្នុងសភាក្រិកផងដែរ។
នាយករដ្ឋមន្ត្រីក្រិកលោក Alexis Tsipras បានជួបជជែកពិភាក្សា ជាមួយប្រមុខរដ្ឋប៉ាឡេស្ទីន កាលពីថ្ងៃចន្ទផងដែរ។ ការបោះឆ្នោតនេះដែរ កើតមានក្រោយគណៈកម្មាធិការកិច្ចការបរទេសសភា បានសម្រេចបោះឆ្នោតអនុម័ត ញ្ញត្តិបើកផ្លូវឲ្យមានការបោះឆ្នោតក្នុងសភា ដើម្បីទទួលស្គាល់រដ្ឋប៉ាឡេស្ទីនជាផ្លូវការតែម្តង។
រដ្ឋាភិបាលក្រិកបានបង្ហាញជំហរមួយ ដោយទទួលស្គាល់រដ្ឋប៉ាឡេស្ទីន ដែលកំណត់យកទឹកដីរដ្ឋនេះភាគច្រើន ត្រូវបានអ៊ីស្រាអែលកាន់កាប់ពីឆ្នាំ ១៩៦៧ ។ ប៉ុន្តែដំណោះស្រាយដែលអនុម័តដោយសភាក្រិក មិនមានអំណាចចាប់បង្ខំ និងមិនអាចផ្តល់ការទទួលស្គាល់ពេញលេញតាមផ្លូវច្បាប់ ដល់រដ្ឋប៉ាឡេស្ទីនឡើយ។ តែយ៉ាងហោចណាស់ វាជាសញ្ញាវិជ្ជមាន និងបង្ហាញច្បាស់ពីជំហររបស់ក្រិក ចំពោះប្រជាជនប៉ាឡេស្ទីន។
កន្លងមកសភា អឺរ៉ុបក៏បានអនុម័តដំណោះស្រាយស្រដៀងគ្នានេះដែរ ហើយរដ្ឋអឺរ៉ុបជាច្រើនមានទាំងស៊ុយអែត អង់គ្លេស ជាដើមបានសម្រេចបោះឆ្នោតប្រកាសទទួលស្គាល់រដ្ឋប៉ាឡេស្ទីនជាផ្លូវការ។ ទំនោរទទួលស្គាល់រដ្ឋប៉ាឡេស្ទីន កើតឡើងក្រោយជម្លោះអ៊ីស្រាអែល និងប៉ាឡេស្ទីនផ្ទុះឡើងកាន់តែខ្លាំង រហូតអ៊ីស្រាអែល ទម្លាក់គ្រាប់ប្រឆាំងជនស៊ីវិលប៉ាឡេស្ទីននៅតំបន់កាហ្សា ស្លាប់អស់ជាច្រើនពាន់នាក់នៅអំឡុងខែកក្កដាឆ្នាំមុន។
កាលពីថ្មីៗនេះដែរទង់ជាតិប៉ាឡេស្ទីន ត្រូវបានគេបង្ហូតឡើងជាលើកដំបូងបំផុតនៅស្ថាប័នអង្គការសហប្រជាជាតិ ហើយការបង្ហូតទង់ជាតិឡើងនេះជាក្តីសង្ឃឹមសម្រាប់ប្រជាជនប៉ាឡេស្ទីនដែលពលីជីវិតដើម្បីឯករាជ្យ និងបូរណភាពទឹកដីរបស់ខ្លួនអស់រាប់ទសវត្សន៍មកហើយនោះ៕
Tag:
ក្រិក
ប៉ាឡេស្ទីន
© រក្សាសិទ្ធិដោយ thmeythmey.com