អន្តរជាតិ
ឥណ្ឌាត្រូវការថាមពលនុយក្លេអ៊ែរនិងអាវុធរុស្ស៊ីដើម្បីពង្រឹងឥទ្ធិពល
× នាយករដ្ឋមន្ត្រីឥណ្ឌា លោក នារិន្ទ្រា ម៉ូឌី (Narendra Modi) អញ្ជើញទៅទស្សនកិច្ចនៅក្នុងប្រទេសរុស្ស៊ីចាប់ពីទី២៣ ស្អែកនេះ។ វត្តមានប្រមុខរដ្ឋាភិបាលក្រុងដេលី ក្នុងកិច្ចប្រជុំរុស្ស៊ីឥណ្ឌា បង្ហាញពីការពង្រឹងចំណងមិត្តភាពទ្វេភាគី រវាងមហាយក្សអាស៊ីខាងត្បូង ជាមួយមហាអំណាចរុស្ស៊ី។ មេដឹកនាំប្រទេសទាំងពីរ នឹងចុះកិច្ចព្រមព្រៀងលើវិស័យជាច្រើន ទាំងការទិញលក់សព្វាវុធ វិស័យថាមពលនុយក្លេអ៊ែរ និងវិស័យសេដ្ឋកិច្ចផង។ យ៉ាងណាក៏ដោយ ឥណ្ឌាកំពុងត្រូវការអាវុធ ដើម្បីពង្រឹងសន្តិសុខក្នុងនាមជាមហាអំណាចតំបន់ ស្របពេលដែលប្រទេសនេះ ស្រេកឃ្លានថាមពលដើម្បីជំរុញនិរន្តរភាពសេដ្ឋកិច្ច និងកាត់បន្ថយភាពក្រីក្រ។
សូមស្តាប់ការបកស្រាយរបស់លោក សៅ ផលនិស្ស័យ៖
ដំណើរទស្សនកិច្ចជាផ្លូវការលើកដំបូងបំផុតទៅកាន់រុស្ ស៊ីរបស់នាយករដ្ឋមន្ត្រីឥណ្ឌាលោក នារិន្ទ្រា ម៉ូឌី នឹងចាប់ផ្តើមចាប់ពីថ្ងៃស្អែកនេះ។ គោលបំណងសំខាន់នៃទស្សនកិច្ចផ្លូវការរបស់នាយករដ្ឋមន្ត្រីឥណ្ឌានេះ គឺចូលរួមកិច្ចប្រជុំកំពូលរុស្ស៊ី-ឥណ្ឌាលើកទី១៦ ដែលកិច្ចប្រជុំនេះ កាលពីឆ្នាំមុនត្រូវបានរៀបចំឡើងនៅឥណ្ឌា។ កាលពីឆ្នាំមុន គ្រាន់តែជួបប្រជុំគ្នាមិនដល់២៤ម៉ោងផង មេដឹកនាំទាំងពីរបានចុះហត្ថលេខាលើកិច្ចព្រមព្រៀងជាង២០ ដែលមានតម្លៃមិនតិចជាង១០០ពាន់លានដុល្លារឡើយ ហើយភាគីទាំងពីរ បន្តឯកភាពគ្នាដើម្បីចរចារលើបញ្ហាជាច្រើន ដែលអាចពង្រឹងទំនាក់ទំនង និងសហប្រតិបត្តិការនៃប្រទេសទាំងពីរ។
ទស្សនកិច្ចលើកនេះ ក៏មានកិច្ចព្រមព្រៀងមិនតិចដែរ ដែលលោក នារិន្ទ្រាម៉ូឌី និងលោកពូទីនត្រៀមចុះរួមគ្នា។ ការពង្រឹងកិច្ចសហប្រតិបត្តិការលើវិស័យថាមពលនុយក្លេអ៊ែរ និង វិស័យការពារជាតិ ក្លាយជាប្រធានបទសំខាន់ជាងគេ ក្នុងកិច្ចប្រជុំលើកនេះ។ ចំណែកចំណងសេដ្ឋកិច្ចទ្វេភាគី ក្លាយជារឿងបន្ទាប់បន្សំ។
១.ឥណ្ឌាត្រូវការ ថាមពលនុយក្លេអ៊ែរដើម្បីនិរន្តរភាពសេដ្ឋកិច្ច និងអាវុធដើម្បីរក្សាសន្តិសុខ
គេវាយតម្លៃជាមុនថា រឿងសំខាន់បំផុតក្នុងដំណើរនេះ គឺការបញ្ជាទិញសព្វាវុធច្រើនប្រភេទ ក្នុងទំហំទឹកប្រាក់ច្រើនជាង៧ពាន់លាន់ដុល្លារអាមេរិក និងការសម្រេចកិច្ចព្រមព្រៀងសាងសង់រោងចក្រថាមពលនុយក្លេអ៊ែរ ប្រើសម្រាប់ប្រយោជន៍ស៊ីវិល។ តាមពិតទៅឥណ្ឌា កំពុងស្រេកឃ្លានថាមពលខ្លាំងជាងអ្វីៗទាំងអស់ ព្រោះមហាយក្សអាស៊ីខាងត្បូងមួយនេះប្រឈមបញ្ហាច្រើន ជាពិសេសកង្វះថាមពល ស្របពេលដែលសេដ្ឋកិច្ចខ្លួនកំពុងមានសន្ទុះ។ ឥណ្ឌាត្រូវការការសហការ និងបច្ចេកវិទ្យាសម្រាប់សង់រោងចក្រថាមពលនុយក្លេអ៊ែរ។
បើយោងតាមសារព័ត៌មានឥណ្ឌា Economic Times ក្នុងដំណើរទស្សនកិច្ចនេះ ឥណ្ឌានឹងផ្តល់ទីតាំងនៅ Andhra Pradesh សម្រាប់ក្រុមហ៊ុនរុស្ស៊ី សាងសង់រោងចក្រអគ្គិសនីដើរដោយថាមពលនុយក្លេអ៊ែរ ប្រហែល៥ទៅ៦ រឿងដែរ។ រោងចក្រនេះនឹងជួយឲ្យឥណ្ឌា ដែលកំពុងងើបឡើងក្នុងនាមជាមហាអំណាចអាស៊ីខាងត្បូង អាចទាញវិនិយោគទុន ឈានទៅកាត់បន្ថយភាពក្រីក្រ បង្កើនផលិតកម្ម និងធ្វើឧស្សាហូបនីយកម្មថែមទៀត។
ចំណែករឿងមួយទៀត គឺការនាំចូលអាវុធពីរុស្ស៊ី ក្នុងតម្លៃរាប់ពាន់លានដុល្លារ។ រយៈពេលប៉ុន្មានឆ្នាំចុងក្រោយ ឥណ្ឌាប្រឹងពង្រឹងអំណាចយោធារបស់ខ្លួន ធ្វើទំនើបកម្មយោធា ដោយនាំអាវុធចូលផង ជំរុញការផលិតអាវុធក្នុងស្រុកផង។ លើកនេះ ឥណ្ឌានឹងនាំចូលអាវុធការពារដែនអាកាសស៊េរី S-400 ប្រហែល៥គ្រឿងពីរុស្ស៊ី ដើម្បីពង្រឹងសមត្ថភាពការពារដែនអាកាសផងដែរ។
មូលហេតុនៅពីក្រោយការពង្រឹងអំណាចយោធារបស់មហាអំណាចឥណ្ឌា ក្រៅពីជួយលើកមុខមាត់ខ្លួនជាមហាអំណាច ឥណ្ឌាក៏កំពុងប្រឈមបញ្ហាសន្តិសុខច្រើនដែរ។ បញ្ហាព្រំដែនជាមួយមហាអំណាចនុយក្លេអ៊ែរប៉ាគីស្ថាន បញ្ហាជម្លោះព្រំដែនជាមហាយក្សចិន ហើយមកទល់ពេលនេះ មានកំណើនចលនាភេរវជន ទាំងក្រុមតាលីបង់នៅអាហ្វហ្កានីស្ថាន និងវត្តមានក្រុមភេរវជនរដ្ឋឥស្លាមនៅស៊ីរី និងអ៊ីរ៉ាក់ និងនៅអាស៊ីខាងត្បូងទៀត។ ហេតុផលនេះ វាគ្រប់គ្រាន់សម្រាប់ឥណ្ឌា ក្នុងការនាំចូលអាវុធ ដើម្បីពង្រឹងសន្តិសុខរបស់ខ្លួន។
២.រុស្ស៊ី-ឥណ្ឌាកាន់តែស្និទ្ធ តែចំណងសេដ្ឋកិច្ចនៅទន់ខ្សោយ
ត្រលប់មកវិញ ថ្វីបើការធ្វើពាណិជ្ជកម្មអាវុធ និងកិច្ចសហប្រតិបត្តិការថាមពល មានការកើនឡើងខ្លាំងគួរឲ្យកត់សម្គាល់ក៏ដោយ ចំណងសេដ្ឋកិច្ចមហាអំណាចទាំងពីរ នៅទន់ខ្សោយនៅឡើយ។ បើយោងតាមរបាយការណ៍ក្រសួងសេដ្ឋកិច្ចឥណ្ឌា គិតត្រឹមឆ្នាំ២០១៤ ទំហំពាណិជ្ជកម្មរួមរវាងឥណ្ឌានិងរុស្ស៊ីមានប្រហែល១០ពាន់លានប៉ុណ្ណោះ ដែលទំហំនេះតូចណាស់។ បើតាមជាក់ស្តែង ឥណ្ឌានិងរុស្ស៊ី សមាជិក BRIC និងជាសមាជិកអង្គការតំបន់ឯទៀតដូចជា អង្គការសហប្រតិបត្តិការសៀងហៃ កិច្ចសហប្រតិបត្តិការសេដ្ឋកិច្ច និងទំហំពាណិជ្ជកម្មទ្វេភាគីគួរតែធំជាងនេះ។
យ៉ាងណាមិញ គេសង្កេតឃើញទំនាក់ទំនងទ្វេភាគី រវាងប្រទេសទាំងពីរកាន់តែល្អប្រសើរឡើង ហើយឥណ្ឌាបន្តរក្សាភាពអព្យាក្រឹត្យរបស់ខ្លួន ដោយមិនបញ្ចេញយោបល់អ្វីទេ ជុំវិញការក្រសោបយកទឹកដី Crimea ពីអ៊ុយក្រែនកន្លងមក។ ប៉ុន្តែការវិវត្តនៃទំនាក់ទំនងមហាអំណាចទាំងពីរ ក៏ធ្វើឲ្យប្រទេសជិតខាងឥណ្ឌា និងប្រទេសមហាអំណាចដូចជាសហរដ្ឋអាមេរិក មិនសប្បាយចិត្តប៉ុន្មានឡើយ។ ចិន និងប៉ាគីស្ថាន មិនពេញចិត្ តព្រោះការកើនអំណាចយោធារបស់ឥណ្ឌា នឹងបង្កការគំរាមកំហែងផ្នែកសន្តិសុខ និងប៉ះពាល់ដល់នយោបាយ ពង្រីកឥទ្ធិពលនៅអាស៊ីខាងត្បូង និងអាស៊ីកណ្តាល។ ចំណែកក្រុងវ៉ាស៊ីតោន មិនចង់ឲ្យមហាយក្សប្រជាធិបតេយ្យ ងាកទៅស្អិតល្មួតជាមួយរុស្ស៊ីទេ ព្រោះបើឥណ្ឌាងាករករុស្ស៊ីមែន ក្រុងវ៉ាស៊ីនតោន នឹងបាត់មិត្តស្មោះត្រង់មួយ ដែលចាំជួយរក្សាអំណាចខ្លួននៅអាស៊ី។
ប៉ុន្តែគេត្រូវយល់ថា ថ្វីត្បិតតែសម្រេចចិត្តទិញអាវុធពីរុស្ស៊ី ច្រើនពាន់លានដុល្លាររាល់ឆ្នាំមែន ឥណ្ឌាដែលជាស្ថាបនិកក្រុមរដ្ឋមិនចូលបក្សសម្ព័ន្ធនោះ ប្រាកដជានៅបន្តរក្សាជំហររបស់ខ្លួនជារដ្ឋអព្យាក្រឹត្យ។ គោលនយោបាយរដ្ឋបាលថ្មីរបស់លោក នារិន្ទ្រា ម៉ូឌី និយាយជារួម មានទំនោរទៅរកមហាអំណាចទាំងអស់ មិនថាអាមេរិក រុស្ស៊ី ចិន អឺរ៉ុប និងអាស៊ីអាគ្នេយ៍ឡើយ ហើយបើនិយាយឲ្យខ្លី គឺអ្នកណាក៏ដោយក៏ជាមិត្តឥណ្ឌា៕
© រក្សាសិទ្ធិដោយ thmeythmey.com