បទយកការណ៍ / បទសម្ភាសន៍
សេដ្ឋកិច្ច
×![]()
ភ្នំពេញ៖ កាហ្វេចល័ត ឫ កាហ្វេអូសរទេះ ដែលកំពុងពេញនិយមខ្លាំងនៅទីក្រុងភ្នំពេញ បានទាក់ទាញចិត្តអាជីវករជាច្រើនឲ្យចង់បើកមុខរបរមួយនេះ។ ក្នុងរយៈពេលពីរ ឬ បីឆ្នាំចុងក្រោយៗនេះ គេសង្កេតឃើញមានការបើកលក់កាហេ្វប្រភេទនេះច្រើននៅតាមចិញ្ចើមផ្លូវនានានៅភ្នំពេញ។ តែទន្ទឹមនឹងកើនឡើងច្រើន ក៏មានអ្នកប្រឈមនឹងការបិទទ្វារផងដែរ។ តើមូលហេតុអ្វីបានជាមានអ្នកបើកថ្មី ហើយក៏មានអ្នកត្រៀមបិទទៅវិញនោះ? 
អាជីវករវ័យក្មេង លោក ឃូ សុខហាក់ វ័យ២១ឆ្នាំជាម្ចាស់កាហ្វេចល័តយីហោ The Best Cafe ដែលបើកដំណើរការរយៈពេលជិត២ឆ្នាំហើយនោះ ទទួលស្គាល់ថា បរិមាណលក់មានការធ្លាក់ចុះ។ ការធ្លាក់ចុះ ព្រោះពេលបើកលក់ដំបូងៗ កាហ្វេរបស់លោកក្នុងមួយកន្លែងលក់អស់ចំនួន៥០០ទៅ៦០០កែវក្នុងមួយថ្ងៃ តែឥឡូវនេះ ក្រុមការងាររបស់លោកលក់បានតែពី៣០០ទៅ៤០០កែវក្នុងមួយថ្ងៃប៉ុណ្ណោះ។
ទាក់ទិនទៅនឹងការបរិមាណនៃការលក់ធ្លាក់ចុះ លោក ឃូ សុខហាក់ ពន្យល់ថា៖«ឥឡូវមានគេបើកលក់កាហ្វេច្រើន ទើបធ្វើឲ្យការលក់ធ្លាក់ចុះ»។ មកដល់ពេលនេះ The Best Cafe មានពីរកន្លែង ឬពីររទេះ ហើយលោកមិនទាន់មានបំណងពង្រីកសាខាបន្ថែមទៀតនោះទេ។ ជួបប្រទះនឹងបញ្ហានេះ លោក សុខហាក់ មិនបាក់ទឹកចិត្តទេ។ លោក សុខហាក់ បានប្រាប់ពីវិធីសាស្ត្ររបស់លោកថា៖«ខ្ញុំនឹងបង្កើនសេវាកម្មឲ្យប្រសើរជាងមុន អនាម័យស្អាតជាងមុន ហើយថែរក្សារសជាតិឲ្យនៅដដែល»។
ឯាកមកមើលលោក កែវ សុខា ម្ចាស់កាហ្វេចល័តយីហោ World Coffee វិញ។ កាហ្វេនេះទើបតែបើកលក់បានរយៈពេល៦ខែទេ តែប្រឈមនឹងផលវិបាកដែរ។ កាហ្វេចល័តមួយនេះ ដែលធ្លាប់តែលក់ដាច់បែរថយចុះជាងពាក់កណ្តាល។ លោក សុខា មានប្រសាសន៍ថា៖«ពីមុនធ្លាប់តែលក់បានពី៥០ទៅ៦០កែវក្នុងមួយកន្លែងៗ តែឥឡូវធ្លាក់មកសល់ត្រឹម២០ទៅ៣០កែវប៉ុណ្ណោះ»។ មកដល់ថ្ងៃនេះ World Coffee មានសាខារបស់ខ្លួនចំនួន៥កន្លែងហើយ តែទំនងជាមិនពង្រីកសាខាបន្ថែមទៀតឡើយ។ ដើម្បីជម្នះនឹងវិបត្តិនេះ លោក សុខា ប្រាប់ថា លោកនឹងប្តូរវិធីសាស្ត្រថ្មី ដោយឲ្យបុគ្គលិកលក់ម្នាក់ៗធ្វើជាម្ចាស់លើ World Coffee តាមសាខានីមួយៗដោយខ្លួនឯង ចំណេញខាតដោយខ្លួនឯង តែសាខានីមួយៗត្រូវបង់ប្រាក់ឲលោកតាមការព្រមព្រៀងគ្នា។ ទាក់ទងនឹងអនាគត់កាហ្វេចល័តមួយនេះ លោក សុខា និយាយថា៖«បើការលក់នៅតែថយចុះទៀត យើងអាចនឹងបិទទ្វារ»។
ដោយឡែក លោក តារារ័ត្ន វ័យ២៧ឆ្នាំមា្ចស់កាហ្វេចល័តយីហោ Your Coffee ដែលទើបហក់ចូលក្នុងទីផ្សារកាហ្វេបាន៣ខែនេះ មានបំណងចង់ពង្រីកសាខារបស់ខ្លួនបន្ថែមទៀត។ លោកបានរៀបរាប់ថា៖« ឥឡូវកាហ្វេរបស់ខ្ញុំមានពីរកន្លែង។ ក្នុងមួយកន្លែងលក់ដាច់ពី៥០ទៅ៦០ថង់ក្នុងមួយថ្ងៃ ហើយខ្ញុំចង់បង្កើតសាខាបន្ថែមទៀតនៅពេលខាងមុខ»។ លោកបានប្រាប់ពីមូលហេតុដែលលោកសម្រេចបើកលក់កាហ្វេថា៖«ខ្ញុំក៏ជាអ្នកផឹកកាហ្វេម្នាក់ដែរ តែខ្ញុំផឹកកាហ្វេរបស់គេមិនត្រូវចិត្ត ដូច្នេះខ្ញុំចង់បើកលក់កាហ្វេដែលមានរសជាតិថ្មី តែលក់ក្នុងតម្លៃប្រហាក់ប្រហែកគេដែរ»។
ការហ្វេទឹកដោះគោលក់នៅតាមហាងកាហ្វេចល័តមានតម្លៃជាមធ្យម៣៥០០រៀល ផ្ទុយពីកាហ្វេលក់នៅក្នុងហាងទំនើបដែលអាចមានតម្លៃរហូតដល់ជិត៨០០០រៀល។
ការបង្កើតជំនួញ ឬពង្រីកជំនួញ គឺជាកតា្តជំរុញសេដ្ឋកិច្ចជាតិ ពីព្រោះវាបានចូលរួមបង្កើតការងារ និងបង្កើតប្រាក់ចំណូល។ ប៉ុន្តែប្រសិនបើការបង្កើតជំនួញរបៀបធ្វើតាមតែគ្នា គ្មានគោលដៅច្បាស់លាស់ ជំនួញមួយចំនួនត្រូវដួលរលំទៅវិញ ហើយនេះ ក៏បង្កបញ្ហាសង្គមទៅវិញដែរ។ បុគ្គលិកគ្មានការងារធ្វើ ថៅកែបាត់បង់បង់ទុនវិនិយោគជាដើម។
ដើម្បីឲ្យជំនួញមួយបើករួចហើយ អាចដំណើរការល្អបាន អ្នកវិនិយោគគួររំពឹងមើលថា តើជំនួញនោះ ជាជំនួញធ្វើតាមគ្នាមួយភ្លែតៗ ឬជាជំនួញដែលមានទស្សនវិស័យវែងឆ្ងាយ៕
© រក្សាសិទ្ធិដោយ thmeythmey.com
