ជាតិ
បក្សមានអាសនៈធានាថា ច្បាប់សហជីពបម្រើប្រយោជន៍ដល់កម្មករ សហជីព និងនិយោជក
× គណៈកម្មការចំពោះកិច្ចបានបញ្ចប់ការពិភាក្សាគ្នា លើសេចក្តីព្រាងច្បាប់ស្តីពីសហជីពហើយ នៅថ្ងៃទី១៩ ខែមករានេះ។ បក្សមានអាសនៈទាំងពីរ សុទ្ធតែអះអាងថា ច្បាប់នេះនឹងបម្រើប្រយោជន៍ដល់ភាគីទាំងបី គឺកម្មករ សហជីព និងនិយោជក។
សំណើរទាំង២១ចំណុច ដែលស្នើឡើងដោយភាគីសហជីព ត្រូវបានបក្សមានអាសនៈទាំងពីរជជែកគ្នាចប់សព្វគ្រប់ហើយ។ ការផ្លាស់ប្តូរយោបល់របស់បក្សកាន់អំណាចនិងបក្សប្រឆាំង បញ្ចប់ទៅដោយបានកែសម្រួលតាមសំណូមពររបស់សហជីពខ្លះ និងមិនបានធ្វើតាមសំណើខ្លះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មិនអាចបញ្ជាក់ឲ្យច្បាស់ពីលទ្ធផល ដែលកើតចេញពីកិច្ចប្រជុំគណៈកម្មការចំពោះកិច្ចឡើយ។ ប៉ុន្តែលោក អះអាងថា មន្ត្រីបក្សទាំងពីរ បានខិតខំទាំងអស់គ្នា ដើម្បីធ្វើឲ្យច្បាប់នេះ មានលក្ខណៈវិជ្ជមានច្រើន ក្នុងគោលបំណងដោះស្រាយជម្លោះរវាងនិយោជិត និងនិយោជក។
លោក សុខ ឥសាន បានបញ្ជាក់ដូច្នេះថា៖«យើងមិនអាចបញ្ជាក់ថា យើងធ្វើតាមសំណូពររបស់សហជីព បានប៉ុន្មានមាត្រា ឬប៉ុន្មានភាគរយនោះទេ។ យើងគ្រាន់តែយកចំណុចទាំង២១ ដែលសហជីពស្នើឲ្យកែប្រែ យកមកពិគ្រោះយោបល់គ្នា ហើយឥឡូវពិគ្រោះចប់ហើយ។ យើងនឹងបើសិក្ខាសាលាមួយ ដើម្បីឲ្យសហជីព មានឱកាសបញ្ចេញមតិ និងផ្តល់យោបល់បន្ថែម មុននឹងដាក់ជូនរដ្ឋសភាអនុម័ត»។
ចំណែកឯ មន្ត្រីជាន់ខ្ពស់គណកប្សសង្គ្រោះជាតិ លោក សុន ឆ័យ បានសម្តែងការពេញចិត្ត ចំពោះដំណើរការនៃការជជែក រវាងមន្ត្រីបក្សប្រជាជនកម្ពុជា និងមន្ត្រីបក្សសង្គ្រោះជាតិ ជុំវិញសេចក្តីព្រាងច្បាប់នេះ។ លោកអះអាង ការដេញដោលគ្នាបានប្រព្រឹត្តទៅដោយរលូន និងមានអធ្យាស្រ័យរវាងគ្នានិងគ្នា តាំងពីដើមរហូតដល់បញ្ចប់។ លោកបញ្ជាក់បែបនេះថា៖«ខ្ញុំត្រេកអរណាស់ ដែលការជជែករបស់យើង ធ្វើឡើយដោយយោគយល់គ្នាទៅវិញទៅមក។ កិច្ចប្រជុំនេះ គ្មានបក្សណាលម្អៀងទៅភាគីណានោះទេ គឺយើងជជែកគ្នាក្នុងគោលបំណង ប្រយោជន៍រួម មិនថាកម្មករ សហជីព ឬនិយោជកឡើយ»។
ក្រោយពីបញ្ចប់ការពិភាក្សានេះ បក្សទាំងពីរ នឹងចេញសេចក្តីថ្លែងការណ៍រួមមួយ ជុំវិញលទ្ធផលនេះ។ បន្ទាប់មក បក្សទាំងពីរ នឹងបើកសិក្ខាសាលាថ្នាក់ជាតិមួយ ដើម្បីផ្តល់ឱកាសដល់ភាគីសហជីព និងនិយោជក ចូលរួមបញ្ចេញមតិ និងផ្តល់យោបល់បន្ថែមលើសេចក្តីព្រាងច្បាប់នេះ មុននឹងដាក់ជូនរដ្ឋសភាអនុម័ត។ យ៉ាងណាក៏ដោយ ទាំងលោក សុខ ឥសាន និងលោក សុន ឆ័យ មិនអាចបញ្ជាក់បានទេថា សេចក្តីថ្លែងការណ៍នឹងត្រូវចេញនៅពេលណានោះទេ គ្រាន់តែអះអាងថា នឹងចេញក្នុងពេលឆាប់ៗនេះ ហើយក្រោយមកនឹងរៀបចំសិក្ខាសាលា។
សូមបញ្ជាក់ថា សហជីពបានស្នើឲ្យបក្សទាំងពីរលុបចោល និងកែប្រែចំណុច២១ ដែលមានចែងក្នុងសេចក្តីព្រាងច្បាប់ស្តីពីសហជីព។ សំណើទាំងនោះ មានដូចជា សុំឲ្យលុបចោលចំណុចដែលចែងថា សហជីពត្រូវធ្វើរបាយការណ៍ហិរញ្ញវត្ថុប្រចាំខែ ជូនក្រសួងការងារ តែគណៈកម្មការចំពោះកិច្ច មិនបានលុបចោល ដោយប្តូរមករយៈពេល៤៥ថ្ងៃ និងស្នើឲ្យកែប្រែចំណុចដែលចែងថា សហជីពមូលដ្ឋានចាប់ពី១០ឡើងទៅ ទើបអាចបង្កើតជាសហព័ន្ធសហជីពបាន ឲ្យមកត្រឹម៣ តែត្រូវគណៈកម្មការចំពោះកិច្ចបន្ថយត្រឹម៧។ល។
គណៈកម្មការចំពោះកិច្ច បានជួបគ្នាចំនួន៣លើក ដើម្បីពិភាក្សាលើចំណុចទាំង២១ ដែលភាគីសហជីពស្នើឲ្យកែប្រែ។ ជំនួបលើកទី១ ធ្វើឡើងនៅថ្ងៃទី៤ ខែមករា ឆ្នាំ២០១៦ ដោយសម្រេចបាន២ចំណុច។ ចំណែកឯជំនួបលើកទី២ ប្រព្រឹត្តទៅនៅថ្ងៃទី១៤ ខែមករា ឆ្នាំ២០១៦ ដោយសម្រេចបាន៧ចំណុច។ នៅថ្ងៃទី១៩ ខែមករា ឆ្នាំ២០១៦នេះ បក្សទាំងពីរ បានបញ្ចប់ការជជែកគ្នាលើចំណុចទាំង១២៕
© រក្សាសិទ្ធិដោយ thmeythmey.com