អន្តរជាតិ
មេដឹកនាំកំពូលអ៊ីរ៉ង់ថា អាមេរិកនៅតែបង្កអរិយភាព ទោះមានកិច្ចព្រមព្រៀងនុយក្លេអ៊ែរ
× មេដឹកនាំកំពូលអ៊ីរ៉ង់លោក អាយ៉ាតូឡា អាលី ខាមេនី បានបង្ហាញការមិនទុកចិត្តទៅលើអាមេរិក និងបានចាត់ទុកអាមេរិកនៅតែសត្រូវចំពោះអ៊ីរ៉ង់។ លោកក៏បានព្រមានដែរថា នយោបាយរបស់អាមេរិកនឹងប៉ះពាល់ដល់ផលប្រយោជន៍ដែលបានមកពីការដកទណ្ឌកម្ម ហើយអ៊ីរ៉ង់នឹងមិនទុកចិត្តអាមេរិកនោះទេ។ លោក ខាមេនី បញ្ជាក់ដូចនេះកាលពីថ្ងៃទី២០ ខែមីនា ខណៈពេលដែលអាមេរិកនៅមិនទាន់ដកទណ្ឌកម្មពីអ៊ីរ៉ង់នោះទេ បើទោះជាមានកិច្ចព្រមព្រៀងនុយក្លេអ៊ែររួចហើយក៏ដោយ។
ក្នុងពិធីបុណ្យចូលឆ្នាំអ៊ីរ៉ង់នៅទីក្រុងពិសិដ្ឋ Mashhad លោក អាយ៉ាតូឡា អាលី ខាមេនី បានលើកឡើងពីការនយោបាយមិនល្អរបស់អាមេរិកចំពោះអ៊ីរ៉ង់ ហើយលោកបានប្រាប់ប្រជាជនអ៊ីរ៉ង់មិនត្រូវជឿអតីតគូសត្រូវរបស់ខ្លួននោះទេ។ ការនិយាយរិះគន់របស់មេដឹកនាំកំពូលរូបនេះធ្វើឡើង ស្របពេលដែលអាមេរិកបន្តដាក់ទណ្ឌកម្មរបស់ខ្លួនមកលើអ៊ីរ៉ង់ ទោះសហគមន៍អន្តរជាតិបានដកទណ្ឌកម្មភាគច្រើនរួចហើយក៏ដោយនៅខែមករាឆ្នាំ២០១៦ ចាប់តាំងពីការសម្រេចបានកិច្ចព្រមព្រៀងនុយក្លេអ៊ែរកាលពី២០១៥។
ជាមួយគ្នានោះដែរ លោកខាមេនី ក៏បានបញ្ជាក់ពីការភ័យខ្លាចលើបទបញ្ជារបស់អាមេរិក នាំឲ្យក្រុមហ៊ុនបរទេសធំៗមិនហ៊ានរកស៊ីនៅអ៊ីរ៉ង់ ជាពិសេសក្រុមហ៊ុនក្នុងវិស័យហិរញ្ញវត្ថុ។ តាមរយៈកិច្ចព្រមព្រៀងនុយក្លេអ៊ែរជាមួយអ៊ីរ៉ង់ ទណ្ឌកម្មជាច្រើនត្រូវបានដកចេញនៅដើមឆ្នាំ២០១៦នេះ ហើយពីពេលនោះមក ក្រុមហ៊ុនអន្តរជាតិជាច្រើនបានសម្រុកចូលអ៊ីរ៉ង់ដើម្បីស្វែងរកឱកាសវិនិយោគ ព្រមទាំងមានការចុះហត្ថលេខាលើពាណិជ្ជកម្មមានតម្លៃរាប់ពាន់ដុល្លារផងដែរ។
យ៉ាងណាមិញ បើតាមភ្នាក់ងារព័ត៌មាន Reuters ធនាគារអឺរ៉ុបនិងក្រុមហ៊ុនផ្សេងទៀត នៅតែរារែកនឹងការបណ្ដាក់ទុកនៅប្រទេសជម្ឈិមបូព៌ាមួយនេះ ដោយសារតែទណ្ឌកម្មភាគច្រើនរបស់អាមេរិកនៅមិនទាន់ដកចេញនៅឡើយ។ ដោយសារបញ្ហានេះលោក ខាមេនី និយាយថា នេះជាសញ្ញាដែលអ៊ីរ៉ង់ត្រូវពឹងផ្អែកលើខ្លួនឯង ពីព្រោះអាមេរិកនិងដៃគូររបស់ខ្លួន មិនអាចទុកចិត្តបានទេ។
អ្វីដែលគួរឲ្យចាប់អារម្មណ៍នោះ ការលើកឡើងរបស់លោក ខាមេនី ហាក់ដូចជាផ្ទុយនឹងនយោបាយរបស់លោកប្រធានាធិបតី ហាសសាន់ រ៉ូហានី ដែលព្យាយាមសម្រេចឲ្យកិច្ចព្រមព្រៀងនុយក្លេអ៊ែរជាមួយមហាអំណាចពិភពលោក។ ក្នុងសារវីដេអូមួយ លោក រ៉ូហានី និយាថា ការបន្តទំនាក់ទំនងជាមួយប្រទេសដទៃ គឺជាចំណុចសំខាន់នៃកំណើនសេដ្ឋកិច្ចរបស់អ៊ីរ៉ង់។
សូមបញ្ជាក់ដែរថា ប្រធានាធិបតី រ៉ូហានី និងក្រុមសម្ព័ន្ធមិត្តរបស់លោកទទួលសំឡេងភាគច្រើនក្នុងការបោះឆ្នោតសភាកាលពីខែមុន។ ជ័យជម្នះនេះ នឹងធ្វើឲ្យលោកអាចអនុវត្តការបើកចំហសេដ្ឋកិច្ចរបស់អ៊ីរ់ង់ឲ្យកាន់តែទូលាយថែមទៀត បើទោះជាក្រុមអភិរក្ស ទំនងជាមិនគាំទ្រលោកក៏ដោយ៕
© រក្សាសិទ្ធិដោយ thmeythmey.com