អន្តរជាតិ
អតីតនាយករដ្ឋមន្ត្រីព័រទុយហ្កាល់ នាំមុខគេក្នុងការបោះឆ្នោតរើសអគ្គលេខាធិការ UN
× ដំណើការបោះឆ្នោតជ្រើសរើសអគ្គលេខាធិការអង្គការសហប្រជាជាតិ កំពុងតែធ្វើឡើងនៅក្រុមប្រឹក្សាសន្តិសុខ។ បេក្ខជនចំនួន១២នាក់ ដែលសុទ្ធសឹងជាអតីតថ្នាក់ដឹកនាំប្រទេស និងស្ថាប័នធំៗ កំពុងប្រជែងគ្នាដើម្បីទទួលការគាំទ្រពីសមាជិកទាំង១៥នៃក្រុមប្រឹក្សានេះ ខណៈអតីតនាយករដ្ឋមន្ត្រីព័រទុយហ្កាល់ កំពុងមានសំឡេងនាំមុខ ក្នុងការបោះឆ្នោតជុំទីមួយ។
សូមស្ដាប់ព័ត៌មានលម្អិត៖
អតីតនាយករដ្ឋមន្ត្រីព័រទុយហ្កាល់ លោក Antonio Guterres ទទួលបានសំឡេងលើបេក្ខជនដទៃទៀត ក្នុងការបោះឆ្នោតជុំទីមួយ ដើម្បីស្វែងរកអ្នកស្នងតំណែងលោក បាន គីមូន ដែលចប់អាណត្តិក្នុងឆ្នាំនេះ។ លោក Antonio Guterres បាននាំមុខបេក្ខជន១១នាក់ផ្សេងទៀត ដែលចូលរួមក្នុងការបោះឆ្នោតនេះ។
សមាជិកទាំង១៥ នៃក្រុមប្រឹក្សាសន្តិសុខ ដែលរួមទាំងសមាជិកអចិន្ត្រៃយ៍ទាំង៥ គឺចិន បារាំង អាល្លឺម៉ង់ អាមេរិក រុស្សី និងអង់គ្លេស ត្រូវដាក់ពិន្ទុលើបេក្ខជនការបោះឆ្នោតជុំដំបូង។ ទីភ្នាក់ងារសារព័ត៌មាន AFP ផ្សាយថា សមាជិកទាំង១៥ ត្រូវបោះឆ្នោត «លើកទឹកចិត្ត» «មិនលើកទឹកចិត្ត» និង «គ្មានយោបល់» លើបេក្ខជនទាំង១២រូប ដែលក្នុងនោះមានស្ត្រី៦នាក់។
បើយោងតាមប្រភពពីមន្ត្រីការទូត លោក Antonio Guterres ដែលធ្លាប់ជាប្រមុខស្ថាប័នទទួលបន្ទុកជនភៀសខ្លួនរបស់ UN ទទួលសំឡេងលើកទឹកចិត្តចំនួន១២ និងសំឡេងគ្មានយោបល់ចំនួន៣។ ជាមួយនឹងលទ្ធផលនេះ រដ្ឋមន្ត្រីការបរទេសព័រទុយហ្កាល់ Augusto Santo Silva ចាត់ទុកលទ្ធផលនេះថា ជាចំណុចវិជ្ជមាន និងបញ្ជាក់ថា លោក Guterres នឹងក្លាយជាអគ្គលេខាធិការថ្មី។
ចំណែកលំដាប់ទីពីរ បានទៅអតីតប្រធានាធិបតីស្លូវេនី លោក Danilo Turk ទទួលបានការលើកទឹកចិត្តចំនួន១១សំឡេង ពីសមាជិកក្រុមប្រឹក្សាទាំង១៥ប្រទេស។ ដោយឡែកបេក្ខជនបីនាក់ទទួលការគាំទ្រចំនួន៩ស្មើគ្នា គឺអគ្គនាយកUNESCO លោកស្រី Irina Bokova ជាជនជាតិប៊ុលហ្ការី អតីតរដ្ឋមន្ត្រីការបរទេសស៊ែប៊ី លោក Vuk Jeremic និងអតីតប្រមុខការទូតម៉ាសេដ្វាន លោក Srgjan Kerim។
អតីតនាយករដ្ឋមន្ត្រីណូវ៉ែលសេឡង់ លោកស្រី Helen Clark ដែលរំពឹងថាជាបេក្ខជននាំមុខនោះ ធ្វើមិនបានល្អទេ ខណៈលោកស្រីទទួលសំឡេងលើកទឹកចិត្តបានតែ៨ និងមិនលើកទឹកចិត្ត៥សំឡេង។ ក្រៅពីនេះ បេក្ខជនដទៃទៀត សុទ្ធទទួលបានសំឡេងមិនលើកទឹកចិត្តច្រើន។ ក្រុមប្រឹក្សាសន្តិសុខអង្គការសហប្រជាជាតិ នឹងជួបគ្នាម្ដងទៀត ដែលទំនងជានៅសប្ដាហ៍ក្រោយនេះ សម្រាប់ការបោះឆ្នោតជុំទីពីរ ខណៈដែលបេក្ខជនចុងក្រោយ អាចនឹងត្រូវប្រកាសនៅខែតុលា ដើម្បីឲ្យមហាសន្និបាតអង្គការសហប្រជាជាតិ ដែលមានសមាជិក១៩៣ប្រទេស បោះឆ្នោតសម្រេចចុងក្រោយ៕
© រក្សាសិទ្ធិដោយ thmeythmey.com