អន្តរជាតិ
លោកអូបាម៉ា អញ្ជើញលោកស្រី ស៊ូជី ទៅទស្សនកិច្ចនៅអាមេរិក ក្រោយប្រជាធិបតេយ្យមីយ៉ាន់ម៉ាលេចមុខមាត់ក្នុងឆាកអន្តរជាតិ ![](https://image.thmeythmey.com/pictures/2016/07/23/visal_2.jpg)
×![]()
លោកស្រី អ៊ុងសាន ស៊ូជី មេដឹកនាំ de facto មីយ៉ាន់ម៉ា បានយល់ព្រមទទួលការអញ្ជើញរបស់ប្រធានាធិបតីអាមេរិកលោក បារ៉ាក់ អូបាម៉ា់ ដើម្បីទៅបំពេញទស្សនកិច្ចនៅអាមេរិក។ តាមការអញ្ចើញនេះ វា នឹងក្លាយជាលើកដំបូងហើយដែលម្ចាស់ពានរង្វាន់ណូបែលសន្តិភាព និងជាមាតាប្រជាធិបតេយ្យមីយ៉ាន់យ៉ារូបនេះ មានវត្តមាននៅទឹកដីអាមេរិក ក្រោយនៃជ័យជម្នះនៃការបោះឆ្នោតភ្លូកទឹកភ្លូកដីដែលជាចំណុចរបត់ប្រវត្តិសាស្ត្រនយោបាយមីយ៉ាន់ម៉ាឆ្ពោះទៅរកលទ្ធិប្រជាធិបតេយ្យនោះ។
សូមស្ដាប់ព័ត៌មានលម្អិត៖
«រដ្ឋមន្ត្រីការបរទេស និងជាទីប្រឹក្សារដ្ឋមីយ៉ាន់ម៉ា លោកស្រី អ៊ុងសាន ស៊ូជី បានទទួលយកការអញ្ជើញរបស់លោកប្រធានាធិបតីបារ៉ាក់ អូបាម៉ាដើម្បីបំពេញទស្សនកិច្ចនៅអាមេរិក មុនពេលដែលលោកអូបាម៉ា បញ្ចប់អាណត្តិប្រធានាធិបតីរបស់លោក»។ នេះគឺជាបញ្ជាក់របស់អ្នកនាំពាក្យក្រសួងការបរទេសមីយ៉ាន់ម៉ានៅថ្ងៃទី២១ ខែកក្កដា កន្លងទៅ ដែលបានបន្ថែមថា លោកស្រី ស៊ូជី គ្រោងនឹងបំពេញទស្សនកិច្ច ទៅកាន់អាមេរិកនៅពេលសមស្របមួយ។
សេចក្តីថ្លែងការណ៍របស់ក្រសួងការបរទេស ត្រូវបានធ្វើឡើងបន្ទាប់ពី ទីប្រឹក្សាសន្តិសុខជាតិអាមេរិក លោក Ben Rhodes បានថ្លែងឲ្យដឹងពីការអញ្ជើញរបស់លោកប្រធានាធិបតីអាមេរិកបារ៉ាក់ អូបាម៉ា នាជំនួបជាមួយនឹងលោស្រី អ៊ុងសាន ស៊ូជី នៅថ្ងៃទី២០ ខែកក្កដា ដែលស្ថិតនៅក្នុងអំឡុងពេលនៃដំណើរទស្សនកិច្ចរបស់លោកមកកកាន់មីយ៉ាន់ម៉ា។
អាមេរិក កាន់តែចង់ស្និទ្ធជាមួយនឹងមីយ៉ាន់ម៉ា ក្រោយឃើញដំណើរឆ្ពោះទៅមុខនៃប្រជាធិបតេយ្យ
សូមជម្រាបផងដែរថា មីយ៉ាន់ម៉ា ធ្លាប់ត្រូវបានគ្រប់គ្រងដោយយោធាជាច្រើនទសវត្សរ៍មកហើយ។ តែប្រទេសដែលមានប្រជាជនជម្រុះជាតិសាសន៍ច្រើនមួយនេះ បានចាប់ផ្តើមលេចមុខក្នុងឆាកអន្តរជាតិ ក្រោយពីការបោះឆ្នោតប្រជាធិបតេយ្យលើកដំបូងក្នុងប្រវត្តិសាស្ត្រនយោបាយកាលពីចុងឆ្នាំ២០១៥កន្លងទៅ។ នោះគឺ អ្នកនយោបាយមីយ៉ាន់ម៉ាជាពិសេសអ្នកនយោបាយពាក់កណ្តាលស៊ីវិលនិងយោធា បានបង្ហាញភាពចាស់ទុំផ្នែកនយោបាយ ដោយពួកគេ ហ៊ានផ្ទេរអំណាចដោយសន្តិវិធី។ ជាក់ស្តែងនោះគឺ ការផ្ទេរតំណែងទៅឲ្យរដ្ឋាភិបាលបក្សសម្ព័ន្ធជាតិដើម្បីប្រជាធិបតេយ្យដែលមានប្រមុខបក្សគឺលោកស្រី អ៊ុងសាន ស៊ូជី ដែលទទួលរងការធ្វើបុកម្នេញជាច្រើនឆ្នាំហើយនោះ។
អ្វីគួរកត់សម្គាល់នោះ ក្រៅពីជាអ្នកដំបូងដែលបានសាទរចំពោះជ័យជម្នះក្នុងការបោះឆ្នោតរបស់លោកស្រី អ៊ុងសាន ស៊ូជី អាមេរិក ក៏បានប្រកាសបន្ធូរបន្ថយទណ្ឌកម្មសេដ្ឋកិច្ចលើមីយ៉ាន់ម៉ាដើម្បីជាយន្តការមួយជួយអភិវឌ្ឍសេដ្ឋកិច្ចជាតិមីយ៉ាន់ម៉ាដែលបានដាក់តាំងពីពេលដែលក្រុមយោធាដឹកនាំ។ ការបន្ធូរបន្ថយនេះ ក៏ជាឆ្លើយតបទៅនឹងដំណើរទៅមុខនៃលទ្ធិប្រជាធិបតេយ្យមីយ៉ាន់ម៉ាផងដែរ។
បន្ថែមពីនេះ ទីប្រឹក្សាសន្តិសុខជាតិអាមេរិក លោក Ben Rhode ដែលបានបំពេញទស្សនកិច្ចនៅមីយ៉ាន់ម៉ាក្នុងសប្តាហ៍នេះ ក៏បានប្រកាសកញ្ចប់ជំនួយថ្មីប្រមាណ២១លានដុល្លារដើម្បីគាំទ្រកំណើនសេដ្ឋកិច្ចមីយ៉ាន់ម៉ាទៀតផង។ ទីប្រឹក្សារូបនោះ ថែមទាំងអះអាងថា អាមេរិក នឹងបន្តត្រួតពិនិត្យលើទណ្ឌកម្មនោះ និងបញ្ជាក់ថា អាមេរិក នឹងគាំទ្រសម្រាប់ការកសាងប្រជាធិបតេយ្យឲ្យរឹងមាំ ការផ្សះផ្សាជាតិ និងដំណើរសន្តិភាព រួមជាមួយនឹងការផ្សាភ្ជាប់ទំនាក់ទំនងប្រជាជន និងប្រជាជនរវាងប្រទេសទាំងពីរទៀត។
ជំនួបលោកអូបាម៉ា និងលោកស្រីស៊ូជី គឺជាជំនួបមុខចាស់ក្នុងតំណែងថ្មី
បើទោះបីជា មីយ៉ាន់ម៉ា កំពុងតែដឹកនាំដោយមេដឹកនាំស៊ីវិលបែបលទ្ធិប្រជាធិបតេយ្យក៏ដោយ ចំណុចនេះ មិនទាន់បំពេញតាមការចង់បានរបស់អាមេរិកឡើយ។ នោះក៏ព្រោះតែ យោធានៅតែបន្តតោងអំណាចនៅក្នុងប្រព័ន្ធនយោបាយ និងបញ្ហាសិទ្ធិមនុស្សជាពិសេសនោះ ការធ្វើទុក្ខបុកម្នេញលើជនជាតិរ៉ូហ៊ីងយ៉ា នៅតែជាបញ្ហាចោទនៅឡើយនោះទេ។ តែបញ្ហានេះ មិនអាចធ្វើឲ្យទំនាក់ទំនងលោកស្រី ស៊ូជី និងលោកអូប៉ាម៉ា ឃ្លាតឆ្ងាយពីគ្នាឡើយ។
លោកស្រី ស៊ូជី ធា្លប់ជួបលោកអូប៉ាម៉ាដំបូងក្នុងនាមជាប្រមុខបក្សប្រឆាំងសម្ព័ន្ធជាតិដើម្បីប្រជាធិបតេយ្យកាលពីឆ្នាំ២០១២។ ហើយវា ពេលនោះ ក៏ជាលើកដំបូងដែលអាមេរិក បានបង្ហាញ និងលើកមុខមាត់លោកស្រី អ៊ុងសាន ស៊ូជីក្នុងឆាកអន្តរជាតិ ក្រោយលោកស្រីត្រូវបានដោះលែងជាផ្លូវការពីការឃុំរយៈពេល១៧ឆ្នាំក្នុងផ្ទះដោយក្រុមយោធា។ ក្នុងពេលនោះដែរ លោកស្រី ក៏បានទទួលបានលមេដាយមាសពីអាមេរិកផងដែរ។
ភាគីទាំងពីរ បានជួបគ្នាជាលើកទីពីរ ក្នុងឆ្នាំ២០១៤ នៅក្នុងទឹកដីមីយ៉ាន់ម៉ា នាឱកាសដែលប្រធានាធិបតីបារ៉ាក់ អូបាម៉ាបានចូលរួមកិច្ចប្រជុំកំពូលអាស៊ានដែលមីយ៉ាន់ម៉ាធ្វើជាប្រធានអាស៊ាន។ ក្នុងពេលនោះ លោកស្រី ស៊ូជី នៅតែជាប្រមុខបក្សប្រឆាំងនៅឡើយនោះទេ។
ដោយឡែក សម្រាប់ការជួបលោកអូបាម៉ា នាពេលខាងមុខដ៏ខ្លីនេះ លោកស្រី ស៊ូជី មិនមែនជាមេបក្សប្រឆាំងទៀតឡើយ ពោលគឺ លោកស្រី គឺប្រធានបក្សកាន់អំណាច ហើយដែលគេមើលឃើញថា ជាមេដឹកនាំពិតប្រាកដរបស់មីយ៉ាន់ម៉ានោះ ៕
Tag:
មីយ៉ាន់ម៉ា
អាស៊ាន
© រក្សាសិទ្ធិដោយ thmeythmey.com