អន្តរជាតិ
នយោបាយអន្តរជាតិ
ទីម័រខាងកើត ទទួលសញ្ញាវិជ្ជមាន ចំពោះការសុំចូលជាសមាជិកអាស៊ាន
× ទីម័រខាងកើត ដែលបានដាក់សុំចូលជាសមាជិកអាស៊ានក្នុងឆ្នាំ២០១១ ហាក់ទទួលបានលទ្ធផលជាវិជ្ជមានពីអាស៊ាន ចំពោះការសុំចូលរបស់ខ្លួន។ កិច្ចប្រជុំរដ្ឋមន្ត្រីការបរទេសអាស៊ាន បានចេញសេចក្ដីថ្លែងការណ៍របស់ខ្លួន ទាក់ទងនឹងការសុំចូលរបស់ទីម័រខាងកើត ដែលនេះជាជំហានថ្មីមួយទៀត មុននឹងឈានដល់ការយល់ព្រមលើសំណើទីម័រខាងកើត។
ពីរដ្ឋធានីវៀងចន្ទន៍ ប្រទេសឡាវ កិច្ចប្រជុំរដ្ឋមន្ត្រីការបរទេសអាស៊ានលើកទី៤៩ បានបញ្ចប់ទៅ ជាមួយនឹងការចេញសេចក្ដីថ្លែងការណ៍ពាក់ព័ន្ធនឹងបញ្ហាតំបន់ ដែលក្នុងនោះក៏មានសំណើចូលជាសមាជិកទី១១ របស់អាស៊ានពីសំណាក់ទីម័រខាងកើតផងដែរ។ ទីម័រខាងកើត ដែលក្លាយជារដ្ឋឯករាជ្យក្នងឆ្នាំ២០០២ បានដាក់ពាក្យចូលអាស៊ានតាំងពីឆ្នាំ២០១១មក។
ក្នុងសេចក្ដីថ្លែងការណ៍ដែលចេញនៅថ្ងៃទី២៥ ខែកក្កដា រដ្ឋមន្ត្រីការបរទេសអាស៊ានទាំងដប់ បានកត់សម្គាល់ពីការបញ្ចប់ការសិក្សាឯករាជ្យចំនួនបី លើផលប៉ះពាល់នៃការដាក់ពាក្យសុំចូលរបស់ទីម័រ នៅក្នុងសសរស្ដម្ភទាំងបីរបស់អាស៊ាន។ សសរស្ដម្ភទាំងបីរបស់អាស៊ាន រួមមានសហគមន៍សន្តិសុខនិងនយោបាយអាស៊ាន សហគមន៍សេដ្ឋកិច្ចអាស៊ាន និងសហគមន៍សង្គមវប្បធម៌អាស៊ាន។
បន្ថែមលើនេះ សេចក្ដីថ្លែងការណ៍រដ្ឋមន្ត្រីការបរទេសអាស៊ាន ក៏បានបញ្ជាក់ដែរថា ស្ថាប័នតាមវិស័យមួយចំនួនរបស់អាស៊ាន ក៏បានចាប់ផ្ដើមការស្វែងរកលទ្ធភាពនៃការចូលរួមរបស់ទីម័រខាងកើតទៅក្នុងសកម្មភាពរបស់ខ្លួន សំដៅកសាងសមត្ថភាពផងដែរ។ ការសិក្សានេះ គឺស្របតាមការសម្រេចរបស់កិច្ចប្រជុំលើកទី៥ នៃក្រុមការងារនៃក្រុមប្រឹក្សាសម្របសម្រួលអាស៊ាន កាលពីខែមិថុនា ឆ្នាំ២០១៥។ ហើយឆ្នាំនេះ កិច្ចប្រជុំនៃក្រុមការងារនេះ នឹងប្រជុំលើលទ្ធផលនៃការសិក្សាទាំងនោះ។
សូមជម្រាបផងដែរថា គឺរយៈពេល៥ឆ្នាំមកហើយដែលទីម័រខាងកើត បានស្នើសុំធ្វើជាសមាជិកអាស៊ាន និងទន្ទឹងរង់ចាំការយល់ព្រមជាឯកច្ឆន្ទពីសមាជិករបស់អាស៊ានទាំង១០។ ជាមួយគ្នានោះ សមាជិកអាស៊ាន ក៏បានយល់ព្រមក្នុងការសិក្សាស្រាវជ្រាវពីលទ្ធភាពនៃរដ្ឋថ្មីផងដែរ។ ថ្មីៗនេះទៀត លោក Rahmat Pramono អគ្គរដ្ឋទូតឥណ្ឌូនេស៊ីប្រចាំអាស៊ាន ក៏បានអះអាងដែរ ថា «សាធារណរដ្ឋប្រជាធិបតេយ្យទីម័រ ឬទីម័រខាងកើត នឹងក្លាយជាសមាជិកនៃសមាគមប្រជាជាតិអាស៊ីអាគ្នេយ៍នៅឆ្នាំ២០១៧ហើយ»។
ដូចដែលបានបញ្ញត្តិក្នុងជំពូកទី៣ មាត្រា៦ នៃធម្មនុញ្ញអាស៊ាន ដើម្បីក្លាយជាសមាជិករបស់អាស៊ាន រដ្ឋដែលបានដាក់ស្នើត្រូវបំពេញនូវលក្ខខណ្ឌគ្រឹះមួយចំនួន។ ក្នុងនោះរួមមាន ត្រូវមានទីតាំងភូមិសាស្ត្រក្នុងតំបន់អាស៊ីអាគ្នេយ៍ ការទទួលស្គាល់ពីរដ្ឋអាស៊ានទាំងអស់ គោរពតាមធម្មនុញ្ញអាស៊ាន និងជាពិសេសនោះត្រូវទទួលបានការយល់ព្រមជាឯកច្ឆ័នពីរដ្ឋអាស៊ានក្នុងកិច្ចប្រជុំកំពូលផងដែរ៕
Tag:
អាស៊ាន
ទីម័រខាងកើត
© រក្សាសិទ្ធិដោយ thmeythmey.com