អន្តរជាតិ
ជំនួបប្រមុខការទូត ចិន-ជប៉ុន-កូរ៉េខាងត្បូង ធ្វើឡើង ចំពេលតានតឹងខ្លាំង ![](https://image.thmeythmey.com/pictures/2016/08/24/foreign_ministers.jpg)
×![]()
រដ្ឋមន្ត្រីការបរទេស ចិន ជប៉ុន និងកូរ៉េខាងត្បូង ដែលជាតួអង្គសំខាន់នៅក្នុងតំបន់ នឹងជួបប្រជុំគ្នាផ្លូវការនៅថ្ងៃទី ២៤ ខែសីហានេះនៅឯទីក្រុងតូក្យូ។ ជំនួបនេះធ្វើឡើង ស្របពេលដែលមហាអំណាចតំបន់ទាំងបីនេះ នៅខ្វែងគំនិតគ្នាលើបញ្ហាជាច្រើន រួមទាំងការពង្រាយខែលការពាររបស់អាមេរិក ជម្លោះដែនអធិបតេយ្យរវាងចិន-ជប៉ុន និងជប៉ុន-កូរ៉េខាងត្បូង ក៏ដូចជាបញ្ហាកូរ៉េខាងជើងជាដើម។
ប្រមុខការទូតបីប្រទេស ចិន ជប៉ុន និងកូរ៉េខាងត្បូង បានចាប់ផ្ដើមជំនួបពីរថ្ងៃរបស់ខ្លួនកាលពីថ្ងៃទី២៣ ខែសីហា ចំពេលការប្រឈមមុខដាក់គ្នារវាងមហាអំណាចទាំងបី នៅតែបន្តមាន ជុំវិញបញ្ហាសន្តិសុខនៅក្នុងតំបន់ ក៏ដូចជាបញ្ហាសេដ្ឋកិច្ចដែរ។ នេះជាជំនួបទីមួយចាប់តាំងពីខែមីនាឆ្នាំមុន ហើយក៏ធ្វើឡើងមុនជំនួប G-20 នៅទីក្រុង Hangzhou នៅខែកញ្ញា។
រដ្ឋមន្ត្រីការបរទេសជប៉ុន ហ្វូមីអូ គីស៊ីដា (Fumio Kishida) រដ្ឋមន្ត្រីការបរទេសចិន វ៉ាង យី (Wang Yi) និងសមភាគីកូរ៉េខាងត្បូង យុន ប្យុងសេ (Yun Byung-se) បានជួបគ្នានៅកម្មវិធីអាហារពេលល្ងាច នៅថ្ងៃទី២៣ មុននឹងជួបចរចាជាផ្លូវការនៅថ្ងៃទី២៤។ ទាក់ទិនជំនួបនេះ ប្រធានលេខាធិការគណៈរដ្ឋមន្ត្រីជប៉ុនលោក Yoshihide Suga និយាយថា វាជារឿងសំខាន់បំផុត ដែលរដ្ឋមន្ត្រីការបរទេសមកពីប្រទេសទាំងបី ជួបគ្នា និងជជែកគ្នាដោយស្មោះត្រង់។
ចិន ជប៉ុន និងកូរ៉េខាងត្បូង សុទ្ធតែមានជម្លោះរវាងគ្នានិងគ្នាទាំងអស់។ ពេលថ្មីៗនេះ ក្រុងប៉េកាំង និងក្រុងតូក្យូ មើលមុខគ្នាមិនសូវត្រូវឡើយ ដ្បិតជម្លោះដែនដីនៅសមុទ្រចិនខាងកើត បានកើនកម្ដៅ ក្រោយពេលដែលនាវារបស់ចិនចូលទៅក្នុងដែនសមុទ្រ ក្បែរប្រជុំកោះ Senkaku (ចិនហៅថាកោះ Diaoyu) ដែលជប៉ុនអះអាងថាជារបស់ខ្លួន។ ជម្លោះដែនទឹកនៅសមុទ្រចិនខាងកើតនេះ ជាឧបសគ្គធំក្នុងពង្រីកទំនាក់ទំនងរវាងអតីតគូសត្រូវទាំងពីរនេះ។
ចំណែកចិន និងកូរ៉េខាងត្បូង ក៏កំពុងបែរខ្នងដាក់គ្នាផងដែរ ជុំវិញការពង្រាយខែលការពារមីស៊ីល THAAD របស់អាមេរិកនៅកូរ៉េខាងត្បូង។ ទាំងអាមេរិក និងកូរ៉េខាងត្បូង សុទ្ធតែអះអាងថា ខែលការពារនេះ គឺមានគោលដៅការពារសុទ្ធសាធ និងដាក់សំដៅការពារការវាយប្រហារណាមួយពីកូរ៉េខាងជើងប៉ុណ្ណោះ។ ប៉ុន្តែក្រុងប៉េកាំង មិនសប្បាយចិត្តឡើយ ដោយបញ្ជាក់ថា ខែលការពារនេះគឺសំដៅមកលើខ្លួន និងទាមទារឲ្យលុបចោលការពង្រាយនេះ។
ជាមួយគ្នានេះ ប្រវត្តិសាស្ត្រសម័យសង្គ្រាមលោកលើកទីពីរ និងការដាក់អាណានិគម ក៏ធ្វើឲ្យក្រុងតូក្យូ និងក្រុងសេអ៊ូល មើលមុខគ្នាមិនត្រូវដែរ។ ជប៉ុនបានដាក់អាណានិគមលើឧបទ្វីបកូរ៉េ ចាប់ពីឆ្នាំ១៩១០ ដល់ឆ្នាំ១៩៤៥ ដែលក្នុងរយៈពេលនេះ ទាហានជប៉ុនធ្វើបាបប្រជាជនកូរ៉េយ៉ាងខ្លាំង ជាពិសេសការចាប់បង្ខំឲ្យធ្វើជាទាសករផ្លូវភេទ។
នៅបន្ទាប់ពីជំនួបនេះ រដ្ឋមន្ត្រីការបរទេសជប៉ុន នឹងជួបដាច់ដោយឡែកជាមួយសមភាគីចិន និងកូរ៉េខាងត្បូង ដើម្បីដោះស្រាយបញ្ហាប្រឈមនានា ដែលរាប់បញ្ចូលទាំងទំនាក់ទំនងសេដ្ឋកិច្ច និងបញ្ហានុយក្លេអ៊ែររបស់កូរ៉េខាងជើងជាដើម។ គេរំពឹងទៀតថា ជំនួបនេះ នឹងបើកផ្លូវដល់ជំនួបកំពូលមេដឹកនាំប្រទេសទាំងបី នៅចុងឆ្នាំនេះផងដែរ៕
Tag:
ចិន
ជប៉ុន
កូរ៉េខាងត្បូង
© រក្សាសិទ្ធិដោយ thmeythmey.com