អន្តរជាតិ
UN៖ លោក Duterte ខ្វះការយល់ដឹងលើស្ថាប័នសិទ្ធិមនុស្ស ![](https://image.thmeythmey.com/pictures/2016/09/14/duterte-bankimoon-.jpg)
×![]()
មន្ត្រីជាន់ខ្ពស់សិទ្ធិមនុស្សរបស់អង្គការសហប្រជាជាតិ បាននិយាយរិះគន់មេដឹកនាំហ្វីលីពីន ដែលមានជំហរប្រឆាំងនឹងការមានយោបល់ និងការស៊ើបអង្កេតលើបញ្ហាសិទ្ធិមនុស្សរបស់ស្ថាប័ននេះ។ នរណាក៏ដឹងដែរថា បុរសខ្លាំងហ្វីលីពីន លោក Rodrigo Duterte មិនសូវត្រូវគ្នាជាមួយស្ថាប័ននេះទេ ដោយសារតែការរិះគន់លើយុទ្ធនាការបង្ក្រាបគ្រឿងញៀន និងការសម្លាប់មនុស្សក្រៅប្រព័ន្ធតុលាការ។
ស្នងការជាន់ខ្ពស់សិទ្ធិមនុស្សអង្គការសហប្រជាជាតិ លោក Zeid Ra’ad Al Hussein លើកឈ្មោះប្រធានាធិបតីហ្វីលីពីនលោក Rodrigo Duterte ចំៗ ជុំវិញបញ្ហាសិទ្ធិមនុស្សនៅហ្វីលីពីន ដែលលោក Duterte អះអាងថា អង្គការសហប្រជាជាតិលូកដៃចូលកិច្ចការផ្ទៃក្នុងរបស់ខ្លួននោះ។ យុទ្ធនាការបង្ក្រាបគ្រឿងញៀនរបស់រដ្ឋបាលលោក Duterte រងការរិះគន់ខ្លាំងពីអង្គការពិភពលោកនេះ ដោយសារចំនួនមនុស្សស្លាប់យ៉ាងច្រើន ហើយត្រូវអង្គការសហប្រជាជាតិ ចាត់ទុកជាការល្មើសសិទ្ធិមនុស្សទៀតផង។
ថ្លែងទៅកាន់កិច្ចប្រជុំលើកទី៣៣នៃក្រុមប្រឹក្សាសិទ្ធិមនុស្ស លោក Al Hussein និយាយថា ការប្រកាសរបស់ប្រធានាធិបតីហ្វីលីពីន ដែលមិនចង់រាប់រកច្បាប់សិទ្ធិមនុស្សអន្តរជាតិនោះ បង្ហាញពីការខ្វះការយល់ដឹងពីស្ថាប័នសិទ្ធិមនុស្សរបស់យើង ក៏ដូចជាគោលការណ៍នានាដែលធ្វើឲ្យពិភពលោកមានសុវត្ថិភាព។ បើតាមសារព័ត៌មាន Inquirer លោកបន្តថា យុត្តិធម៌ និងការមិនលម្អៀងរបស់ច្បាប់នេះ គឺមូលដ្ឋាននៃទំនុកចិត្ត និងសន្តិសុខ។
ដោយនិយាយសំដៅលើការសម្លាប់មនុស្សក្រៅប្រព័ន្ធតុលាការនៅឯហ្វីលីពីន ស្នងការជាន់ខ្ពស់ខាងលើបញ្ជាក់ថា ប្រជាជនហ្វីលីពីនមានសិទ្ធិទទួលបានការកាត់ទោសតាមច្បាប់ និងមានការធានាត្រឹមត្រូវ។ លើសពីនោះ លោក ក៏ទទូចឲ្យហ្វីលីពីនអញ្ជើញអ្នករាយការណ៍ពិសេសអង្គការសហប្រជាជាតិលើការសម្លាប់មនុស្សក្រៅប្រព័ន្ធតុលាការ ឲ្យមកទស្សនកិច្ចនៅហ្វីលីពីនដែរ បន្ទាប់ពីលុបចោលដោយសារតែការិះគន់លើសម្លាប់មនុស្សនេះ។
តាមពិតទៅ ការមើលមុខគ្នាមិនត្រូវរវាងហ្វីលីពីន និងអង្គការសហប្រជាជាតិ ដោយសារតែលោក Duterte តែងរិះគន់ក្រុមសិទ្ធិមនុស្ស និងមិនដែលទទួលយកការណែនាំទាំងឡាយឡើយ ដែលជាលទ្ធផលនៃការសម្លាប់មនុស្សជិតបីពាន់នាក់មកហើយ។ ជារឿយៗ លោកក៏តែងរិះគន់ពីប្រសិទ្ធភាពរបស់អង្គការសហប្រជាជាតិ ដែលមិនអាចដោះស្រាយបញ្ហាជុំវិញពិភពលោកបាន។
កាលពីខែមិថុនា ប្រធានាធិបតីហ្វីលីពីន បានប្រាប់ឲ្យអង្គការសហប្រជាជាតិបិទមាត់ ព្រោះមិនអាចរកច្រកចេញជម្លោះនៅមជ្ឈិមបូព៌ាបាន។ បន្ទាប់មក លោក Duterte ក៏បានគំរាមដកខ្លួនចេញពីអង្គការសហប្រជាជាតិ ដ្បិតអង្គការនេះមិនបានជួយអ្វីដល់ហ្វីលីពីនឡើយ តែក្រោយមក លោកក៏អះអាងវិញថា លោកនិយាយលេងទេ៕
Tag:
UN
Rodrigo Duterte
សិទ្ធិមនុស្ស
© រក្សាសិទ្ធិដោយ thmeythmey.com