រដ្ឋមន្ត្រីអប់រំប្តេជ្ញាបន្តលើកកម្ពស់សមត្ថភាពគ្រូបង្រៀន

ជាតិ

រដ្ឋមន្ត្រីអប់រំប្តេជ្ញាបន្តលើកកម្ពស់សមត្ថភាពគ្រូបង្រៀន

11, Oct 2016 , 8:19 am

រូបភាព

ដោយ:

ភ្នំពេញ៖ រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន បានប្តេជ្ញាបន្តគោលនយោបាយគ្រូបង្រៀន ដោយបង្កើនប្រាក់បៀវត្សដល់គ្រូបង្រៀន និងផ្តល់ឱកាសសិក្សាបន្ថែមដើម្បីពង្រឹងសមត្ថភាពគ្រូ។ ការប្ដេជ្ញារបស់លោក ហង់ ជួន ណារ៉ុន នៅក្នុងទិវាគ្រូបង្រៀនឆ្នាំ ២០១៦ កាលពីថ្ងៃទី៩ ខែតុលា។

លោក ហង់ ជួន ណារ៉ុន បានលើកឡើងពីគោលនយោបាយពង្រឹងសមត្ថភាពគ្រូផ្តោតលើ ចំណុចសំខាន់ចំនួន ៥ ដើម្បីធានាគុណភាពអប់រំនៅកម្ពុជា។ ចំណុចសំខាន់ដែលលោករដ្ឋមន្ត្រីអប់រំបានលើកឡើង រួមមាន ១, ការទាក់ទាញអ្នកមានសមត្ថភាពឲ្យចូលធ្វើជាបង្រៀន ២, ការលើកកម្ពស់សមត្ថភាពគុណភាពគ្រូបង្រៀន ៣, ការលើកកម្ពស់ប្រសិទ្ធភាពនៃការបំពេញ ការងាររបស់គ្រូបង្រៀន ៤, ការអភិវឌ្ឍវិជ្ជាជីវៈគ្រូបង្រៀន និង៥, ការលើកទឹកចិត្ត និងការ លើកកម្ពស់លក្ខខណ្ឌធ្វើការងារ និងការរស់នៅរបស់គ្រូបង្រៀន ការទទួលស្គាល់ស្នាដៃ និងជូនរង្វាន់ដល់គ្រូបង្រៀនមានស្នាដៃល្អ និងរៀបចំគន្លងអាជីពគ្រូបង្រៀន។

ថ្លែងក្នុងទិវាគ្រូបង្រៀន ក្រោមប្រធានបទ គ្រូបង្រៀនគឺជាអ្នកសម្រួចអនាគតរបស់សិស្ស នៅសាលាតិចណូ កាលពីម្សិលមិញលោករដ្ឋមន្ត្រីអប់រំរូបនេះ បានបន្ថែមថា រដ្ឋាភិបាលបានសម្រេចដំឡើងប្រាក់បំណាច់មុខងារជូនគ្រូបង្រៀនគ្រប់កម្រិត និងប្រាក់តំបន់សម្រាប់គ្រូកំពុងបម្រើការងារនៅក្នុងតំបន់ជួបការលំបាក និងតំបន់ដាចស្រយាលដែរ។

ជាងនេះទៀត រដ្ឋាភិបាលបាន និងកំពុង បង្កើនប្រាក់បៀវត្សគ្រូបង្រៀនថែមទៀត ដើម្បីធានាលើកកម្ពស់ប្រសិទ្ធភាពនៃការអប់រំ។ លោករដ្ឋមន្ត្រី បន្តលើកឡើងថា បច្ចុប្បន្ន គ្រូបង្រៀនក្របខណ្ឌប្រភេទ គ ទទួលប្រាក់បៀវត្សអប្បរមាថ្មីចំនួន ៨០០ ៥០០រៀល។ រីឯ គ្រូក្របខណ្ឌ (ក) ចំនួន ៩៦៦ ៥០០រៀល ក្នុងមួយខែ ដោយមិនគិតបញ្ចូលប្រាក់បន្ទាប់បន្សំផ្សេងៗទៀត។ បើតាមរដ្ឋមន្ត្រីលោក ហង់ ជួន ណារ៉ុន រដ្ឋាភិបាល មានផែនការដំឡើងប្រាក់បៀវត្សអប្បរមាគ្រូបង្រៀនជាថ្មីចំនួន ៩៥ម៉ឺនរៀល នៅឆ្នាំ ២០១៧។

លោក ហង់ ជួន ណារ៉ុន ចាត់កំណែទម្រង់អប់រំនៃអាណត្តិថ្មីរបស់រដ្ឋាភិបាលនេះដូច្នេះថា៖«ជារបត់ថ្មីមួយក្នុងការ អភិវឌ្ឍវិស័យអប់រំ យុវជន និងកីឡា»៕