ឆ្នាំ២០១៦ អគ្គនាយកដ្ឋានពន្ធដារប្រមូលពន្ធបានជាង១,៤០០លានដុល្លារ

ជាតិ

សេដ្ឋកិច្ច

ឆ្នាំ២០១៦ អគ្គនាយកដ្ឋានពន្ធដារប្រមូលពន្ធបានជាង១,៤០០លានដុល្លារ

22, Jan 2017 , 9:39 pm

រូបភាព

រូបភាពពីហ្វេសប៊ុកអគ្គនាយកដ្ឋានពន្ធដារ

ដោយ: ខន ចំប៉ា

អគ្គនាយកដ្ឋានពន្ធដារ ប្រមូលចំណូលពន្ធអាករគ្រប់ប្រភេទ បានចំនួន ៥,៩៨៨,៧០៥.២៥លានរៀល សមមូលនឹង១,៤៧៩.១៨លានដុល្លារ ក្នុងឆ្នាំ២០១៦ ។ ចំណូលនេះ កើនឡើង២៨.៥ភាគរយ ធៀបនឹងឆ្នាំ២០១៥ និងកើនចំនួន ១០៥.៣២ភាគរយ នៃផែនការកំណត់ដោយច្បាប់។

ក្នុងឆ្នាំ២០១៦ អគ្គនាយកដ្ឋានពន្ធដារប្រមូលចំណូលពន្ធ-អាករគ្រប់ប្រភេទ បានសរុបចំនួន ៥លាន ៩សែន ៨ម៉ឺន ៨ពាន់ ៧០៥លានរៀល សមមូលនឹង១,៤៧៩ លានដុល្លារអាមេរិក។ សម្រាប់ឆ្នាំ២០១៦នេះ ការប្រមូលពន្ធដារបង់ចូលថវិកាជាតិ កើនឡើង ៣៣២.៣០ លានដុល្លារ ឬស្មើនឹង២៨.៥ភាគរយបើប្រៀបធៀបទៅនឹង ឆ្នាំ២០១៥ ដែលចំណូលពន្ធដារមានជាង១,២៩៩ លានដុល្លារអាមេរិក។ នេះបើតាមសេចក្ដីប្រកាសព័ត៌មាន ស្ដីពីកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែធ្នូ និងប្រចាំឆ្នាំ២០១៦ ។

ចំណូលនេះកើនឡើងចំនួន១០៥ភាគរយ នៃផែនការកំណត់ដោយច្បាប់ ក្នុងនោះថវិកាថ្នាក់ជាតិបានជាង ៥លាន ២សែន ៤ម៉ឺន២០៨លានរៀល សមមូលនឹង ១,៣១០ លានដុល្លារ និងថវិការដ្ឋបាលថ្នាក់ក្រោមជាតិ បានចំនួនជាង ៧សែន ៤ម៉ឺន ៨ពាន់ ៤៩៦លានរៀល សមមូលនឹង ១៨៧លានដុល្លារ។ នេះបើតាមសេចក្តីប្រកាសព័ត៌មានដដែល។

អគ្គនាយកដ្ឋានពន្ធដារសង្កេតឃើញថា ក្នុងឆ្នាំ២០១៦ ចំណូលពន្ធអាករតាមប្រភេទក៏កើនឡើងដែរ ក្នុងនោះមានអាករពិសេសកើនឡើង២៣.៤ភាគរយ ពន្ធលើប្រាក់បៀវត្សកើន២០ភាគរយ ពន្ធលើប្រាក់ចំណេញ កើន១៨.៤ភាគរយ និងអាករលើតម្លៃបន្ថែមកើន ១៥.២ភាគរយ។ ចំណែកចំណូលពន្ធអាករ តាមសកម្មភាពអាជីវកម្មក៏កើនឡើងស្ទើរគ្រប់ប្រភេទអាជីវកម្មផងដែរ៕