ចិន ប្រាប់រដ្ឋបាលថ្មីរបស់លោកត្រាំឲ្យធ្វើខ្លួន និងប្រយ័ត្នសម្តីបន្តិចលើបញ្ហាសមុទ្រចិនខាងត្បូង

អន្តរជាតិ

ចិន ប្រាប់រដ្ឋបាលថ្មីរបស់លោកត្រាំឲ្យធ្វើខ្លួន និងប្រយ័ត្នសម្តីបន្តិចលើបញ្ហាសមុទ្រចិនខាងត្បូង

24, Jan 2017 , 4:35 pm

រូបភាព

អ្នកនាំពាក្យក្រសួងការបរទេសចិនលោកស្រី Hua Chunying (ខាងឆ្វេង) និង អ្នកនាំពាក្យសេតវិមានអាមេរិក លោក Sean Spicer (ខាងស្តាំ)

ដោយ: ថ្មីៗ

ដោយមិនទុកឲ្យនៅយូរឡើយ រដ្ឋាភិបាលក្រុងប៉េកាំង បានប្រតិកម្ម និងព្រមានភ្លាមៗទៅនឹងការធ្វើអត្ថាធិប្បាយរបស់រដ្ឋាភិបាលក្រុងវ៉ាស៊ីនតោនពីបញ្ហាសមុទ្រចិនខាងត្បូង។ ក្រុងប៉េកាំង បានប្រាប់ក្រុងវ៉ាស៊ីនតោនឲ្យប្រយ័ត្នសម្តីពេលនិយាយពីបញ្ហាសមុទ្រចិនខាងត្បូង។

លោក Sean Spicer អ្នកនាំពាក្យសេតវិមាន នៅថ្ងៃទី២៣ មករា បានធ្វើអត្ថាធិប្បាយពីបញ្ហាសមុទ្រចិនខាងត្បូងយ៉ាងដូច្នេះថា៖« វា គឺជាសំណួរមួយ ប្រសិន កោះទាំងនោះ (ប្រជុំកោះមួយចំនួនក្នុងសមុទ្រចិនខាងត្បូង) គឺជាផ្នែកមួយនៃដែនទឹកអន្តរជាតិ និងមិនមែនជាកម្មសិទ្ធិរបស់ចិនមែននោះ ... យើង(អាមេរិក) ធានាថា នឹងការពារអធិបតេយ្យអន្តរជាតិពីការគ្រប់គ្រងដោយប្រទេសណាមួយនោះ»។

យ៉ាងណាក៏ដោយ លោកអ្នកនាំពាក្យ បានបដិសេធនិយាយលម្អិតពីគោលនយោបាយរបស់រដ្ឋបាលថ្មីអាមេរិកទៅកាន់សមុទ្រចិនខាងត្បូងថានឹងអនុវត្តបែបណានោះទេ ដោយ លោក គ្រាន់តែនិយាយថា អាមេរិក នឹងធ្វើការអភិវឌ្ឍបន្ថែមទៀត ហើយ នឹងសិក្សាពីព័ត៌មានលម្អិតនៃបញ្ហានោះ។

អត្ថាធិប្បាយនេះ ប្រាកដណាស់ថា ធ្វើឲ្យចិន មិនសប្បាយនោះទេ ដ្បិត អាមេរិក ហ៊ាននិយាយថា ទាំងការពារ និងរារាំងចិនមិនឲ្យធ្វើសមកម្មភាពនៅក្នុងសមុទ្រចិនខាងត្បូងនោះ។ ក្នុងសន្និសីទសារព័ត៌មានប្រចាំថ្ងៃរបស់ក្រសួងការបរទេសចិននៅថ្ងៃទី២៤ មករា លោកស្រីអ្នកនាំពាក្យ Hua Chunying បានសង្កត់ធ្ងន់ថា៖«ចិន ទទូចឲ្យអាមេរិកបង្ហាញឥរិយាបថ និងនិយាយឲ្យប្រុងប្រយ័ត្នលើបញ្ហាសមុទ្រចិនខាង។» លោកស្រី អះអាងទៀតយ៉ាងខ្លីទៀតថា ចិន មិនមានជម្លោះអធិបតេយ្យនៅលើប្រជុំស្ព្រាតលីនៃសមុទ្រចិនខាងត្បូងឡើយ។ នេះបើយោងតាមការចុះផ្សាយរបស់ភ្នាក់ងារព័ត៌មាន Reuters។

សូមជម្រាបផងដែរថា សមុទ្រចិនខាងត្បូង មិនត្រឹមតែដែនសមុទ្រដែលសម្បូរទៅដោយប្រជុំកោះដែលសម្បូរទៅដោយធនធានធម្មជាតិប៉ុណ្ណោះនោះទេ ក៏ប៉ុន្តែ វា ក៏ជាច្រកពាណិជ្ជកម្មអន្តរជាតិដែលមមារញឹកលំដាប់ទីពីររបស់ពិភពលោកផងដែរ។ សក្តានុពលនេះ បានធ្វើឲ្យប្រទេសដែលជាប់តំបន់រួមមានប្រទេសអាស៊ាន មួយចំនួនដូចជាព្រុយណេ ម៉ាឡេស៊ី ហ្វីលីពីន និងវៀតណាម បានទាមទារដោយសម្អាងច្បាប់អន្តរជាតិ ខណៈ ចិន ក៏ទាមទារតំបន់នោះដែរ ដោយយោងតាមកត្តាប្រវត្តិសាស្ត្រ។

បើទោះបីជាអាមេរិក មិនមែនជាភាគីជម្លោះក៏ដោយ អាមេរិក បានចូលរួមយ៉ាងសកម្មនៅក្នុងជម្លោះនេះ តាមរយៈការថ្លែងរិះគន់ចិន និងបញ្ជូនានាវាចម្បាំង និងយន្តហោះស៊ើបការណ៍មកកាន់តំបន់ជម្លោះដើម្បីប្រឈមជាមួយនឹងសកម្មភាពវាតទីរបស់ចិននៅក្នុងសមុទ្រចិនខាងត្បូង ដែលរួមទាំងការសាងសង់កោះសិប្បនិម្មិត និងសំណង់យោធានោះ។ អ្វីគួរកត់សម្គាល់នោះ អតីតប្រធានាធីបតីអាមេរិក បារ៉ាក់ អូបាម៉ា ក៏ធ្លាប់សន្យាចំពោះមុខមេដឹកនាំកំពូលអាស៊ាននៅក្នុងកិច្ចប្រជុំកំពូលអាស៊ាន-អាមេរិកនៅក្នុងទឹកអាមេរិកនៅដើមឆ្នាំ២០១៦ ថា អាមេរិក នឹងប្តេជាអនុវត្តច្បាប់អន្តរជាតិនៅក្នុងសមុទ្រចិនខាងត្បូង តាមរយៈការបញ្ជូននាវាល្បាតឲ្យបានទៀងទាត់មកកាន់តំបន់ជម្លោះនោះ៕